ខេត្តព្រះសីហនុ ៖ គ្រោះថ្នាក់ចរាចរណ៍មួយកើតឡើងរវាងរថយន្តនិងរថយន្ត ចំនួន០៣គ្រឿងបុកប៉ះគ្នា បណ្តាលឲ្យមនុស្សចំនួន០៥នាក់រងរបួសធ្ងន់និងស្រាល នៅវេលាម៉ោងជិត៣យប់រំលងអាធ្រាត្រឆ្លងចូល ថ្ងៃទី០៩ខែមករាឆ្នាំ២០២១ នៅលើផ្លូវជាតិលេខ៤ ចន្លោះគីឡូម៉ែត្រលេខ១១៥-១១៦ ស្ថិតក្នុងភូមិស្ទឹងច្រាល ឃុំអូរបាក់រទេះ ស្រុកកំពង់សីលា ខេត្តព្រះសីហនុ ។
សមត្ថកិច្ចបញ្ជាក់ថា រថយន្តទាំង០៣ ទិសដៅស្របគ្នា ចេញពីខេត្តព្រះសីហនុ ឆ្ពោះទៅភ្នំពេញ ក្នុងនោះរថយន្តទី១ជារថយន្ត កុងតឺន័រ ពាក់ស្លាក លេខភ្នំពេញ 3F-0194 អ្នកបើកបរ ឈ្មោះ លាង ផល្លី ភេទប្រុស អាយុ៣០ឆ្នាំ មានទីលំនៅភូមិក្រាំងស្បូវ ឃុំក្រាំងស្បូវ ស្រុកឈូក ខេត្តកំពត ។ (អ្នកបើកបររងរបួសស្រាល) ។ រថយន្តទី២ ម៉ាកហ៊ីណូ ពាក់ស្លាកលេខភ្នំពេញ 3A-1307 អ្នកបើកបរឈ្មោះ កង ង៉ែត ភេទប្រុស អាយុ៦០ឆ្នាំ មានទីលំនៅស្ថិតភូមិគីរីវន្ត ឃុំត្រពាំងក្រឡឹង ស្រុកភ្នំស្រួច ខេត្តកំពង់ស្ពឺ (រងរបួសដូចគ្នា) ។ រថយន្តទី៣ ម៉ាក HUMER ពាក់ស្លាកលេខភ្នំពេញ 2BS-0015 អ្នកបើកបរឈ្មោះ ថាំង គួហួយ ភេទប្រុស អាយុ៣០ឆ្នាំ ជនជាតិចិន (រងរបួសធ្ងន់) និងមានអ្នករួមដំណើរក្នុងរថយន្តទី៣នេះ ជាជនជាតិចិនប្រុស ស្រីចំនួន០២នាក់ទៀត(មិនស្គាល់ឈ្មោះ) រងរបួសធ្ងន់ ។
ក្រោយហេតុការណ៍នេះ សមត្ថកិច្ចចម្រុះបានចេញអន្តរាគមន៍ បញ្ជូនជនរងគ្រោះទាំង០៥នាក់ ទៅសង្រោះនៅមន្ទីពេទ្យបង្អែកស្រុកស្រែអំបិល ខេត្តកោះកុង ចំណែករថយន្តទាំង៣គ្រឿង បានយកទៅរក្សាទុកនៅអធិការដ្ឋាននគរបាលស្រុកកំពង់សីលា ៕
ចែករំលែកព័តមាននេះ