រាជធានីភ្នំពេញ ៖ ក្រោយពីបើកដំណើរការក្លិបបង្ហាត់គុនល្បុក្កតោ កញ្ញាពេជ្រ ចរណៃ តារាក្បាច់គុន ដែលកំពុងជោគជ័យក្នុងវិស័យសម្ដែងផង បានបង្ហាញពីការពុះពារយ៉ាងខ្លាំងក្នុងការប្រឹងប្រែងលើកស្ទួយវិស័យមួយនេះ បើទោះជានាងមិនទទួលបានប្រាក់កម្រៃពីការបង្វឹកជាប្រចាំថ្ងៃក្ដី។ ការបើកក្លិបនេះ…
រាជធានីភ្នំពេញ ៖ ក្រោយពីបើកដំណើរការក្លិបបង្ហាត់គុនល្បុក្កតោ កញ្ញាពេជ្រ ចរណៃ តារាក្បាច់គុន ដែលកំពុងជោគជ័យក្នុងវិស័យសម្ដែងផង បានបង្ហាញពីការពុះពារយ៉ាងខ្លាំងក្នុងការប្រឹងប្រែងលើកស្ទួយវិស័យមួយនេះ បើទោះជានាងមិនទទួលបានប្រាក់កម្រៃពីការបង្វឹកជាប្រចាំថ្ងៃក្ដី។ ការបើកក្លិបនេះ គឺបន្ទាប់ពីបណ្ឌិតសភាគុនល្បុក្កតោកម្ពុជា ផ្ដល់ជូននូវវិញ្ញាបនបត្របញ្ជាក់ពីការទទួលស្គាល់សាលាគុនល្បុក្កតោរបស់នាង ដែលមានឈ្មោះថា «ជ័យតេជៈ»។
ពេជ្រ ចរណៃ បញ្ជាក់ថា ទីតាំងក្លិបរបស់នាងស្ថិតនៅដីឡូត៍លេខ២៦០៨ភូមិគោកឃ្លាំង សង្កាត់ភ្នំពេញថ្មី ខណ្ឌសែនសុខ ដោយកញ្ញា អ៊ិត កន្និកា ហៅ ពេជ្រ ចរណៃ គឺជាប្រធានសាលាគុនដោយផ្ទាល់ ។
លោក ចាន់ ឬទ្ធិស័កិ្ត ត្រូវបានប្រកាសថា គឺជាគ្រូបង្គោលនៅក្នុងក្លិបនេះ ដោយអ្នកទាំងពីរ នឹងចូលរួមអភិវឌ្ឍ អភិរក្ស បណ្តុះបណ្តាល និងផ្សព្វផ្សាយឲ្យបានទូលំទូលាយ នូវកីឡាគុនល្បុក្កតោដល់យុវជនជំនាន់ក្រោយ។ នៅក្នុងពេលនេះ ក្លិបគុនល្បុក្កតោរបស់នាង បានដើរតួយ៉ាងសំខាន់ ក្នុងការទទួលបង្វឹកសិស្សចាស់ក្មេងចម្រុះវ័យ ដោយនាងបញ្ជាក់ថា កូនសិស្សដែលកំពុងហ្វឹកហាត់ក្នុងក្លិបរបស់នាងរាល់ថ្ងៃមានចំនួនជាង៣០នាក់ ដែលក្នុងនោះភាគច្រើនមានអាយុ២០ជាងឡើងលើ និងកូនក្មេងក្រោម១០ឆ្នាំមានមួយចំនួន ។
សិស្សដែលហ្វឹកហាត់រាល់ថ្ងៃ នាងតម្រូវឱ្យជួយបង់ប្រចាំខែក្នុងមួយខែ៦ម៉ឺនរៀល តែចំណែកសិស្សក្រីក្រខ្វះខាត នាងមិនឱ្យបង់លុយមួយរៀលនោះទេ គឺមានតែជួយវិញ ។ នាងថា ការតម្រូវឱ្យសិស្សបង់លុយ គឺដើម្បីទប់ទល់ថ្លៃទឹកភ្លើង និង ថ្លៃជួលដីប៉ុណ្ណោះ ប៉ុន្តែបើនាងមានអ្នកជ្រោមជ្រែង គឺនាងនឹងអាចប្ដូរជំហរឈប់បង់ ឬអាចជ្រើសយកសិស្សក្រីក្រមកហ្វឹកហាត់ឱ្យបានច្រើន។
