ខេត្តបន្ទាយមានជ័យ ៖ ចិញ្ចឹមបង្កងទឹកសាបរាប់រាយក្បាលបានក្លាយជាកសិដ្ឋានចិញ្ចឹមបង្កងដែលត្រូវបានការគាំទ្រកោតសសើរពីមន្ត្រីជំនាញដែលស្ថិតភូមិថ្មី សង្កាត់ភ្នៀត ក្រុងសិរីសោភ័ណ ។
លោក លី រតនៈ ហៅបារាំង ដែលជាម្ចាស់កសិដ្ឋានចិញ្ចឹមបង្កងបានប្រាប់នៅថ្ងៃទី៣១ ខែធ្នូ ឆ្នាំ២០២០ថា មុខរបបចិញ្ចឹមបង្កងមានការរីកចម្រើន និងមានការគាំទ្រពីមន្ទីកសិកម្មរុក្ខាប្រម៉ាញ់ និងនេសាទខេត្តបន្ទាយមានជ័យ ដែលត្រូវបានចិញ្ចឹមជាងពេល១ឆ្នាំមកហើយដែលចិញ្ចឹមដំបូង គឺក្រោយទិញពូជបង្កងពីខេត្តបាត់ដំបងចំ នួន៥០០ក្បាល ហើយត្រូវបានធ្វើអាងសិម្បនិមិត្តនៅផ្ទះ ហើយដោយចិញ្ចឹមបានពូជច្រើនហើយ ត្រូវរៀបចំជាកសិដ្ឋានចិញ្ចឹមបង្កង ។
លោកបានបញ្ជាក់ថា ក្រោយពេលបង្កើតកសិដ្ឋានចិញ្ចឹមបង្កងដោយមានការគាំទ្រពីមន្ទីរជំនាញបានជីកស្រះចំនួន៥ស្រះ ដែលមានទទឹង១០ម៉ែត្រ បណ្តោយ២៥ម៉ែត្រ ជម្រៅ២ម៉ែត្រ និងធ្វើអាងសិម្បនិមិត្តមានអាងបេតុង និងអាងកៅស៊ូ ដែលសម្រាប់បង្កាត់ពូជ និងភ្ញាស់កូនសម្រាប់លក់ ។
លោក លី រតនៈ ហៅបារាំង បានបញ្ជាក់ថា ការចិញ្ចឹមបង្កងរហូតពេលនេះ មានការរីកចម្រើន ដោយមានការគាំទ្រពីមហាជនដែលចាប់អារម្មណ៍ទិញទៅចិញ្ចឹមបន្តមានច្រើនដែលលក់ជូនបង្កងដែលពោងស្រាប់ លក់១ក្បាលតំលៃ៣ម៉ឺនរៀល បង្កងបង្កាត់ពូជដែលពេញវ័យញីឈ្មោល១គូតំលៃ២ម៉ឺនរៀល និងកូនបង្កងដែលមានអាយុ៤០ថ្ងៃ ១ក្បាល១.៥០០រៀល ហើយត្រូវណែនាំរបៀបការចិញ្ចឹមឲ្យចេះ ពេលនេះកំពុងចិញ្ចឹមបង្កាត់ពូជ បង្កងលក់ តែពេលខាងមុខ និងពង្រីកស្រះសម្រាប់ចិញ្ចឹមធ្វើម្ហូប ។
លោក ប៉ាង វណ្ណាសេដ្ឋ ប្រធានមន្ទីកសិកម្មរុក្ខាប្រម៉ាញ់ និងនេសាទខេត្តបន្ទាយមានជ័យបានកោតសសើរចំពោះលោក លី រតនៈ ហៅបារាំង ដែលជាម្ចាស់កសិដ្ឋានចិញ្ចឹមបង្កងក្រុងសិរីសោភ័ណ ដែលចិញ្ចឹមបង្កងមានការរីកចម្រើនច្រើនរយៈពេលការចិញ្ចឹមជាង១ឆ្នាំអាចពង្រីកជាកសិដ្ឋានចិញ្ចឹមបង្កងសម្រាប់បង្កាត់ពូជលក់ ហើយមន្ត្រីជំនាញបានសហការជាមួយ ដើម្បីណែនាំនៃការចិញ្ចឹមទទួលបានផលគួរកោតសសើរ ៕
ចែករំលែកព័តមាននេះ