ខេត្តបាត់ដំបង ៖ តំបន់អេកូទេចរណ៍បែបធម្មជាតិចំនួន០៤កន្លែងនៅក្នុងខេត្តបាត់ដំបង បាននិងកំពុងឆក់យកបេះដូងអ្នកទេសចរ ដែលនិយមបោះតង់សម្រាកលំហែកាយឱ្យចាប់អារម្មណ៍បំផុតពីតាមបណ្ដាខេត្-រាជធានី ស្ទើរទូទាំងប្រទេស ។ ជាពិសេស «ទឹកធ្លាក់អូរជាំ» ដែលហូរធ្លាក់ពីតាមជ្រលងភ្នំ…
ខេត្តបាត់ដំបង ៖ តំបន់អេកូទេចរណ៍បែបធម្មជាតិចំនួន០៤កន្លែងនៅក្នុងខេត្តបាត់ដំបង បាននិងកំពុងឆក់យកបេះដូងអ្នកទេសចរ ដែលនិយមបោះតង់សម្រាកលំហែកាយឱ្យចាប់អារម្មណ៍បំផុតពីតាមបណ្ដាខេត្-រាជធានី ស្ទើរទូទាំងប្រទេស ។ ជាពិសេស «ទឹកធ្លាក់អូរជាំ» ដែលហូរធ្លាក់ពីតាមជ្រលងភ្នំ នៃតំបន់ការពារធម្មជាតិជួរភ្នំសំកុស ស្ថិតក្នុងភូមិសាស្ត្រ ឃុំកំពង់ល្ពៅ ស្រុកសំឡូត តែម្ដង។ នេះបើតាមអំណះអំណាងរបស់លោក អ៊ុច អ៊ុំភីនីស្សារ៉ា ប្រធានមន្ទីរទេសចរណ៍ខេត្តបាត់ដំបង។
លោក អ៊ុច អ៊ុំភីនីស្សារ៉ា បានបង្ហាញថា បាត់ដំបងជាខេត្តដែលមានវ័យចំណាស់បំផុតមួយ ក្នុងចំណោម២៤ខេត្ត រាជធានី នៃប្រទេសកម្ពុជា។ ខេត្តបុរាណមួយនេះ សំបូរទៅដោយតំបន់ទេសចរណ៍បែបវប្បធម៌ ប្រាសាទបុរាណ រមណីយដ្ឋានប្រវត្តិសាស្ត្រ និង រមណីយដ្ឋានបែបធម្មជាតិ ។ ប៉ុន្តែក្នុងចំណោមតំបន់ទេសចរណ៍ទាំងអស់នៅក្នុងខេត្តបាត់ដំបង បច្ចុប្បន្ន មានតំបន់អេកូទេចរណ៍បែបធម្មជាតិចំនួន០៤កន្លែង បាននិងកំពុងឆក់យកបេះដូងភ្ញៀវទេចរយ៉ាងខ្លាំង។ ជាពិសេស អ្នកទេសចរដែលនិយមធ្វើដំណើរផ្សងព្រេង បោះតង់ សម្រាកលំហែកាយស្រូបយកខ្យល់អាកាសបរិសុទ្ធតែម្ដង។
តំបន់ទេសចរណ៍ធម្មជាតិទាំង០៤កន្លែង ដែលលោកប្រធានមន្ទីរទេសចរណ៍បានពិព័រនាថា មានលក្ខណៈស្រស់បំព្រងគ្រប់រដូវកាល និងមានសក្ដានុពលបំផុតសម្រាប់អ្នកទេសចរផ្សងព្រេងបោះតង់លំហែកាយគយគន់ធម្មជាតិ ព្រៃភ្នំ និង ងូតទឹកធ្លាក់ដ៏ត្រជាក់កាយ៉ានោះ មានដូចជា៖ តំបន់ទេសចរណ៍ធម្មជាតិ «ទឹកធ្លាក់អូរជាំ» តំបន់ទេសចរណ៍ធម្មជាតិ «ទឹកធ្លាក់ចំការស្វាយ» តំបន់ទេសចរណ៍ធម្មជាតិ «វាលចម្បាំង ខេមសាយ» ដែលទើបរៀបចំថ្មី រមណីយដ្ឋានទាំង០៣នេះ ស្ថិតនៅក្នុងស្រុកសំឡូត និង តំបន់ទេសចរណ៍ធ្មជាតិ «ទឹកធ្លាក់ភ្នំ៥៣» នៅស្រុកភ្នំព្រឹក ជាប់ព្រំដែនប្រទេសថៃ។ ប៉ុន្តែលោកបានចាត់ទុក «ទឹកធ្លាក់អូរជាំ» ជាសហគមន៍អេកូទេសចរណ៍ដ៏មានសក្កានុពលបំផុត ដែលកំពុងទាក់ទាញបេះដូងភ្ញៀវទេសចរខ្លាំងជាងគេ ក្នុងចំណោមរមណីយដ្ឋានធម្មជាតិទាំង០៤ខាងលើនេះ ។
«ទឹកធ្លាក់អូរជាំ» ស្ថិតក្នុងភូមិសាស្ត្រ ភូមិអូរជាំលើ ឃុំកំពង់ល្ពៅ ស្រុកសំឡូត ដែលមានចម្ងាយផ្លូវប្រមាណ៩៩គ.ម ពីទីរួមខេត្តបាត់ដំបង ឆ្ពោះទៅដល់ទីនោះ ។ បច្ចុប្បន្នរមណីយដ្ឋានធម្មជាតិដ៏ពេញនិយមមួយនេះ ត្រូវបានគ្រប់គ្រងដោយ «សហគមន៍អេកូទេសចរណ៏អូរជាំ» ដែលមានការគាំទ្រ និង ជម្រុញឲ្យមានគម្រោងអភិវឌ្ឍន៏នានានៅតំបន់នេះ ដោយអាជ្ញាធរខេត្ត និង មន្ទីរទេសចរណ៍ រួមទាំងស្ថាប័នពាក់ព័ន្ធមួយចំនួនផង។
ពិតមែនតែសព្វថ្ងៃនេះ រមណីយដ្ឋាន«ទឹកធ្លាក់អូរជាំ» មិនទាន់មានការអភិវឌ្ឍន៍ឲ្យបានល្អប្រសើរក្ដី តែសម្រស់ធម្មជាតិនៃជួរភ្នំ លាយឡំ និង សំឡេងទឹកធ្លាក់ពីលើកំពូលភ្នំ លាន់រងំដូចតន្ត្រីកំដរផង បានអង្រូនបេះដូងអ្នកទេសចរណ៍ទាំងឡាយនៅគ្រប់ទិសទី ជាប់ចិត្តដិតអារម្មណ៍ស្ទើរមិនអាចបំភ្លេចបាន។ អ្នកគ្រងគ្រង សហគមន៍ អេកូទេស
ចរណ៍អូរជាំ លោក ម៉េង ជាំង បាននិយាយប្រាប់កោះសន្តិភាពថា «កន្លងមក នៅទឹកធ្លាក់អូរជាំនេះ មានភ្ញៀវទេសចរមកបោះតង់សម្រាកលំហែកាយញឹកញាប់ណាស់ យ៉ាងយូរ២ ឬ៣ថ្ងៃប៉ុណ្ណោះនឹងមានភ្ញៀវក្រុមផ្សេងៗមកបន្តបន្ទាប់ទៀត ភាគច្រើនជាពលរដ្ឋខ្មែរ»។
ដោយឡែក ពាក់ព័ន្ធនឹងសន្តិសុខវិញ លោក ម៉េង ជាំង បានបញ្ជាក់យ៉ាងដូច្នេះថា «ចាប់តាំងពីទឹកធ្លាក់អូរជាំ បើកស្វាគមន៍ភ្ញៀវរហូតមកដល់ពេលនេះ ហាក់មិនមានបញ្ហាអ្វីកើតឡើងទេ គឺ មានសន្តិសុខល្អប្រសើរ។ ព្រោះពេលថ្ងៃយើងមានក្រុមសហគន៍នៅរងចាំផ្ដល់សេវាជូនភ្ញៀវ លុះពេលរាត្រីយើងមានក្រុមល្បាត និង កម្លាំងប្រជាការពារផង នៅការពារជាប្រចាំនៅតំបន់នេះ»។ ប្រធានសហគមន៍រូបនេះ បាននិយាយថា ភ្ញៀវដែលមកបោះតង់សម្រាកកំសាន្តនៅទឹកធ្លាក់អូរជាំ ភាគច្រើនពួកគេមកជាក្រុមៗ តាមរយៈម៉ូតូ ឬរថយន្ត។ ពួកគេនៅក្នុងខេត្តយើងផង និងមកពីតាមបណ្ដាខេត្តនានាផង
ដែរ។
អ្នកគ្រប់គ្រងសហគមន៍អេកូទេសចរណ៍អូរជាំដដែលនេះ បានបញ្ជាក់ដែរថា ភ្ញៀវទេសចរបានមកស្នាក់នៅបោះតង់សម្រាក លំហែកាយនៅទីនេះ ក៏មានក្រុមនិស្សិត យុវសិស្ស ក្រុមអ្នកជិះម៉ូតូធំៗ ឬ មកជាលក្ខណៈក្រុមគ្រួសារ។ ពួកគេមួយចំនួនបានភ្ញាប់មកជាមួយនូវតង់ ឬ ម្ហូបអាហារជាស្រេច តែបើភ្ញៀវគ្មានតង់ទេ សហគមន៍មានតង់គ្រប់គ្រាន់សម្រាប់រៀបចំឲ្យភ្ញៀវស្រាប់។ ភ្ញៀវទេសចរបានរៀបចំកម្មវិធីសប្បាយៗ នាពេលរាត្រី លុះពេលថ្ងៃ ពួកគេនាំគ្នាឡើងលើភ្នំមើលព្រៃព្រឹក្សា ថតរូបអនុស្សាវរីយ៏ជាមួយបុប្ផាចម្រុះពណ៌បែបធម្មជាតិយ៉ាងរីករាយនៅតាមចង្កេះភ្នំ ដែលលាយឡំទៅដោយដំណាំកសិកម្មដ៏ខៀវស្រងាត់របស់សហគមន៍អូរជាំនៅរបជើងភ្នំផង។ ជាពិសេសពួកគេ បាននាំគ្នាឡើងទៅងូតទឹកធ្លាក់យ៉ាងត្រជាក់ចិត្តនៅខាងលើភ្នំ មុនពេលចាកចេញពីរមណីយដ្ឋានដែលប្រៀបបានឋានសួរ៌មួយនេះ។
និស្សិតម្នាក់ដែលស្ថិតក្នុងចំណោមក្រុមនិស្សិតជាង១០នាក់ ដែលបាននាំគ្នាទៅបោះតង់សម្រាកនៅតំបន់ទឹកធ្លាក់អូរជាំ កាលពីចុងសប្ដាហ៍មុននេះ គឺ កញ្ញា កេសី បានផ្ដល់បទសម្ភាសន៍ខ្លីជាមួយកោះសន្តិភាពថា «នេះជាលើកទី២ ហើយដែលខ្ញុំ បានមកបោះតង់សម្រាកលំហែកាយពេលរាត្រី នៅទឹកធ្លាក់អូរជាំនេះជាមួយមិត្តភក្ដិ។ ក្រុមខ្ញុំ ធ្លាប់មកលេងទីនេះ តាំងពីតំបន់នេះទើបរៀបចំដំបូង។ ក្រុមខ្ញុំជានិស្សិតទើបបញ្ចប់បរិញ្ញាបត្រ នៅសាកលវិទ្យាល័យមួយ ក្នុងខេត្តបាត់ដំបង ហើយនេះជាគោលបំណងរបស់ពួកខ្ញុំយូរហើយដែលចង់មកបោះតង់នៅទីនេះ»។
