ខេត្តមណ្ឌលគិរី ៖ តម្លៃដីនៅស្រុកអូររាំងបានឡើងថ្លៃដូចទឹកកំពុងពុះ ខណៈអ្នកនៅភ្នំពេញកំពុងជ្រួលច្របល់ឲ្យអ្នកគក់ជេរកដីទុកលក់ឲ្យខ្លួន ក្រោយរាជរដ្ឋាភិបាលកម្ពុជា បានអនុញ្ញាតជាគោលការណ៍ដើម្បីឱ្យមានការសាងសង់អាកាសយានដ្ឋានថ្មីខ្នាតតំបន់ នៅខេត្តមណ្ឌលគិរី តាមយន្តការភាពជាដៃគូរវាងរដ្ឋ និងឯកជន (PPP)។…
ខេត្តមណ្ឌលគិរី ៖ តម្លៃដីនៅស្រុកអូររាំងបានឡើងថ្លៃដូចទឹកកំពុងពុះ ខណៈអ្នកនៅភ្នំពេញកំពុងជ្រួលច្របល់ឲ្យអ្នកគក់ជេរកដីទុកលក់ឲ្យខ្លួន ក្រោយរាជរដ្ឋាភិបាលកម្ពុជា បានអនុញ្ញាតជាគោលការណ៍ដើម្បីឱ្យមានការសាងសង់អាកាសយានដ្ឋានថ្មីខ្នាតតំបន់ នៅខេត្តមណ្ឌលគិរី តាមយន្តការភាពជាដៃគូរវាងរដ្ឋ និងឯកជន (PPP)។
យោងតាមចំណាររបស់សម្ដេចតេជោ ហ៊ុន សែន នាយករដ្ឋមន្ត្រីកម្ពុជា រាជរដ្ឋាភិបាលកម្ពុជា បានសម្រេចជាគោលការណ៍ ជ្រើសរើសក្រុមហ៊ុន Powerchina International Group ជាដៃគូឯកជន ក្នុងការសិក្សា និងអភិវឌ្ឍន៍សំណើគម្រោងសាងសង់អាកាសយានដ្ឋានថ្មីខ្នាតតំបន់ នៅខេត្តមណ្ឌលគិរី ដោយតម្រូវឱ្យក្រុមហ៊ុនទទួលរ៉ាប់រងលើចំណាយនៃការសិក្សាសមិទ្ធិលទ្ធភាពគម្រោង ដោយរដ្ឋលេខាធិការដ្ឋានអាកាសចរស៊ីវិល។
ជាមួយគ្នានេះ រាជរដ្ឋាភិបាល អនុញ្ញាតឱ្យរដ្ឋលេខាធិការដ្ឋានអាកាសចរស៊ីវិល ដឹកនាំរៀបចំកិច្ចព្រមព្រៀងក្របខណ្ឌ ជាមួយក្រុមហ៊ុន Powerchina International Group តាមនីតិវិធីមានដូចបានអនុវត្តកន្លងមកសម្រាប់គម្រោងផ្លូវល្បឿនលឿនភ្នំពេញ-ខេត្តព្រះសីហនុ និងគម្រោងផ្លូវល្បឿនលឿនភ្នំពេញ-ក្រុងបាវិត។
លោក ឡុញ ភក័ត្រា អ្នកជំនួញវិស័យដីធ្លីនិងជាម្ចាស់បូទិកផ្ទះសប្បាយមណ្ឌលគិរី បានឲ្យដឹងថា កាលពីអំឡុងឆ្នាំ២០២០ដីនៅទីរួមស្រុកអូររាំង តាមបណ្តោយផ្លូវជាតិលេខ៧៦ មានតម្លៃប្រមាណ១ម៉ែត្រដើរ ត្រឹមថ្លៃ ២ ០០០$ទៅ ៣ ០០០$ប៉ុនណោះ ចំណែកដីតាមបណ្តោយផ្លូវគ្រួសក្រហមឬផ្លូវដីធម្មតា មានតម្លៃមួយម៉ែត្រដើរដូចគ្នា១០០០$ទៅ ១ ៥០០$ ក្នុងមួយម៉ែត្រ។
លោកភក័ត្រាបន្តថា នៅដើមឆ្នាំ២០២១នេះក្រោយដំណឹងនៃការសាងសង់ព្រលានយន្តហោះថ្មី ត្រូវបានផ្សព្វផ្សាយជាសាធារណៈមក គួបផ្សំស្ថានភាពជំងឺកូវីដនៅប្រទេសកម្ពុជាហាក់មានសភាពស្ងប់ស្ងាត់វិញ លោកបានកត់សម្គាល់ឃើញថា ដីនៅស្រុកអូររាំង បានឡើងថ្លៃយ៉ាងគំហុក ពោលគឺមានការឡើងថ្លៃរហូតដល់ទៅបីឬបួនដងនៃតម្លៃដើម។ដីនៅតាមបណ្តោយផ្លូវជាតិលេខ៧៦ បានឡើងថ្លៃប្រមាណ១ម៉ែត្រដើរ៦ទៅ៨ពាន់ដុល្លារ ចំណែកដីតាមបណ្តោយផ្លូវគ្រួសក្រហមឬផ្លូវដីធម្មតា ឡើងតម្លៃមួយម៉ែត្រដើរ៣ ០០០$ទៅ៣ ៥០០$ក្នុងមួយម៉ែត្រដែរ។
លោក សៀក មុន្នី អភិបាលស្រុកអូររាំង បានឲ្យដឹងថា បន្ទាប់ពីឃើញមានលិខិតចេញ
ពីទីស្តីការគណៈរដ្ឋមន្ត្រីផ្សព្វផ្សាយតាមបណ្តាញសង្គមមក មានបងប្អូនជាច្រើន ជាពិសេស អ្នកនៅភ្នំពេញ បានទំនាក់ទំនងសាកសួងជាបន្តបន្ទាប់ពីដំណឹងនេះ។ តែលោកអភិបាលស្រុកថា ដ្បិតតែមានពាក្យចចាមរាមអំពីតម្លៃដីឡើងថ្លៃ តែរហូតមកដល់ពេលនេះមិនទាន់ឃើញមានការផ្ទេរសិទ្ឋលក់ដូរដីធ្លីអីនោះទេ។
ព័ត៌មានពិស្តារមានផ្សាយជូននៅកាសែតកោះសន្តិភាព ។
ចែករំលែកព័តមាននេះ