ស្រឡាញ់ដើមឈើ តែក៏សូមស្រឡាញ់អាយុជីវិតពលរដ្ឋផង !
- ភ្នំពេញ
កាលពីព្រឹកថ្ងៃទី១២ ខែមករា ឆ្នាំ២០២១ ឯកឧត្តម ឃួង ស្រេង អភិបាលរាជធានីភ្នំពេញ បានដឹកនាំមន្ត្រីជំនាញរបស់រដ្ឋបាលរាជធានីភ្នំពេញ និងមន្ទីរជំនាញពាក់ព័ន្ធ ចុះពិនិត្យដើមឈើ…
កាលពីព្រឹកថ្ងៃទី១២ ខែមករា ឆ្នាំ២០២១ ឯកឧត្តម ឃួង ស្រេង អភិបាលរាជធានីភ្នំពេញ បានដឹកនាំមន្ត្រីជំនាញរបស់រដ្ឋបាលរាជធានីភ្នំពេញ និងមន្ទីរជំនាញពាក់ព័ន្ធ ចុះពិនិត្យដើមឈើ…
កាលពីព្រឹកថ្ងៃទី១២ ខែមករា ឆ្នាំ២០២១ ឯកឧត្តម ឃួង ស្រេង អភិបាលរាជធានីភ្នំពេញ បានដឹកនាំមន្ត្រីជំនាញរបស់រដ្ឋបាលរាជធានីភ្នំពេញ និងមន្ទីរជំនាញពាក់ព័ន្ធ ចុះពិនិត្យដើមឈើ តាមបណ្ដោយវិថីព្រះអង្គឌួង និងវិថីក្រមួនស ។
ដោយដើមឈើទាំងនោះមានអាយុកាលច្រើនឆ្នាំ និងបានផ្ដល់ជាម្លប់ សម្រាប់បងប្អូនប្រជាពលរដ្ឋ ដែលបានធ្វើដំណើរតាមវិថីនេះដូច្នេះរដ្ឋបាលរាជធានីភ្នំពេញនឹងបន្តថែទាំ និងរក្សាទុកដើមឈើចំនួន៣ដើម ដែលចាស់ទ្រុឌទ្រោម ដោយលះមែកចេញមួយចំនួន និងធ្វើជើងទម្រទប់ដើម ដើម្បីការពារគ្រោះថ្នាក់ កើតឡើងជាយថាហេតុ ។
កាលពីសប្តាហ៍កន្លងទៅអង្គភាពសួនច្បារ និងរុក្ខជាតិនៃមន្ទីរសាធារណការ និងដឹកជញ្ជូនរាជធានីភ្នំពេញបានជូនដំណឹង ដោយគ្រោងកាប់ដើមឈើចំនួន៣ដើម ចេញពីសួនច្បារមុខមន្ទីរពេទ្យអង្គឌួងនោះ ដោយសារតែដើមឈើទាំងនោះ មានសភាពពុកគល់ ប្រហោងក្នុង និងដាំដើមឈើថ្មីជំនួស ដើម្បីកុំឲ្យគ្រោះថ្នាក់ដល់ប្រជាពលរដ្ឋជាយថាហេតុ ។ប៉ុន្តែក្រោយពីពិនិត្យជាក់ស្តែង កាលពីព្រឹកថ្ងៃទី១២ ខែមករា អាជ្ញាធររាជធានីភ្នំពេញ បានប្តូរមករក្សាទុកដើមឈើទាំងនោះវិញ ។
បច្ចុប្បន្ន ដើមឈើធំៗ នៅលើសួនច្បារមុខពេទ្យអង្គឌួង ចន្លោះពីមហាវិថីព្រះនរោត្តម ដល់មហាវិថីព្រះមុនីវង្ស មានចំនួនប្រមាណ ៥០ដើម ។ ក្នុងនោះដើមឈើខ្លះ មានអាយុកាលដល់ជាង៣០០ឆ្នាំមកហើយ ។ សម្រាប់ដើមឈើនៅរមណីយដ្ឋានវត្តភ្នំ ដែលស្ថិតនៅជិតសួនច្បារមុខមន្ទីរពេទ្យព្រះអង្គឌួង គឺមានប្រមាណជា៨០០ដើម ហើយដើមឈើទាំងនោះ ភាគច្រើនមានអាយុកាលប្រមាណជាង ៥០០ឆ្នាំហើយ ក្រោមការមើលថែទាំ ជាប្រចាំពីអាជ្ញាធររាជធានីភ្នំពេញ ។
ជាការពិត ការថែរក្សា អភិរក្សរបស់ដើមមិនថា ដើមឈើ ឬអគារជំនាន់ដើម សម័យបារាំងជាដើម គឺជាការប្រពៃ និងជាទាក់ទាញអ្នកទេសចរ មហាជន ។ ប៉ុន្តែទន្ទឹមនឹងការថែរក្សាអភិរក្សនេះ ក៏សូមឲ្យមន្ត្រីជំនាញ ពិនិត្យឲ្យបានច្បាស់លាស់ ដើម្បីធានាថា ទុកដើមឈើទាំងនោះ ឬក៏អគារចាស់បុរាណជំនាន់មុន គឺមិនបង្កគ្រោះថ្នាក់ជាយថាហេតុណាមួយ ដល់អ្នកធ្វើដំណើរ និងអ្នករស់នៅតំបន់ទាំងនោះឡើយ។
