រាជធានីភ្នំពេញ ៖ ឃីម បូរ៉ា មកពីក្លិបរស្មីភូមិគាបខេត្តបន្ទាយមានជ័យ បានក្លាយជាម្ចាស់ខ្សែក្រវាត់ជើងឯកប៉ះគ្នារដូវកាលទី២ក្នុងប្រភេទទម្ងន់៦០គីឡូក្រាម បន្ទាប់ពីកីឡាកររូបនេះយកឈ្នះពិន្ទុម៉ឺន មេឃា មកពីសមាគមកីឡាប្រដាល់កងយោធពលខេមរភូមិន្ទក្នុងវគ្គផ្ដាច់ព្រ័ត្រនៅលើសង្វៀនទូរទស្សន៍ស៊ីអិនស៊ីកាលពីយប់ថ្ងៃទី៩ មករា…
រាជធានីភ្នំពេញ ៖ ឃីម បូរ៉ា មកពីក្លិបរស្មីភូមិគាបខេត្តបន្ទាយមានជ័យ បានក្លាយជាម្ចាស់ខ្សែក្រវាត់ជើងឯកប៉ះគ្នារដូវកាលទី២ក្នុងប្រភេទទម្ងន់៦០គីឡូក្រាម បន្ទាប់ពីកីឡាកររូបនេះយកឈ្នះពិន្ទុម៉ឺន មេឃា មកពីសមាគមកីឡាប្រដាល់កងយោធពលខេមរភូមិន្ទក្នុងវគ្គផ្ដាច់ព្រ័ត្រនៅលើសង្វៀនទូរទស្សន៍ស៊ីអិនស៊ីកាលពីយប់ថ្ងៃទី៩ មករា ឆ្នាំ២០២១។
ឃីម បូរ៉ា ធ្លាប់យកឈ្នះម៉ឺន មេឃា ដោយពិន្ទុម្ដងរួចមកហើយក្នុងជំនួបមិត្តភាពកាលពីពីរខែមុន ។ សម្រាប់ការជួបគ្នារវាងពួកគេទាំងពីរនៅក្នុងព្រឹត្តិការណ៍ដណ្ដើមខ្សែក្រវាត់ជើងឯកប៉ះគ្នារដូវកាលទី២លើកនេះប្អូនបង្កើតរបស់ម្ចាស់មេដាយមាសកីឡាស៊ីហ្គេមរូបនេះមិនធ្វើឱ្យអ្នកគាំទ្ររបស់ខ្លួនខកបំណងនោះទេ ។
ជាពិសេសបងប្អូន ប្រពន្ធ កូន ដែលបានមកទស្សនាផ្ទាល់មានការរំភើបចិត្តយ៉ាងខ្លាំង បន្ទាប់ពីគេបានធ្វើឱ្យកីឡាករ ម៉ឺន មេឃា ចាញ់ដោយពិន្ទុទាំងមិនអស់ចិត្តជាមួយលទ្ធផលពិន្ទុ៤-១។
ការប្រកួតចាប់ពីទឹកទី១ដល់ទឹកទី៤ ម៉ឺនមេឃា ព្យាយាមប្រើជង្គង់បុកទៅលើពោះទឹក ឃីម បូរ៉ា យ៉ាងសាហាវព្រមទាំងម៉ាត់ទៅលើមុខជាច្រើនដៃទៀត។ ប៉ុន្តែមិនអាចធ្វើអីឃីម បូរ៉ា បានឡើយ ។ បូរ៉ា បានវាយបកសងវិញមួយៗតែចំគោលដៅល្អខ្លាំងណាស់ ។ ជាពិសេសស្នៀតកណ្ដាប់ដៃពិឃាដរបស់គេតែម្ដងបានម៉ាត់ចូលមុខពេញៗ ថែមទាំងបានធ្វើឱ្យម៉ឺន មេឃា ដួលទាំងជំហរជាញឹកញាប់ទៀតផង។ ម៉ឺន មេឃា កម្លាំងរបស់គេចាប់ផ្ដើមស្រុតចុះយ៉ាងខ្លាំងចាប់ពីទឹកទី៤រហូតទៅ ដែលជាហេតុធ្វើឱ្យបូរ៉ាមានឱកាសវាយលុកតាមអំពើចិត្ត។
ឃីម បូរ៉ា បានប្រាប់ឱ្យដឹងថា ការប្រកួតនេះពិតជាមានការតឹងតែងខ្លាំងណាស់ ព្រោះអីគូប្រកួតរបស់គេគឺជាជើងខ្លាំងម្នាក់ដែលមិនងាយយកឈ្នះនោះទេ ។ ម្យ៉ាងវិញទៀតឆ្លងកាត់ការប្រកួតទាំង៥ទឹក គេពិតជាបានប្រឹងប្រែងអស់ពីសមត្ថភាពតែម្ដង ។ ចំណែកម៉ឺន មេឃាបានទទួលស្គាល់ថារូបគេពិតជាចាញ់មែន និងបានត្រឹមចំណាត់ថ្នាក់ជាម្ចាស់ជើងឯករងប៉ុណ្ណោះ ។ ការចាញ់នេះដោយសារតែគេមានការធ្វេសប្រហែសបន្តិចប៉ុណ្ណោះ សង្ឃឹមថា បើសិនជាបានជួបគ្នាលើកក្រោយទៀត ច្បាស់ជាដឹងស-ខ្មៅមិនខាន ។
ឃីម បូរ៉ា ជាម្ចាស់ខ្សែក្រវាត់ជើងឯកទទួលបានខ្សែក្រវាត់១គ្រឿង អមដោយប្រាក់រង្វាន់៥ពាន់ដុល្លារ រីឯម៉ឺន មេឃា ម្ចាស់ជើងឯករងទទួលបានពាន១គ្រឿង អមដោយប្រាក់រង្វាន់៣ពាន់ដុល្លារ៕
ចែករំលែកព័តមាននេះ