ផ្លូវឆ្ពោះទៅកាន់ការសម្រេចបំណងប្រាថ្នាឆ្នាំ2021
- ភ្នំពេញ
ថ្ងៃទី១ ខែមករានេះ ជាការចាប់ផ្តើមដំបូង ក្នុងឆ្នាំថ្មី ឆ្នាំសកល ឆ្នាំ២០២១ ។ ការផ្ញើសារជូនពរជាលិខិតជាផ្ទាល់មាត់ និងបង្ហោះសារតាមហ្វេសប៊ុក ឬក៏…
ថ្ងៃទី១ ខែមករានេះ ជាការចាប់ផ្តើមដំបូង ក្នុងឆ្នាំថ្មី ឆ្នាំសកល ឆ្នាំ២០២១ ។ ការផ្ញើសារជូនពរជាលិខិតជាផ្ទាល់មាត់ និងបង្ហោះសារតាមហ្វេសប៊ុក ឬក៏ Messenger ឬក៏តាម Telegramជាដើម ត្រូវបានធ្វើឡើងយ៉ាងច្រើនតាំងពីប៉ុន្មានថ្ងៃមុនមកម្ល៉េះ ។ពិសេសនៅយប់ថ្ងៃទី៣១ ខែធ្នូ ឆ្នាំ២០២០ ឈានចូលថ្ងៃទី១ ខែមករា ឆ្នាំ២០២១ ដែលជាការឆ្លងឆ្នាំ ឬរាប់ថយក្រោយ Countdown ។
សារជូនពរឲ្យអ្នក ដែលយើងគោរពរាប់អាន ស្រឡាញ់ មានសុខភាពល្អ កុំបីឈឺថ្កាត់ រឹងមាំ សម្រេចជោគជ័យ ក្នុងគ្រប់កិច្ចការតូចធំទាំងពួង ហើយពិសេស គឺមានសុភមង្គលក្នុងក្រុមគ្រួសារ សុភមង្គលគ្រប់ពេលវេលាទាំងយប់ទាំងថ្ងៃជាដើម គឺត្រូវបានប្រជា ពលរដ្ឋខ្មែរយើងផ្ញើឲ្យគ្នាទៅវិញទៅមកយ៉ាងច្រើន នៅក្នុងឱកាសចូលឆ្នាំថ្មី ឆ្នាំសកល ឆ្នាំ២០២១នេះ ។
ក្នុងសារលើហ្វេសប៊ុក នៅឆ្នាំចាស់ ផ្លាស់ចូលឆ្នាំថ្មី ឆ្នាំសកល ២០២០-២០២១ កាលពីថ្ងៃទី៣១ ខែធ្នូ ឆ្នាំ២០២០ លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេសកម្ពុជា ដែលជាអ្នកកាសែតជើងចាស់ ក្នុងទស្សវត្សរ៍ឆ្នាំ១៩៨០ផង បានលើកឡើងថា «Covid- 19 បានបង្កនូវវិបត្តិសកលក្នុងវិសាលភាព មិនធ្លាប់មានដែលរាលដាលពីវិស័យសុខា ភិបាលដល់សេដ្ឋកិច្ចសង្គម និងនយោបាយទៀតផង ។
ការផ្ទុះឡើងនៃរលកទី២, ទី៣ និងការកើតចេញនូវវីរុស ដែលវិវត្តន៍ថ្មី រឹតតែធ្វើឲ្យពរសុខភាពល្អនេះ មានសារៈសំខាន់ទៅទៀត ។ អ្នកខ្លះថា គ្រាន់តែជូនពរ មិនអាចយកឈ្នះលើ Covid-19 នេះបានទេ ។ ត្រូវមានវ៉ាក់សាំង មានថ្នាំព្យាបាល មាន គ្រូពេទ្យថែទាំ មានឧបករណ៍ជួយសង្គ្រោះ ក្នុងករណីធ្ងន់ធ្ងរ ។ល។ ត្រូវហើយ ! តែពាក្យចាស់លោកពោលថា «អាគមផ្សំអាយុ» មានទៅខាតអីគ្រាន់តែជូននិងទទួលពរនោះ យ៉ាងហោចក៏បានចម្រើនកម្លាំងចិត្តដែរ !» ។
