ខេត្តបន្ទាយមានជ័យ ៖ យោងតាមព័ត៌មានក្នុងស្រុករបស់ប្រទេសថៃមួយបានឲ្យដឹងថា ពលករខ្មែរ២០នាក់ត្រូវសមត្ថកិច្ចថៃចាប់ខ្លួននៅកណ្តាលចំការអំពៅ ស្ថិតក្នុងស្រុកខៅឆាក់កាន់ ខេត្តស្រះកែវ កាលពីល្ងាចថ្ងៃទី៥ ខែមករា ឆ្នាំ២០២១ ពីបទស្នាក់នៅ និងឆ្លងដែនខុសច្បាប់។
ពលករខ្មែរដែលត្រូវសមត្ថកិច្ចថៃចាប់ខ្លួនខាងលើនេះ ក្នុងនោះមានប្រុស៩នាក់ ស្រី៨នាក់ និងកុមារប្រុសស្រី៣នាក់ផងដែរ។ ហើយពេលដែលសាកសួរ ពលករទាំងនេះបានប្រាប់សមត្ថកិច្ចថៃថា ពួកគេឆ្លងដែនពីកម្ពុជាតាមច្រករបៀងមួយ ចូលទៅស្រុកខ្លងហាត ខេត្តស្រះកែវ ដោយដើរកាត់ចំការដំឡូងមីតាមរយៈមេខ្យល់ម្នាក់ជាខ្មែរ នាំយកទៅធ្វើការកាប់អំពៅឱ្យគេ។
ប្រភពដដែលបន្តថា លុះទៅដល់ដីថៃ ពួកគេត្រូវបានដឹកតាមរថយន្ត២គ្រឿងទៅចំណុចកើតហេតុ ហើយពេលកំពុងនាំគ្នាបោះតង់ដើម្បីស្នាក់នៅបណ្តោះអាសន្នធ្វើការ ក៏ស្រាប់តែត្រូវសមត្ថកិច្ចថៃចូលទៅចាប់តែម្តង។
បើតាមអាជ្ញាធរ និងសមត្ថកិច្ចថៃ កំពុងសាកសួរស្ត្រីម្ចាស់ចំការអំពៅវ័យ៤៤ឆ្នាំ បានឱ្យដឹងថា តើហេតុអ្វីបានជាហ៊ានទទួលយកពលករខ្មែរទាំងអស់ទៅលាក់ទុកធ្វើការដោយខុសច្បាប់?
ហើយក្រុមពលករទាំងនេះ ក្រោយពេលឃាត់ខ្លួន ក៏ត្រូវបានអាជ្ញាធរ និងសមត្ថកិច្ចថៃប្រគល់ឲ្យក្រុមគ្រូពេទ្យជំនាញ ដើម្បីធ្វើការពិនិត្យសុខភាពតាមវិធានការរបស់ក្រសួងសុខាភិបាលរបស់ថៃ បន្ទាប់មកក៏ប្រគល់ឲ្យផ្នែកជំនាញ ដើម្បីចាត់ការបន្ត៕
ចែករំលែកព័តមាននេះ