ស្ថានភាពជំងឺកូវីដ១៩ នៅកម្ពុជាកាន់តែល្អប្រសើរទៅៗ ពីមួយថ្ងៃទៅមួយថ្ងៃ ។ ក្នុងនោះកម្ពុជាគ្រប់គ្រង និងទប់ស្កាត់បានទាំងស្រុងលើការឆ្លងចូលសហគមន៍ តាមរយៈព្រឹត្តិការណ៍ថ្ងៃ ២៨ វិច្ឆិកា រួមទាំងការរាលដាលពីប្រទេសថៃ…
ស្ថានភាពជំងឺកូវីដ១៩ នៅកម្ពុជាកាន់តែល្អប្រសើរទៅៗ ពីមួយថ្ងៃទៅមួយថ្ងៃ ។ ក្នុងនោះកម្ពុជាគ្រប់គ្រង និងទប់ស្កាត់បានទាំងស្រុងលើការឆ្លងចូលសហគមន៍ តាមរយៈព្រឹត្តិការណ៍ថ្ងៃ ២៨ វិច្ឆិកា រួមទាំងការរាលដាលពីប្រទេសថៃ ក៏ដូចជាការនាំចូលពីក្រៅប្រទេសក៏កម្ពុជា ចាត់វិធានការត្រួតពិនិត្យ ទប់ស្កាត់បានដែរ ។ ប៉ុន្តែស្ថានភាពដូច្នេះមិនមានន័យថា កម្ពុជាអស់កូវីដនោះទេ ។
នៅព្រឹកថ្ងៃទី៣០ ខែធ្នូ ឆ្នាំ២០២០ ក្រសួងសុខាភិបាល បានប្រកាសថា មានអ្នកជាសះស្បើយម្នាក់ទៀត ពីជំងឺកូវីឌ១៩ ដែលជាអ្នកពាក់ព័ន្ធនឹងព្រឹត្តិការណ៍សហគមន៍ ២៨ វិច្ឆិកា ។ នោះគឺបុរសជនជាតិខ្មែរ អាយុ៣៧ឆ្នាំ មានអាសយដ្ឋានស្នាក់នៅសង្កាត់បឹងកក់២ ខណ្ឌទួលគោក រាជធានីភ្នំពេញបានទៅហាង Zando សាខាបឹងកេងកង កាលពីយប់ថ្ងៃទី២៨ ខែវិច្ឆិកា ឆ្នាំ២០២០ ។
ក្រសួងសុខាភិបាល ក៏បានប្រកាសថា កាលពីថ្ងៃទី២៩ ខែធ្នូ ឆ្នាំ២០២០ មិនមានករណីវិជ្ជមានវីរុសកូវីដ១៩ថ្មីទេ ។ ជាសរុបនៅទូទាំងប្រទេស រកឃើញអ្នកឆ្លងជំងឺកូវីដ១៩ ចំនួន៣៦៤នាក់ ។ ក្នុងនោះ៣៦១នាក់ ត្រូវបានព្យាបាលជាសះស្បើយ និង៣នាក់ កំពុងសម្រាកព្យាបាលនៅមន្ទីរពេទ្យ ។ ក្នុងនោះពាក់ព័ន្ធនឹងព្រឹត្តិការណ៍សហគមន៍២៨វិច្ឆិកា គឺមានអ្នកឆ្លងសរុប៤១នាក់ ប៉ុន្តែមកដល់ព្រឹកថ្ងៃទី៣០ ខែធ្នូ ឆ្នាំ២០២០នេះ មានអ្នកជាសះស្បើយ ៣៩នាក់ហើយ។ ពោលគឺគិតមកដល់ថ្ងៃទី៣០ ខែធ្នូ កម្ពុជានៅសល់អ្នកជំងឺកូវីដតែ៣នាក់ប៉ុណ្ណោះ ។
យ៉ាងនេះក្តី កាលពីសប្តាហ៍មុន សារព័ត៌មានវៀតណាមបានរាយការណ៍ មានបុរសវៀតណាមម្នាក់រកឃើញកើតជំងឺកូវីដ១៩ ក្រោយពីបុរសវៀតណាមនោះ បានធ្វើដំណើរពីភូមាកាត់តាមប្រទេសថៃ ហើយឆ្លងដែនចូលកម្ពុជា និងចេញពីកម្ពុជាចូលទៅប្រទេសវៀតណាមដោយខុសច្បាប់ ពោលគឺចូលតាមច្រករបៀង ។
ដំណឹងនេះ កើតឡើងខណៈដែលកម្ពុជា កំពុងពង្រឹងការរឹតបន្តឹងការត្រួតពិនិត្យតាមព្រំដែនគោករវាងកម្ពុជា និងថៃ ក្នុងពេលថៃឆ្លងរាលដាលជំងឺកូវីដ១៩ នៅសហគមន៍យ៉ាងខ្លាំង ។ ក្រសួងសុខាភិបាលកម្ពុជា បានច្រានចោលនូវការចុះផ្សាយរបស់វៀតណាមនោះ ហើយថា កម្ពុជា មិនមានបុរសវៀតណាម ដែលរកឃើញកើតជំងឺកូវីដ ឆ្លងកាត់កម្ពុជាឡើយ ។
