ក្រសួងសុខាភិបាល បានចេញផ្សាយនូវសេចក្តីប្រកាសព័ត៌មានមួយទាំងកណ្តាលអធ្រាត្រ កាលពីយប់ថ្ងៃទី២ ឆ្លងចូលថ្ងៃទី៣ ខែមករា ឆ្នាំ២០២០ ពីករណីស្លាប់ពលករម្នាក់ មកពីប្រទេសថៃ កាលពីថ្ងៃទី២ ខែមករា…
ក្រសួងសុខាភិបាល បានចេញផ្សាយនូវសេចក្តីប្រកាសព័ត៌មានមួយទាំងកណ្តាលអធ្រាត្រ កាលពីយប់ថ្ងៃទី២ ឆ្លងចូលថ្ងៃទី៣ ខែមករា ឆ្នាំ២០២០ ពីករណីស្លាប់ពលករម្នាក់ មកពីប្រទេសថៃ កាលពីថ្ងៃទី២ ខែមករា ឆ្នាំ២០២១ ។ នេះជាករណីអ្នកស្លាប់ទី២ហើយ នៅមណ្ឌលចត្តាឡីស័ក ដែលបានកើតឡើង ក្នុងខេត្តត្បូងឃ្មុំតែមួយ ។
សេចក្តីប្រកាសរបស់ក្រសួងសុខាភិបាល លើកឡើថា ហេតុការណ៍នេះ បានកើតឡើងនៅក្នុងមណ្ឌលចត្តាឡីស័កកម្រិត២ ក្នុងខេត្តត្បូងឃ្មុំ (វិទ្យាល័យត្បូងឃ្មុំ) វេលាម៉ោង៩និង១០នាទីព្រឹកថ្ងៃទី២ ខែមករា ឆ្នាំ២០២១ ។ នោះគឺបុរសម្នាក់ អាយុ៥២ឆ្នាំ មានអាសយដ្ឋាន នៅភូមិមេលោង ឃុំមៀន ស្រុកអូររាំងឳ ខេត្តត្បូងឃ្មុំ ។
ក្រសួងសុខាភិបាលបានប្រកាសថា បុរសនេះជាពលករខ្មែរ ដែលបានធ្វើដំណើរមកពីខេត្តឈុនបូរី ប្រទេសថៃ ចូលមកកម្ពុជា តាមច្រកអន្តរជាតិអូរស្មាច់ ក្នុងខេត្តឧត្តរមានជ័យ កាលពីថ្ងៃទី២៨ ខែធ្នូ ឆ្នាំ២០២០ ក្រោយពីបានពិនិត្យសុខភាព នៅច្រកអូរស្មាច់រួចរាល់ក៏មានការចាត់ចែងបញ្ជូនគាត់ បន្តមកខេត្តត្បូងឃ្មុំ តាមរថយន្តដឹកជញ្ជូនរបស់យោធាមកដល់មណ្ឌលចត្តាឡីស័ក កម្រិត២ ក្នុងខេត្តត្បូងឃ្មុំ នៅថ្ងៃទី២៩ ខែធ្នូ ឆ្នាំ២០២០ វេលាម៉ោង៧ព្រឹក និងបានយកវត្ថុសំណាក ផ្ញើទៅធ្វើវិភាគនៅវិទ្យាស្ថានប៉ាស្ទ័រកម្ពុជា រាជធានីភ្នំពេញនៅថ្ងៃដដែល ហើយលទ្ធផលតេស្ត លើកទី១ របស់គាត់ នៅថ្ងៃទី៣០ ខែធ្នូ ឆ្នាំ២០២០ គឺអវិជ្ជមានវីរុសកូវីដ១៩ ។
ក្រសួងសុខាភិបាល បានបញ្ជាក់ថា នៅពេលគេបានគាស់ទ្វារបន្ទប់ទឹក នៅម៉ោង៩និង១០នាទីព្រឹកថ្ងៃទី២ ខែមករា ឆ្នាំ២០២១ ក៏ឃើញបុរសរូបនោះ បានដេកស្លាប់ក្នុងបន្ទប់ទឹក ។ ក្រុមការងារកោសល្យវិច្ច័យ បានពិនិត្យលើខ្លួនសាកសព ឃើញមានស្នាមបែកក្បាលហូរឈាម ក្នុងស្ថានភាពរបៀបជាបានដួលបោកក្បាល ទៅនឹងចានបង្គន់ផងដែរ ។
