រាជធានីភ្នំពេញ ៖ មកទល់ពេលនេះ វ៉ាក់សាំងកូវីដ-១៩ កាន់តែត្រូវបានមហាជនទន្ទឹងរង់ចាំស្របពេលដែលរាជរដ្ឋាភិបាលកម្ពុជាក៏ត្រៀមកញ្ចប់ថវិកាមួយចំនួនដើម្បីទិញយកមកចាក់ជូនពលរដ្ឋដោយឥតគិតថ្លៃ ក្នុងជំហានដំបូង ។ ក្នុងចំណោមពលរដ្ឋជាអាទិភាព ដែលត្រូវទទួលការចាក់វ៉ាក់សាំងការពារជំងឺកូវីដ-១៩នោះ កីឡាករ-កីឡាការិនីឆ្នើមៗ…
រាជធានីភ្នំពេញ ៖ មកទល់ពេលនេះ វ៉ាក់សាំងកូវីដ-១៩ កាន់តែត្រូវបានមហាជនទន្ទឹងរង់ចាំស្របពេលដែលរាជរដ្ឋាភិបាលកម្ពុជាក៏ត្រៀមកញ្ចប់ថវិកាមួយចំនួនដើម្បីទិញយកមកចាក់ជូនពលរដ្ឋដោយឥតគិតថ្លៃ ក្នុងជំហានដំបូង ។ ក្នុងចំណោមពលរដ្ឋជាអាទិភាព ដែលត្រូវទទួលការចាក់វ៉ាក់សាំងការពារជំងឺកូវីដ-១៩នោះ កីឡាករ-កីឡាការិនីឆ្នើមៗ ស្ថិតក្នុងជួរកីឡាករ-កីឡាការិនីមានសក្ដានុពលនៅក្នុងវិស័យកីឡា នឹងទទួលបានវ៉ាក់សាំងនេះមុនគេក្នុងចំណោមកីឡាករ-កីឡាការិនី និងមន្ត្រីកីឡារាប់រយនាក់ផ្សេងទៀតនោះ។
ការទទួលបានវ៉ាក់សាំងកូវីដ-១៩មុនគេនេះ គឺដោយសារតែសមាសភាពកីឡាករ-កីឡាការិនីទាំងនោះសុទ្ធតែចាំបាច់ព្រោះត្រូវប្រើពេលហ្វឹកហាត់ និង ទទួលភារកិច្ចជាច្រើនទៀត ដើម្បីកីឡា និងដើម្បីជាតិ។
លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា នៅតែបន្តថ្លែងបញ្ជាក់ថា វ៉ាក់សាំងកូវីដ-១៩ដែលមកដល់កម្ពុជា នឹងផ្ដល់ឱកាសឱ្យកីឡាករ-កីឡាការិនីដែលជាសមាសភាពឆ្នើមៗ និងជាអត្តពលិកជួរមុខឱ្យទទួលបានការការពារមុខគេ ដោយសារតែកីឡាករ និងកីឡាការិនីទាំងនេះ គឺជាកម្លាំងស្នូលនៅក្នុងវិស័យកីឡា ដែលចាំបាច់ត្រូវតែទទួលការការពារពីកូវីដ-១៩។
លោកថា សម្តេចតេជោនាយករដ្ឋមន្ត្រី ហ៊ុន សែន បានផ្តល់អាទិភាពដល់កីឡាករ កីឡាការិនីជម្រើសជាតិ ក្នុងការទទួលបានការចាក់វ៉ាក់សាំងការពារជំងឺកូ វីដ-១៩ ហើយការការពារនោះ ក៏នឹងផ្ដល់អាទិភាពដល់គ្រូបង្វឹក និងមន្ត្រីសំខាន់ៗផងដែរ ។ លោកបន្តថា សម្តេច យល់ថា កីឡាករឆ្នើមៗគឺជាក្រុមមនុស្ស ដែលប្រឈមខ្លាំងក្នុងការឆ្លងជំងឺរាតត្បាតមួយនេះ ដ្បិតពួកគេត្រូវហ្វឹកហាត់ជុំគ្នា និងចេញទៅប្រកួតនៅក្រៅប្រទេសជាដើម ដូច្នេះគឺច្បាស់ណាស់ថា បើពួកគេមិនទទួលបានការពារ ឬបើប្រហែសបណ្ដាលឱ្យឆ្លង គឺប្រាកដជារាលដាលនៅក្នុងសហគមន៍ ហើយប៉ះពាល់ខ្លាំងនោះផងដោយសារតែសមាសភាពតំណាងជាតិទាំងនោះ សុទ្ធតែចាំបាច់ក្នុងការហ្វឹកហាត់ ឬត្រូវធ្វើការជាក្រុម។