យ៉ាងណាក៏ដោយ លោកប្រមុខការទូតកម្ពុជា បានបង្ហាញនូវក្តីសង្ឃឹម ២ចំណុច ដែលនឹងសម្រេចបាន នៅឆ្នាំថ្មី ឆ្នាំ២០២១ ។ នោះគឺមនុស្សជាតិ នឹងយកឈ្នះកូវីដ១៩ តាមរយៈវ៉ាក់សាំងថ្មី ដែលត្រូវបានរកឃើញជាបន្តបន្ទាប់ ។ រីឯចំណុចមួយទៀត គឺការបន្ថយភាពតានតឹងរវាងមហាអំណាចកំពូលទាំង២ គឺអាមេរិក និងចិន ។
ការបួងសួង បន់ឲ្យជំងឺកូវីដ១៩ រលាយបាត់ពីពិភពលោក រួមទាំងកម្ពុជា ក៏ជាក្តីប្រាថ្នារបស់មនុស្សជាតិទូទៅ ពិសេសនៅកម្ពុជា។ នៅកម្ពុជា បើគិតត្រឹមតែរកឃើញអ្នកឆ្លងជំងឺកូវីដ១៩ ដំបូងលើបុរសជនជាតិចិន មកដល់ខេត្តព្រះសីហនុ កាលពីថ្ងៃទី២៧ ខែមករា ឆ្នាំ២០២០ គឺក៏ជិត១ឆ្នាំហើយ ដែលប្រជាពលរដ្ឋយើង ត្រូវកូវីដ១៩ បៀតបៀននាំឲ្យខកខានខាតបង់អ្វីៗសព្វបែបយ៉ាងក្នុងការងារ និងមុខរបរប្រចាំថ្ងៃ ។ នេះយើងមិនទាន់គិតដល់ការខាតបង់សេដ្ឋកិច្ចជាតិ ដែលរាជរដ្ឋាភិបាល ត្រូវទទួលខុសត្រូវរាប់រយពាន់លានដុល្លារនោះផងទេ ។
ជាការពិត ការជូនពរនិងការបួងសួងបែបន់ គឺពិតជាមិនអាចសម្រេចទៅបានទេ បើសិនជាយើងម្នាក់ៗមិនខិតខំប្រឹងប្រែងទេនោះ ។ ពាក្យចាស់ថា «ចេះមកពីរៀន មានមកពីរក» ។ ម្យ៉ាងទៀត បើតាមធម៌ព្រះពុទ្ធ ដើម្បីសម្រេចការងារអ្វីមួយឲ្យជោគជ័យ គឺត្រូវមានធាតុ៤ជាសំខាន់៖ ១-ឆន្ទៈ ការកំណត់គោលដៅ ២-វិរិយៈ សេចក្តីព្យាយាម ៣-ចិត្តៈ ការតាំងចិត្តឲ្យមោះមុតក្នុងការងារនោះ និង៤-វិមង្សា គឺត្រូវរកវិធីសាស្ត្របែបណា ដើម្បីសម្រេចគោលដៅនោះដែលនិយាយដល់បញ្ញារបស់បុគ្គលម្នាក់ៗ ។
យើងងាកមកមើលសង្គមរស់នៅជាក់ស្តែងវិញម្តង ។ ក្នុងករណី សិស្សរៀនត្រៀម ប្រឡងអ្វីមួយ គឺមិនមែនគ្រាន់តែសិស្សនោះទទួលបានការជូនពរពីមិត្តភក្តិ បងប្អូន ឪពុកម្តាយ ក្រុមគ្រួសារ សាច់ញ្ញាតិ ហើយត្រូវជាប់ការប្រឡងនោះទេ។ ផ្ទុយទៅវិញ តោងឲ្យសិស្សនោះឯង ត្រូវខិតខំរៀនសូត្រទាំងយប់ទាំងថ្ងៃដោយយក ចិត្តទុកដាក់បំផុត។ នោះគឺដំបូងបំផុត សិស្សនោះ ត្រូវតែកំណត់គោលដៅរបស់ខ្លួន គឺការប្រឡងខាងមុខ ។ បន្ទាប់មក សិស្សនោះឯង ត្រូវព្យាយាម សង្វាតក្នុងការរៀនសូត្រ មើលមេរៀនផង ទៅរៀនកួផង ស្រាវជ្រាវឯកសារ សួរគេសួរឯងផង ។