ក្រសួងសុខាភិបាល ក៏បានលើកឡើងថា ភរិយាសពបានបញ្ជាក់ថា សាមីសព ធ្លាប់មាន ជំងឺបេះដូង និងមានការព្យាបាលកន្លងមក នៅប្រទេសថៃ ជាយូរមកហើយដែរ។ ប៉ុន្តែក្នុងអំឡុងពេលសម្រាកធ្វើចត្តាឡីស័កនេះ បុរសរងគ្រោះ មិនបានប្រាប់ក្រុមគ្រួសារពេទ្យ ពីប្រវត្តិ ដែលគាត់ធ្លាប់កើតជំងឺបេះដូងនោះទេ ។
សេចក្តីប្រកាស បានបញ្ជាក់ថា «ការសន្និដ្ឋានរបស់ក្រុមគ្រូពេទ្យកោសល្យវិច័យគឺ សាមីសពមានជំងឺចុកបេះដូង ហើយគាំងបេះដូងភ្លាមៗ ដែលធ្វើឲ្យដួលបោកក្បាលនឹងកន្ថោរបង្គន់នៅវេលាម៉ោងប្រហែលជា៩និង១០នាទីព្រឹកថ្ងៃទី២ ខែមករា ឆ្នាំ២០២១»។
គេនៅចាំថា នេះជាករណីទី២ហើយ ដែលអ្នកធ្វើចត្តាឡីស័កបានស្លាប់នៅក្នុងមណ្ឌលចត្តាឡីស័ក ។
នោះគឺកាលពីយប់ថ្ងៃទី២៣ ខែកក្កដា ឆ្នាំ២០២០ ក្រសួងសុខាភិបាលបានប្រកាសថា យុវជនម្នាក់អាយុ២១ឆ្នាំ បានស្លាប់នៅក្នុងមណ្ឌលចត្តាឡីស័ក នៅក្នុងសាលារៀនមួយ នៅឃុំស្វាយឃ្លាំង ស្រុកក្រូចឆ្មារ ខេត្តត្បូងឃ្មុំ កាលពីយប់ថ្ងៃទី២២ ខែកក្កដា ឆ្នាំ២០២០។ យុវជននោះ គឺមិនមែនស្លាប់ ដោយសារកើតជំងឺកូវីដ១៩ឡើយ។
ក្រសួងសុខាភិបាលបានប្រកាសថា យុវជនអាយុ២១ឆ្នាំ ដែលបានស្លាប់ក្នុងមណ្ឌលចត្តាឡីស័ក នៅខេត្តត្បូងឃ្មុំនោះ មានប្រវត្តិធ្លាប់ទៅធ្វើការជាពលករ នៅប្រទេស ម៉ាឡេស៊ី។ យុវជននោះបានស្លាប់ដោយសារខ្យល់គ និងលួចទិញថ្នាំផ្តាសាយយកទៅលេបច្រើនមុខ។
កាលពីយប់ថ្ងៃទី១០ ខែធ្នូ ឆ្នាំ២០២០ ក៏មានករណីបុរសម្នាក់ ធ្លាក់ពីសណ្ឋាគារ ឡុង លីវ ជាន់ទី៥ ក្នុងរាជធានីភ្នំពេញ ដែលជាកន្លែងធ្វើចត្តាឡីស័ក ពិនិត្យតាមដានសុខភាពរកមេរោគកូវីដ១៩ ។ មួយថ្ងៃក្រោយហេតុការណ៍កាលណោះ ត្រូវបានលោកជំទាវ ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល បានបញ្ជាក់ថា ក្រោយហេតុការណ៍បុគ្គលនោះ ត្រូវបានបញ្ជូនទៅសង្គ្រោះ នៅមន្ទីរពេទ្យមិត្តភាពខ្មែរ-សូវៀត ហើយបានដឹងខ្លួន និងនិយាយបានខ្លះៗហើយ តែស្ថិតក្នុងសភាពធ្ងន់ធ្ងរនៅឡើយទេ ។
