ខេត្តបន្ទាយមានជ័យ ៖ បុរសចំណាស់វ័យជិត៦០ឆ្នាំម្នាក់ដែលពីអតីតជាអ្នករត់រ៉ឺម៉កម៉ូតូកង់បីនៅច្រកទ្វារអន្តរជាតិប៉ោយប៉ែត ពេលនេះបានផ្លាស់ប្តូរអាជីពទៅជាអ្នកដើរស៊ីឈ្នួលសំលៀងកាំបិត ព្រោះតែជីវភាពក្នុងគ្រួសាក្រីក្រ ពិសេសដោយសារផ្ទុះជំងឺកូវីដ១៩ ហើយត្រូវថៃបិទព្រំដែន។ បុរសខាងលើឈ្មោះវង្ស សារ៉េតឌី អាយុ៥៧ឆ្នាំ…
ខេត្តបន្ទាយមានជ័យ ៖ បុរសចំណាស់វ័យជិត៦០ឆ្នាំម្នាក់ដែលពីអតីតជាអ្នករត់រ៉ឺម៉កម៉ូតូកង់បីនៅច្រកទ្វារអន្តរជាតិប៉ោយប៉ែត ពេលនេះបានផ្លាស់ប្តូរអាជីពទៅជាអ្នកដើរស៊ីឈ្នួលសំលៀងកាំបិត ព្រោះតែជីវភាពក្នុងគ្រួសាក្រីក្រ ពិសេសដោយសារផ្ទុះជំងឺកូវីដ១៩ ហើយត្រូវថៃបិទព្រំដែន។
បុរសខាងលើឈ្មោះវង្ស សារ៉េតឌី អាយុ៥៧ឆ្នាំ មានប្រពន្ធឈ្មោះណុបមឿន បច្ចុប្បន្នរស់នៅផ្ទះជួល ក្នុងភូមិក្បាលស្ពាន២ សង្កាត់ប៉ោយប៉ែត ក្រុងប៉ោយប៉ែត ។
ស្មាលីឧប្បករណ៍សំលៀងកាំបិត ដៃម្ខាងយួរធុងទឹកតូចមួយ បុរសខាងលើបានរៀបរាប់ថាមុនផ្ទុះជំងឺកូវីដ គាត់មានអាជីពជាអ្នករត់រ៉ឺម៉កម៉ូតូកង់បីនៅច្រកទ្វារអន្តរជាតិប៉ោយប៉ែតអាចរកចំណូលដោះស្រាយផ្ទះជួលនិងចិញ្ចឹមក្រុមគ្រួសារបាន។
បុរសខាងលើបានបន្តថា លុះនៅពេលថៃបិទព្រំដែនដោយសារផ្ទុះមេរោគកូវីដ មុខរបររត់រ៉ឺម៉កម៉ូតូកង់បីរបស់គាត់ហាក់មិនសូវកាក់កប ពោលគឺរកលែងចង់បាន ព្រោះតែតាមដងផ្លូវហាក់ស្ងាត់គ្មានអ្នកជិះ ។ ទីបំផុតសូម្បីរ៉ឺម៉កម៉ូតូកង់បីក៏ខូច រកប្រាក់ជួសជុលមិនបាន ធ្វើឲ្យគាត់បង្ខំចិត្តទុកចោលមួយរយៈ ហើយប្តូរអាជីពជាអ្នកដើរស៊ីឈ្នួលសំលៀងកាំបិតវិញ ព្រោះចំណាយត្រឹមតែកំលាំងមិនចំណាយប្រាក់។
បុរសខាងលើបានបន្តទៀតថា ក្នុង១ថ្ងៃគាត់អាចរកប្រាក់បានពី២ទៅ៣ម៉ឺនរៀលដែរ ប៉ុន្តែមិនសូវមានអ្នកជួលសំលៀងកំបិតប៉ុន្មានទេ ព្រោះពេលនេះជាសម័យកូវីដ គ្រប់គ្នារកប្រាក់មិនសូវបាន ។
នៅពេលសាកសួរពីប័ណ្ណក្រីក្រ ដើម្បីទទួលបានប្រាក់ឧបត្ថម្ភពីរាជរដ្ឋាភិបាលតាមរយៈអាជ្ញាធរ បុរសខាងលើអះអាងថា គាត់មិនដែលបានទទួលទេ ។ ជុំវិញករណីនេះ កោះសន្តិភាពមិនអាចទាក់ទងសុំការបំភ្លឺពីអាជ្ញាធរភូមិក្បាលស្ពាន២បានទេ ព្រោះមិនស្គាល់លេខទូរស័ព្ទ៕ (កែសម្រួលដោយ ៖ ធីតា)
ចែករំលែកព័តមាននេះ