ផុតពីនេះ ទាមទារឲ្យសិស្សនោះ ត្រូវមានការតាំងចិត្តមោះមុត ទោះបីជាភ្លៀង ឬក្តៅយ៉ាងណា ក៏នៅតស៊ូទៅសាលារៀន ឬក៏ភ្លើងដាច់ ក្តៅស្អោះបែបណា នៅតែប្រឹងប្រែងរៀនមុខវិជ្ជា ដែលត្រូវប្រឡងនោះឲ្យចេះចាំស្ទាត់ទាល់តែបាន ។ នៅពេលចេះចាំមុខវិជ្ជាសព្វគ្រប់ហើយ ក៏ទាមទារឲ្យសិស្សនោះឯង ត្រូវរកវិធីសាស្ត្របែបណា ដើម្បីសម្រេចគោលដៅក្នុងការប្រឡងឲ្យជាប់ គឺតាមរយៈការប្រើបញ្ញា ដោយចូលរួមការប្រឡងប្រជែង តាមការកំណត់របស់គណៈកម្មការប្រឡង ឬសាលារៀននោះឯង ។
ដូច្នេះយើងងាកមកមើលសារជូនពរឆ្នាំថ្មី ឆ្នាំសកលនេះវិញម្តង ដើម្បីឲ្យឆ្នាំ២០២១នេះ សម្រេចគោលដៅរួមរបស់មនុស្សជាតិ គឺលុបបំបាត់កូវីដ១៩ ចេញពីពិភពលោក និយាយជារួម ហើយបើនិយាយដោយឡែក គឺពីកម្ពុជាយើង តោង យើងគ្រប់រូប ត្រូវរួមគ្នាធ្វើស្រុះគ្នា ហើយធ្វើដោយបញ្ញាថែមទៀត ។
នោះគឺប្រជាពលរដ្ឋយើងគ្រប់រូប គ្រាន់តែចូលរួមអនុវត្តតាមការណែនាំរបស់ប្រមុខ រាជរដ្ឋា ភិបាល ពិសសក្រសួងសុខាភិបាល នូវវិធានសុខាភិបាលសាមញ្ញៗ ដើម្បីកុំឲ្យឆ្លងកូវីដ១៩ តាមរយៈការលាងសម្អាតដៃញឹកញាប់ ពាក់ម៉ាស់ និងរក្សាគម្លាតសុវត្ថិភាព បុគ្គលពីម្នាក់ ទៅម្នាក់ ១ម៉ែត្រកន្លះយ៉ាងតិចជាដើម ។ ចៀសវាងការជួបជុំ ដែលមានមនុស្សច្រើន ឬនៅក្នុងបន្ទប់ម៉ាស៊ីនត្រជាក់បិទជិតផងដែរ ។
ក្នុងនោះចំពោះមុខ គឺនៅកម្ពុជាយើងកំពុងរួមគ្នាទប់ស្កាត់ការរីករាលដាលឆ្លងជំងឺកូវីដ១៩ មកពីប្រទេសថៃ ខណៈដែលនៅក្នុងប្រទេសយើងគ្រប់គ្រងបានហើយ លើជំងឺឆ្លងដ៏កាចសាហាវនេះ។ ដូច្នេះប្រជាពលរដ្ឋខ្មែរយើងដែលធ្វើការនិងស្នាក់នៅប្រទេសថៃ គ្រាន់តែបន្តធ្វើការ និងស្នាក់នៅក្នុងប្រទេសថៃតាមការណែនាំរបស់អាជ្ញាធរថៃ ជាការសម្រេច ។ តែបើថា ចាំបាច់ណាស់ ត្រូវវិលត្រឡប់មកកម្ពុជា មកស្រុកកំណើត គឺត្រូវមកតាមច្រកព្រំដែនស្របច្បាប់ណាមួយឆ្លងកាត់ការត្រួតពិនិត្យឯកសារ សុខភាព វិភាគយកសំណាក ទៅរកជំងឺកូវីដ១៩ ព្រមទាំងទៅធ្វើចត្តាឡីស័ក តាមការណែនាំរបស់អាជ្ញាធរសមត្ថកិច្ច ជាការស្រេចទៅហើយ ។