លោកជំទាវ ឱ វណ្ណឌីន បានបញ្ជាក់ថា តាមការសាកសួរបុគ្គលនេះផ្ទាល់ គឺគាត់ភ្លាត់ជើងធ្លាក់មក ដោយសារភាពរវើយរវាយរបស់គាត់ ដែលជាឥទ្ធិពលនៃការប្រើប្រាស់គ្រឿងថ្នាំញៀន ។ ម្យ៉ាងក៏មានការពាក់ព័ន្ធទៅលើបញ្ហាជំពាក់លុយគេច្រើន ដែលពាក់ព័ន្ធនឹងគ្រឿងញៀននេះ ។ ការធ្វើតេស្តទឹកនោមគាត់ គឺឃើញមានសារធាតុញៀនប្រភេទអំហ្វេតាមីន ។ គាត់មានលទ្ធផលតេស្តអវិជ្ជមាន វីរុសកូវីដ-១៩ តែតម្រូវឲ្យធ្វើចត្តាឡីស័កបន្ត នៅសណ្ឋាគារ ឡុង លីវ តាំងពីថ្ងៃទី២ ខែធ្នូមកម្ល៉េះ ។
ក្រោយហេតុការណ៍នោះមិនដឹងថា បុរសធ្លាក់ពីជាន់ទី៥ ក្នុងពេលធ្វើចត្តាឡីស័កនោះ ស្លាប់ ឬរស់នោះឡើយ ។ ក៏បាត់ដំណឹងឈឹងតែម្តង ។ឆ្លងតាមហេតុការណ៍ ៣ករណីធំៗខាងលើនេះ នៅកន្លែងធ្វើចត្តាឡីស័ក ដើម្បីតាមដានរកមេរោគកូវីដ១៩ គួរតែអាជ្ញាធរសមត្ថកិច្ច ពិសេសក្រសួងសុខាភិបាល តាមរយៈមន្ទីរសុខាភិបាលរាជធានីខេត្តទូទាំងប្រទេស គួរបង្កើនការយកចិត្តទុកដាក់ ដោយរឹតបន្តឹង និងតាមដាន ដោយបំពាក់កាមេរ៉ាសុវត្ថិភាព ឬក៏ពង្រាយ ភ្នាក់ងារតាមឃ្លាំមើលរាល់ការចេញចូលជួបអ្នកធ្វើចត្តាឡីស័ក ហើយហាមឃាត់ រាល់ការនាំយកថ្នាំទៅឲ្យអ្នកធ្វើចត្តាឡីស័កទាំងនោះ ។
កន្លែងស្នាក់នៅក្នុងមណ្ឌលចត្តាឡីស័ក ពិសេសនៅតាមសាលារៀន គួរតែត្រួតពិនិត្យពីសុវត្ថិភាពឡើងវិញ ពិសេសបន្ទប់ទឹកនេះឯង ។ ជាបន្ទប់ទឹករួម ឬក៏ដាច់ដោយឡែក តែត្រូវមានអនាម័យ និងស្អាតជានិច្ច ចៀសវាងកាន់ស្លែ បណ្តាលឲ្យរអិលនិងគ្រោះថ្នាក់ ។
នៅតាមមណ្ឌលចត្តាឡីស័ក ពិសេសនៅសាលារៀន និងសណ្ឋាគារក៏ត្រូវតែបង្កើនការយាមកាម ដាក់វេនប្រចាំការ២៤ម៉ោងលើ២៤ម៉ោង ទាំងកងកម្លាំងប៉ូលិស និងទាំងក្រុមគ្រូពេទ្យ ។