លោក វ៉ា ត់ ចំរើន បានបន្តប្រាប់អ្នកសារព័ត៌មាន និងប្រកាសប្រាប់កីឡាករជារឿយៗថា វ៉ាក់សាំងដំបូងរបស់កម្ពុជា ត្រូវតែផ្ដល់ឱ្យកីឡាករ-កីឡាការិនី ដោយសារតែសមាសភាពដែលជាជម្រើសជាតិទាំងនោះ គឺចាំបាច់ត្រូវតែទទួលការការពារដោយចៀសមិនផុត ។ លោកថា វាជាវ៉ាក់សាំងរបស់រាជរដ្ឋាភិបាល ហើយជាគោលការណ៍ គឺសម្តេច ផ្តល់អាទិភាព ( ចាក់វ៉ាក់សាំង ) ដល់កីឡាករ ដោយសារ កីឡាករ-កីឡាការិនីជម្រើសជាតិ ប្រឈមជាងគេពីការចម្លងកូវីដ-១៩។
ការលើកឡើងដដែលជាដដែលរបស់ថ្នាក់ដឹកនាំគណៈកម្មាធិការជាតិអូឡាំពិកកម្ពុជា បានជួយឱ្យកីឡាករ-កីឡាការិនី មានអារម្មណ៍កក់ក្តៅយ៉ាងខ្លាំង ជាពិសេសក្នុងពេលដែលពួកគេក៏ត្រូវការការហ្វឹកហាត់ ដើម្បីត្រៀមខ្លួនចូលរួមប្រកួតអន្តរជាតិផ្សេងៗ ។ ការផ្ដល់អាទិភាពនេះ ក៏មានន័យថា នឹងជួយឱ្យកីឡាករជួរមុខទាំងនោះ ត្រូវបានបង្ការទាំង ការហ្វឹកហាត់ក្នុងស្រុក និងការប្រកួតក្រៅស្រុក និងទាំងប្រកួតកីឡាអូឡាំពិកនៅឆ្នាំក្រោយផងដែរ ដែលសុទ្ធតែចាំបាច់សម្រាប់កីឡាករជម្រើសជាតិនោះ ។ ម្នាក់ៗលើកឡើងថា ការផ្ដល់វ៉ាក់សាំងដល់ពួកគេ គឺជារឿងចាំបាច់ណាស់ ដោយសារតែកីឡាករជួរមុខ គឺត្រូវការសុខភាពល្អ ដោយសូម្បីតែមិនទាន់គិតរឿងកើតជំងឺហើយត្រូវចម្លងគេផង ។
ម្យ៉ាងក៏ដើម្បីឱ្យពួកគេអាចមានពេលហ្វឹកហាត់គ្រប់គ្រាន់ និងប្រមូលផ្តុំហ្វឹកហាត់ជាប់លាប់ ដោយមិនចាំបាច់រំសាយការប្រមូលផ្តុំដូចឆ្នាំនេះ ។
លោក វ៉ាត់ ចំរើនបន្តថា កីឡាករជម្រើសជាតិ ត្រូវការការហ្វឹកហាត់ ចុះបើខ្លួនគេមិនប្រាកដថានឹងមានសុខភាពល្អផង តើកីឡាករណានឹងមានទំនុកចិត្តសម្រាប់ការប្រកួត ។ បើកីឡាករទាំងនោះ កើតមានបព្ហា គឺមិនខុសពីធ្វើឱ្យពួកគេពិបាកហ្វឹកហាត់ និងមិនហ៊ានចេញក្រៅនោះទេ ។ តាមការប្រកាស នៅឆ្នាំក្រោយ កីឡាករកម្ពុជាត្រូវមានការប្រកួតច្រើនទៀតដូចជាការប្រកួតអូឡាំពិកជាដើម។
គួរបញ្ជាក់ផងដែរ ដោយសារតែបញ្ហាកូវីដ-១៩ ទើបធ្វើឱ្យក្រុមកីឡាករជម្រើសជាតិ ត្រូវបានរំសាយការប្រមូលផ្តុំហ្វឹកហាត់ជាច្រើនលើក ។
បញ្ហានេះបានធ្វើឲ្យប៉ះពាល់ដល់ការអភិវឌ្ឍបច្ចេកទេស និងសមត្ថភាពកីឡាករ ក្នុងការត្រៀមចូលរួមប្រកួត នានា ជាពិសេស ការប្រកួតកីឡាស៊ីហ្គេមនៅវៀតណាម ឆ្នាំ ២០២១ និងស៊ីហ្គេម ឆ្នាំ២០២៣ នៅកម្ពុជា ។ ព្រោះ ការរាតត្បាតនៃជំងឺកូវីដ-១៩នេះ បានធ្វើឲ្យកម្ពុជាពន្យារពេលជាច្រើនលើកច្រើនសា ក្នុងការបញ្ជូនកីឡាករ កីឡាការិនីទៅហ្វឹកហាត់នៅក្រៅប្រទេស ៕
ចែករំលែកព័តមាននេះ