បើមានជនណាម្នាក់លួចគេចឆ្លងដែន ហើយចូលទៅដល់ស្រុកកំណើត នៅតាមបណ្តាខេត្តនានាក៏ប្រជាពលរដ្ឋយើងអ្នករស់នៅក្នុងមូលដ្ឋាននោះ ឬក៏បងប្អូនត្រូវតែរាយ ការណ៍ភ្លាមទៅកាន់អាជ្ញាធរសមត្ថកិច្ច នៅភូមិឃុំយើង ដើម្បីឲ្យពេទ្យចុះទៅពិនិត្យសុខភាពជូនគាត់យកវត្ថុសំណាក និងណែនាំឲ្យគាត់ ធ្វើចត្តាឡីស័កឲ្យបានត្រឹមត្រូវគ្រប់១៤ថ្ងៃ ។
ការធ្វើដូច្នេះ ដើម្បីការពារបុគ្គលចំណូលថ្មីនោះផង និងដើម្បីសុខសុវត្ថិភាពរបស់ក្រុមគ្រួសារ ក៏ដូចជាសុខសុវត្ថិភាពរបស់អ្នកភូមផងរបងជាមួយនោះឯង ព្រោះកុំភ្លេចថា បើសិនជាជន ចំណូលថ្មីនោះ មានផ្ទុកជំងឺកូវីដ១៩ គឺគ្មាននរណាឆ្លងមុនគេ ក្រៅតែពីអ្នកនៅជិតបុគ្គលនោះ ជាក្រុមគ្រួសារគាត់ និងអ្នកជិតខាងនេះឯង ។
ចូរកុំភ្លេចថា រយៈពេល២ថ្ងៃ គឺនៅថ្ងៃទី៣០ និងថ្ងៃទី៣១ ខែធ្នូ ឆ្នាំ២០២០ កម្ពុជាយើងបានពិនិត្យរកឃើញអ្នកឆ្លងជំងឺកូវីដ១៩ ដែលឆ្លងដែនចូលមកពីប្រទេសថៃ តាមព្រំដែន ខេត្តបាត់ដំបង និងខេត្តប៉ៃលិនដល់ទៅ១៤នាក់ហើយ ។
រីឯក្រសួងសុខាភិបាល ក៏ដូចជារាជរដ្ឋាភិបាល និងផ្នែកពាក់ព័ន្ធនៅពេលនេះបានខិតខំទប់ស្កាត់ការឆ្លងរាលដាលពីក្រៅប្រទេសចូលមកកម្ពុជា ដោយតាមផ្លូវអាកាស យើងធ្វើបានល្អ គ្មានរបូតម្នាក់ឡើយ ។ ពោលគឺគ្រាន់តែយន្តហោះចុះចតភ្លាម អ្នកដំណោះទាំងអស់ត្រូវពិនិត្យសុខភាព ធ្វើតេស្តរកកូវីដ១៩ភ្លាម ហើយត្រូវធ្វើចត្តាឡីស័កត្រឹមត្រូវឲ្យគ្រប់១៤ថ្ងៃ ។
ចំណែកនៅតាមព្រំដែនគោក ជាប់ប្រទេសថៃ ក៏ត្រូវបានរឹតបន្តឹងយ៉ាងហ្មត់ចត់ តាមបទបញ្ជាថ្មីចុងក្រោយរបស់សម្តេចតេជោ ហ៊ុន សែន ដោយធ្វើតេស្តរកមេរោគកូវីដ១៩ លើពលករខ្មែរទាំងអស់ ហើយនាំពួកគាត់ទៅធ្វើចត្តាឡីស័ក នៅខេត្តជាប់ព្រំដែននោះតែម្តង ដោយលែងដឹកជញ្ជូនពួកគាត់ ចូលមកធ្វើចត្តាឡីស័កតាមខេត្ត ជាស្រុកកំណើតរបស់ពួកគាត់ទៀតដូចមុនទៀតហើយ ។
ជារួមទៅដើម្បីសម្រេចជោគជ័យ និងគោលដៅអ្វីមួយ ក្រៅតែពីទទួលបានសារជូនពរពីមិត្តភក្តិ សាច់ញាត្តិក្រុមគ្រួសារហើយនោះ តោងបុគ្គលម្នាក់ៗ ត្រូវខិតខំប្រឹងប្រែងបន្ថែមទៀត តាមរយៈការកំណត់គោលដៅច្បាស់លាស់ តាំងចិត្តនឹងធ្វើការងារនោះ ដោយចិត្តមោះមុត និងព្យាបាល ព្រមទាំងធ្វើដោយបញ្ញាស្មារតីទទួលខុសត្រូវផង នោះច្បាស់ណាស់ថា លទ្ធផលនឹងបានដូចប្រាថ្នាជាមិនខាន ៕ អត្ថបទដោយ៖ មុត ស្រីពៅ
ចែករំលែកព័តមាននេះ