អ្នកចូលមកធ្វើចត្តាឡីស័កខ្លួនឯង ក៏គួរតែបង្កើនការយកចិត្តទុកដាក់ ដោយមិនគួរលួច លេបថ្នាំ ឬក៏លាក់បាំង ព័ត៌មានពីអាការៈជំងឺខ្លួនឯងនោះទេ។ ឈឺអី ប្រាប់គ្រូពេទ្យ ព្រោះអ្នកដែលមានជំងឺកូវីដ១៩ ដែលមកដល់ព្រឹក ថ្ងៃទី៣ ខែមករា ឆ្នាំ២០២១ នៅទូទាំងប្រទេសកម្ពុជាយើង រកឃើញសរុបចំនួន ៣៨១នាក់ គឺមិនមាននរណាម្នាក់ ឈឺរហូតដល់ស្លាប់ ដោយសារតែកូវីដនោះទេ។ ផ្ទុយទៅវិញ មានអ្នកជំងឺកូវីដ១៩ រហូតដល់ទៅ៣៦២នាក់ ត្រូវបានព្យាបាលជាសះស្បើយជាបន្តបន្ទាប់ ។
ដូច្នេះអ្នកចូលមកធ្វើចត្តាឡីស័ក ដែលមិនទាន់ទាំងឈឺជំងឺកូវីដ១៩ផង សូមកុំខ្លាច និងសូមកុំលួចលាក់ព័ត៌មាន ឬក៏លួចលាក់យកថ្នាំពេទ្យពីក្រៅទៅលេប ព្រោះតែចង់ជា តែទីបំផុតដូចករណី នៅឃុំស្វាយឃ្លាំង ស្រុកក្រូចឆ្មារ ខេត្តត្បូងឃ្មុំ គឺមិនបានជាឯណា បែរជានាំគ្រោះថ្នាក់ដល់ខ្លួនឯងទៅវិញ ។
ម្យ៉ាងទៀត អ្នកធ្វើចត្តាឡីស័ក មិនថា នៅមណ្ឌលចត្តាឡីស័ក តាមសាលារៀន តាមផ្ទះសំណាក់ ឬក៏តាមសណ្ឋាគារ ហើយមិនថា នៅស្រុកភូមិ នៅខេត្ត ឬក៏នៅរាជធានីភ្នំពេញនោះទេ តោងទាំងអស់គ្នា បង្កើនការប្រុងប្រយ័ត្នផ្ទាល់ខ្លួន ព្រោះថា អត្រាកើតជំងឺកូវីដ១៩ ក្នុងពេលធ្វើចត្តាឡីស័ក តិចតួចបំផុត ព្រោះថា ការធ្វើតេស្តលើកទី១ គឺមិនមានរកឃើញជំងឺនេះឡើយ ។ ដូច្នេះគួរតែកុំភ័យខ្លាចពេក រហូតដល់បង្កគ្រោះថ្នាក់ ភ័ន្តស្មារតី រអិលជើង ធ្លាក់ពីលើសណ្ឋាគារ ឬក៏ដួលបោកក្បាល នៅក្នុងបន្ទប់ទឹក ជាដើមនោះឡើយ។
ដូច្នេះសូមអ្នកធ្វើចត្តាឡីស័កទាំងអស់ សូមទុកចិត្តលើក្រុមគ្រូពេទ្យខ្មែរយើង ហើយប្រាប់ពីអាការៈរបស់ខ្លួន ដោយត្រង់ទៅត្រង់មក ទៅកាន់ក្រុមគ្រូពេទ្យ ។ ក្នុងនោះ អ្នកធ្វើចត្តាឡីស័ក ក៏ត្រូវបង្កើនការប្រុងប្រយ័ត្ន ផ្ទាល់ខ្លួន ក្នុងពេលរស់នៅមណ្ឌលធ្វើចត្តាឡីស័ក រយៈពេល ១៤ថ្ងៃនេះ។ មិនយូរទេ ចាត់ទុកថា ជាការសម្រាកពីការងារមួយរយៈប៉ុណ្ណោះ ។
សូមទុកចិត្តគ្រូពេទ្យរបស់យើងហើយស្មោះត្រង់ផ្តល់ព័ត៌មានទាក់ទងសុខភាពគ្រប់បែបយ៉ាងដើម្បីក្រុមគ្រូពេទ្យធ្វើការពិនិត្យនិងព្យាបាលតាមបច្ចេកទេសជួយដល់សុខភាពនិងជីវិត ៕ អត្ថបទដោយ៖ មុត ស្រីពៅ
ចែករំលែកព័តមាននេះ