ភ្នែកទាំងគូរបស់នាងងាកមើលទិដ្ឋភាពឆ្វេងស្ដាំ រួចញញឹម នៅពេលសួរថា ពេលមកដល់ទឹកធ្លាក់អូរជាំនេះ តើយល់ឃើញថា រមណីយ៍ដ្ឋាននេះ មានស្ថានភាពបែបណាដែរ ? កេសី ហាក់មិនស្ទាក់ស្ទើរនឹងការផ្ដល់ចម្លើយទេ..! នាងបានបង្ហាញពីអារម្មណ៍រីករាយ អមដោយកាយវិការផង បាននិយាយថា «នៅទីនេះមានសភាពស្ងប់ស្ងាត់បែបធម្មជាតិ ធ្វើឲ្យអារម្មណ៍យើងស្រស់ថ្លា ចឹងទៅវាខុសពីយើងនៅទីក្រុង ឬ ទីប្រជុំជន»។ តើមានអារម្មណ៏យ៉ាងណា នៅពេលមកដល់ទឹកធ្លាក់អូរជាំ ? នាងបានផ្ដល់ចម្លើយទៀតថា « មានអារម្មណ៍ថា ស្រស់ស្រាយ ហើយខុសប្លែកជាងខ្ញុំពីដំបូង»។
សហគមន៍អេកូទេសចរណ៍ទឹកធ្លាក់អូរជាំ បានចាប់ផ្ដើមរៀបចំដំណើរការស្វាគមន៍អ្នកទេសចរណ៍ តាំងពីអំឡុងឆ្នាំ២០១៣ នៅក្នុងស្ថានភាពផ្លូវចូលដ៏លំបាក ដែលអមទៅដោយព្រៃយ៉ាងក្រាសពិបាកធ្វើដំណើរបំផុត។ ប្រធានមន្ទីរទេសចរណ៍ខេត្ត លោក អ៊ុច អ៊ុំភីនីស្សារ៉ា បាននិយាយថា តំបន់ទេសចរណ៏មួយនេះ បានចាប់ផ្ដើមរីកលូតលាស់នាប៉ុន្មានឆ្នាំចុងក្រោយនេះ ក្រោមការប្រឹងប្រែងជួយជម្រុញពីអាជ្ញាធរខេត្ត និងមន្ទីរទេសចរណ៍ផ្ទាល់ ដោយយោងតាមផែនការលើកស្ទូយវិស័យទេសចរណ៏ របស់ក្រសួងទេសចរណ៍ ដែលបានជម្រុញឲ្យតាមបណ្ដាសហគមន៏នានា ត្រូវចូលរួមអភិវឌ្ឍន៏លើវិស័យនេះ។
យ៉ាងណាក៏ដោយ ពាក់ព័ន្ធនឹងតំបន់ទឹកធ្លាក់អូរជាំខាងលើនេះ បើតាមលោក ភីនីស្សារ៉ា បានបញ្ជាក់ថា ពេលនេះ អាជ្ញាធរខេត្ត ក៏ដូចជាមន្ទីរទេសចរណ៍ខេត្ត បាននិងកំពុងរៀបចំគម្រោងអភិវឌ្ឍន៍តំបន់នោះហើយ។ អាជ្ញាធរខេត្ត កំពុងត្រៀមឈូសឆាយផ្លូវចូលទៅកាន់តំបន់ទឹកធ្លាក់នេះ ដោយក្រាលកៅស៊ូ រៀបចំប្រព័ន្ធទឹកស្អាតសម្រាប់ប្រើប្រាសនៅក្នុងរមណីដ្ឋាន និង នៅក្នុងសហគមន៍ដែលមានពលរដ្ឋរស់នៅជាង៤០០គ្រួសារនៅតំបន់នោះ។ ជាពិសេស រៀបចំបន្ទប់អនាម័យ និង ទីតាំងរៀបចំចំណីអាហារសម្រាប់ភ្ញៀវតែម្ដង ទីតាំងសម្រាប់បោះតង់ ដើម្បីឲ្យមានសណ្ដាប់ធ្នាប់ល្អ និងកាន់តែទាក់ទាញភ្ញៀវឲ្យចូលមកកំសាន្តកាន់តែច្រើនទ្វេដង ។
ចែករំលែកព័តមាននេះ