មកដល់ដើមសប្តាហ៍នេះ បុរសវៀតណាមនោះ ក៏បានចម្លងជំងឺកូវីដ១៩ ទៅជនជាតិវៀតណាម៣នាក់ទៀត ។ ដូច្នេះហើយ បានជាមន្ត្រីសុខាភិបាលយើងបានណែនាំបន្ទាន់មួយទៅកាន់អាជ្ញាធរខេត្តជាប់ព្រំដែន ពិសេសមន្ទីរសុខាភិបាល តាមបណ្តាខេត្តទាំងនោះ ត្រូវតែពង្រឹងនូវការរឹតបន្តឹងការឆ្លងដែន ពិសេសនៅតាមច្រករបៀងនានាឲ្យបានតឹងរឹងបំផុត ។
មួយថ្ងៃៗ មន្ត្រីសមត្ថកិច្ចយើងខំប្រឹងត្រួតពិនិត្យយកសំណាកវិភាគផង រាប់រយនាក់លើអ្នកឆ្លងដែន តាមព្រំដែននានា ប៉ុន្តែបើរបូតនៅតាមច្រករបៀង ហើយករណីជនជាតិវៀតណាមនោះ រហូតដល់ឆ្លងកាត់ប្រទេសយើង ទៅចេញដល់វៀតណាម ហើយបើសិនជាការឆ្លងដែនរបស់បុរសវៀតណាម ដែលទើបរកឃើញកើតកូវីដនោះពិតមែន គឺជាគ្រោះថ្នាក់ដ៏ធ្ងន់ធ្ងរសម្រាប់កម្ពុជាយើង ។
ដូច្នេះ នៅពេលនេះ មានការប្រឹងប្រែងរួមគ្នាបន្តទៀត ព្រោះកម្ពុជាបានទប់ស្កាត់ដោយជោគជ័យហើយ រយៈពេលជាង ១អាទិត្យមកនេះ នៅព្រំដែនថៃ ដោយត្រួតពិនិត្យសុខភាពអ្នកឆ្លងដែន ធ្វើវិភាគរកសំណាក និងនាំទៅធ្វើចត្តាឡីស័កយ៉ាងត្រឹមត្រូវនៅព្រំដែននោះ ហើយមានខេត្តខ្លះ ក៏ដឹកជញ្ជូនតាមរថយន្តយោធាយកពលរដ្ឋខ្មែរ ដែលឆ្លងដែននោះ ទៅធ្វើចត្តាឡីស័ក នៅតាមកន្លែងរៀបចំ តាមបណ្តាខេត្តទាំងនោះផងដែរ។
មកដល់ពេលនេះ ពលករខ្មែរវិលត្រឡប់មកពីថៃទាំងអស់ មិនមានរកឃើញកើតជំងឺកូវីដ១៩ទេ ហើយបើទោះបីជាមានអ្នករបូត ទៅដល់ផ្ទះនៅស្រុកភូមិ ក៏អាជ្ញាធរសមត្ថកិច្ច តាមទៅដល់ផ្ទះអប់រំណែនាំឲ្យធ្វើចត្តាឡីស័ក ១៤ថ្ងៃ ឲ្យបានត្រឹមត្រូវ ព្រមទាំងយកសំណាកវិភាគរកមេរោគកូវីដ១៩ផងដែរ ។មានតែការចូលរួមសហការទាំងអស់គ្នាទេ ទើបកម្ពុជាយើងអាចបន្តឆ្លងកាត់ និងយកឈ្នះសមរភូមិកូវីដបន្តទៀត ។ ក្នុងនោះពលរដ្ឋខ្មែរយើងម្នាក់ត្រូវម្ចាស់ការ និងចូលរួមសហការ ពិសេសអ្នកមកពីក្រៅប្រទេសនិយាយឲ្យចំប្រទេសថៃត្រូវឲ្យពេទ្យត្រួតពិនិត្យសុខភាព ធ្វើតេស្ត និងធ្វើចត្តាឡីស័ក ។
មិនយូរទេ ១៤ថ្ងៃ ដើម្បីភាពសុខសាន្តទាំងខ្លួនឯងផង ទាំងក្រុមគ្រួសារផង និងទាំងប្រទេសជាតិយើងផង។ អំឡុងធ្វើចត្តាឡីស័កនេះ ក្រៅតែពីមិនចំណាយលុយអ្វីហើយពលករក្រីក្រយើងដែលឆ្លងដែនមកពីថៃ ក៏នៅទទួលបានលុយឧបត្ថម្ភរបស់រាជរដ្ឋាភិបាល៣០ម៉ឺនរៀល ក្នុង១គ្រួសារថែមទៀតផង ៕ អត្ថបទដោយ៖ មុត ស្រីពៅ
ចែករំលែកព័តមាននេះ