ខេត្តសៀមរាប ៖ ថ្ងៃបុណ្យឆ្លងឆ្នាំសកល ២០២០ -ចូល២០២១ ភ្ញៀវទេសចរជាតិ-អន្តរជាតិនៅខេត្តខេត្តសៀមរាប មកកម្សាន្តប្រមាណជាង ២៥,០០០នាក់, ធ្លាក់ចុះជាង៨៥% បើធៀបទៅនឹងឆ្នាំមុន…
ខេត្តសៀមរាប ៖ ថ្ងៃបុណ្យឆ្លងឆ្នាំសកល ២០២០ -ចូល២០២១ ភ្ញៀវទេសចរជាតិ-អន្តរជាតិនៅខេត្តខេត្តសៀមរាប មកកម្សាន្តប្រមាណជាង ២៥,០០០នាក់, ធ្លាក់ចុះជាង៨៥% បើធៀបទៅនឹងឆ្នាំមុន ។ មជ្ឈដ្ឋានទូទៅវាយតម្លៃថា ស្ថានភាពបែបនេះវាបានបង្ហាញអំពីការប្រុងប្រយ័ត្នទប់ស្កាត់ការរីករាលដាលនៃវារុសកូវីដ-១៩ ។
របាយការណ៍របស់មន្ទីរទេសចរណ៍ខេត្តសៀមរាប បានឲ្យដឹងថា ថ្ងៃបុណ្យឆ្លងឆ្នាំសកលឆ្នាំមុន ( ឆ្នាំ២០១៩ ចូលឆ្នាំ ២០២០ ) មានចំនួនភ្ញៀវទេសចរ សរុបប្រមាណជិត៣០ម៉ឺននាក់ បានចូលមកកំសាន្តក្នុងតំបន់ទេសចរណ៍សៀមរាប-អង្គរ ក៏ប៉ុន្តែសម្រាប់បុណ្យចូលឆ្នាំសកល ឆ្នាំ២០២០ ឆ្លងចូល ឆ្នាំ២០២១ ភ្ញៀវទេសចរជាតិ និងអន្តរជាតិចូលកម្សាន្តក្នុងខេត្តនេះ មានចំនួនតែជាង ២៥ ០០០នាក់ប៉ុណ្ណោះ គឺធ្លាក់ចុះជាង ៨៥% ក្នុងនេះភ្ញៀវទេសចរបរទេសមានចំនួន២០៤នាក់ ថយចុះជិត៩៩% ភ្ញៀវទេសចរជាតិមានចំនួន ២៥,០០០នាក់ ថយចុះជិត៩១% ក្នុងនោះដែរ មានភ្ញៀវទៅទស្សនាក្នុងតំបន់អង្គរចំនួនប្រមាណជា ២០,០០០ នាក់ ទស្សនាតាមតំបន់សហគមន៍ទេសចរណ៍ និងភ្នំគូលែន មានចំនួនប្រមាណជា ៥,០០០ នាក់ ។
យ៉ាងណាក៏ដោយ ក្នុងរយ:ពេលប៉ុន្មានថ្ងៃមុននេះ អាជ្ញាធរខេត្តសៀមរាបមិនមានការហាមឃាត់ឲ្យបណ្តាអាជីវកម្មរបស់សេវាករទេសចរណ៍បិទផ្អាកអាជីវកម្មរបស់ខ្លួននោះឡើយ ក៏ប៉ុន្តែត្រូវបានជម្រុញឲ្យមានការប្រុងប្រយ័ត្នខ្ពស់ អនុវត្តតាមគោលវិធានសុវត្ថិភាព ៣ការពារ ( ពាក់ម៉ាស អនាម័យ និងការរក្សាគម្លាតសុត្ថិភាព ) ឲ្យបានល្អបំផុត ។
មជ្ឈដ្ឋានជាទូទៅបានវាយតម្លៃថា ការធ្លាក់ចុះខ្លាំងនៃភ្ញៀវទេសចរនៅខេត្តសៀមរាប ក្នុងឱកាសបុណ្យឆ្លងឆ្នាំសាកលឆ្នាំនេះ ដោយសារតែវាស្ថិតក្នុងបរិបទនៃការប្រយុទ្ធប្រឆាំងជម្ងឺកូវីដ-១៩ ៕
ចែករំលែកព័តមាននេះ