ជាវិធានការចំពោះដើមឈើចាស់ទ្រុឌទ្រោមទាំង៣ដើមនៅលើសួនច្បារកណ្តាលផ្លូវភ្លោះ មុខមន្ទីរពេទ្យព្រះអង្គឌួង ដោយថែទាំ និងរក្សាទុក ដោយលះមែកចេញមួយចំនួន និងធ្វើជើងទម្រទប់ដើម គឺជាការរឿងល្អគួរឲ្យសាទរ ។ប៉ុន្តែអាជ្ញាធរសមត្ថកិច្ចជំនាញ សូមពន្លឿនការងារលះមែក និងធ្វើជើងទម្រទប់ដើម ហើយធ្វើដោយបច្ចេកទេសត្រឹមត្រូវ ដាក់ដែក ឬឈើទម្រឲ្យមាំទាំ ដើម្បីធានាសុវត្ថិភាព។ គឺសុវត្ថិភាពទាំងដើមឈើ សុវត្ថិភាពទាំងអ្នកធ្វើ និងធានាសុវត្ថិភាពទាំងអ្នកដំណើរ រួមទាំងអ្នករស់នៅក្បែរៗនោះផង ។
កន្លងមក មានការលើកឡើងជាច្រើនថា បើសិនជាជនណាម្នាក់ បើកឡានបើកម៉ូតូ បុកប៉ះខូចខាតទ្រព្យសម្បត្តិរដ្ឋ និយាយឲ្យចំបុកបាក់ដើមឈើ ឬបង្គោលភ្លើង បង្គោលផ្លាកសញ្ញាចរាចរណ៍ គឺជនបង្កនោះត្រូវចេញលុយសងការខូចខាត តាមការតម្រូវរបស់អាជ្ញាធររាជធានីភ្នំពេញ ។
ប៉ុន្តែមហាជន ក៏តែងតែលើកជាសំណួរវិញ ហើយជាសំណួរ ដែលគ្មានចម្លើយថា នៅពេលដើមឈើ បាក់រលំ សង្កត់ឡានម៉ូតូ ឬក៏បង្កគ្រោះថ្នាក់ជាយថាហេតុលើប្រជាជនវិញ ហេតុអ្វីបានជាអាជ្ញាធរសមត្ថកិច្ច មិនទទួលខុសត្រូវ ដោយចេញលុយសងការខូចខាតទ្រព្យសម្បត្តិរបស់ប្រជាជន ?
ករណីដើមឈើចាស់ទ្រុឌទ្រោមទាំង ៣ដើមនេះ ក៏ដូចគ្នា បើសិនជាបង្កគ្រោះថ្នាក់ ជាយថាហេតុណាមួយ លើទ្រព្យសម្បត្តិ ឡានម៉ូតូ របស់ប្រជាពលរដ្ឋ ឬក៏រលំប៉ះពាល់ផ្ទះរបស់អ្នករស់នៅជិតនោះ ហើយរហូតអាចថា ប៉ះពាល់ដល់មនុស្សថែមទៀតនោះ តើនរណាទទួលខុសត្រូវ ? ការសងទ្រព្យសម្បត្តិខូចខាត ជារឿងមួយហើយ តែបើប៉ះពាល់រហូតដល់មនុស្ស របួស ពិការ ហើយបើធ្ងន់ធ្ងររហូតដល់ស្លាប់នោះ តើអាជ្ញាធរសមត្ថកិច្ចទទួលខុសត្រូវកម្រិតណា ? ឬក៏ជាករណីប្រធានស័ក្តិ ដោយធម្មជាតិ ?
ការលើកឡើងនេះ មិនមែនថា ទាល់តែអាជ្ញាធរសមត្ថកិច្ច កាប់ដើមឈើទាំងនោះចោលឲ្យអស់តែម្តង ទើបចប់បញ្ហានោះឡើយ។ ប៉ុន្តែការលើកពីហានិភ័យដែលអាចកើតឡើងនេះ ដើម្បីឲ្យអាជ្ញាធរសមត្ថកិច្ច មានវិធានការហ្មត់ចត់ ពោលគឺការពារប្រសើរជាងព្យាបាល។ រីឯប្រជាពលរដ្ឋ អ្នកដំណើរ និងអ្នកមានផ្ទះ ឬត្រូវដើរកាត់តាមកន្លែងនោះ គួរតែដឹង ហើយបង្កើនការប្រុងប្រយ័ត្នជាងមុន ឬក៏ថា បើមិនចាំបាច់មិនឆ្លងកាត់តំបន់នោះតែម្តង ។
អ្វីៗក៏ដោយ ទាំងអាជ្ញាធរសមត្ថកិច្ច និងទាំងមន្ត្រីជំនាញសួនច្បារ ថែរក្សាដើម គឺដើម្បីតែប្រជាពលរដ្ឋយើងបានសុខជាប៉ុណ្ណោះ។ ថែរក្សាទុកដើមឈើ កាប់លះមែក ស្រោចទឹកផង ហើយថែមទាំងដាំថែមផង ក៏ដើម្បីឲ្យភ្នំពេញយើង កាន់តែមានសោភ័ណភាព ទាក់ទាញ និងបង្កើតពណ៌ប៉ៃតងកាន់តែច្រើន ដើម្បីផ្តល់ផាសុខភាពដល់ប្រជាពលរដ្ឋ អ្នករស់នៅភ្នំពេញតែប៉ុណ្ណោះ។ ធ្វើអ្វីក៏ដោយ ឲ្យតែធ្វើដោយយកចិត្តទុកដាក់ តាមបច្ចេកទេស និងដោយហ្មត់ចត់ នោះលទ្ធផលនឹងបានគាប់ប្រសើរជាមិនខាន ៕ អត្ថបទដោយ៖ មុត ស្រីពៅ
ចែករំលែកព័តមាននេះ