ពេជ្រ ចរណៃ បន្តថា សាលាបណ្តុះបណ្តាលក្បាច់គុនល្បុក្កតោខ្មែរដែលនាងបង្កើតបានធ្វើឱ្យនាងសប្បាយចិត្តយ៉ាងខ្លាំងដោយនាងមិននឹកស្មានថា ខ្លួនអាចធ្វើឱ្យលេចចេញជារូបរាងដូចដែលបានឃើញនោះទេ ដោយសារតែការបើកក្លិបគឺចំណាយអស់ច្រើន ។
ជាក់ស្ដែងទម្រាំតែអាចដំឡើងបានជាក្លិបបង្វឹកមួយនេះ គឺនាងសន្សំលុយដែលបានពីការងារថត និង ការងារផ្សេងៗយ៉ាងលំបាកយកមកបើក ដោយសម្ភារៈក្នុងក្លិបក៏ត្រូវបានឧកញ៉ាម្នាក់ជួយ
២០០០ដុល្លារ ទើបអាចមានលទ្ធភាពទិញសម្ភារឱ្យសិស្សហ្វឹកហាត់ ។ ក្លិបនេះ គឺនាងបានស្នើសុំច្បាប់បង្កើតជាសាលាគុនត្រឹមត្រូវ ដោយបណ្ឌិតសភាគុនល្បុក្កតោកម្ពុជាទទួលស្គាល់។
កញ្ញា ពេជ្រ ចរណៃ បានប្រាប់ទាំងអារម្មណ៍សប្បាយរីករាយថា នាងពិតជារំភើបចិត្ត នៅពេលដែលក្តីបំណងប៉ងប្រាថ្នា បើកសាលាបណ្តុះបណ្តាលគុនល្បុក្កតោខ្មែរទទួលបានជោគជ័យ និងមានការជួយគាំទ្រពីបងប្អូនសប្បុរសជន និងក្មេងៗជំនាន់ក្រោយ បានចូលហាត់រៀនជាហូរហែ។
នាងបន្តថា ការសិក្សាក្បាច់គុនល្បុក្កតោគឺមិនបានយកកម្រៃអ្វីឡើយ សម្រាប់សិស្សដែលមានជីវភាពខ្វះខាតខ្លាំង ប៉ុន្តែប្រសិនបើសិស្សណាមានលទ្ធភាព គឺគ្រាន់តែជួយចេញថ្លៃទឹក និងភ្លើង នៅក្នុងសាលាដែលពួកគេហាត់រៀនតែប៉ុណ្ណោះ។
ពេជ្រ ចរណៃ បានបន្ថែមទៀតថា គោលបំណងសំខាន់ នៃការបើកសាលាបណ្តុះបណ្តាលក្បាច់គុនល្បុក្កតោនេះឡើង គឺដើម្បីឲ្យកូនខ្មែរជំនាន់ក្រោយ បានសិស្សារៀនសូត្រ ស្នងតំណែងពីលោកគ្រូៗជំនាន់មុន ដែលក្បាច់គុនល្បុក្កតោ ហាក់មិនទាន់មានសកម្មភាពទូលំទូលាយនៅឡើយ ជាពិសេសចង់ឲ្យអន្តរជាតិស្គាល់ពីវប្បធម៌ខ្មែរ និងគ្រឹះនៃក្បាច់គុនខ្មែរ មានតាំងពីបុរាណនិងល្បីល្បាញជាយូរឆ្នាំមកហើយ ។
យ៉ាងណាក៏ដោយ ពេជ្រ ចរណៃ ក៏បានស្នើដល់មហាជនឲ្យជួយគាំទ្រ និងជួយចែករំលែកអំពីព័ត៌មាន នៃការហាត់រៀនក្បាច់គុនល្បុក្កតោខ្មែរ ឲ្យបានផុសផុល ជ្រួតជ្រាបដល់មហាជនទូទៅ។
នាងបញ្ជាក់ថា រហូតមកទល់នឹងពេលនេះ គឺមានសិស្សបានមកចុះឈ្មោះសិក្សាក្បាច់គុនល្បុក្កតោជាបន្តបន្ទាប់ ដោយក្នុងនោះ ក្រៅពីរូបនាងជាអ្នកបង្ហាត់ដោយផ្ទាល់ គឺនៅមានគ្រូចំនួន៦នាក់បន្ថែមទៀត ដើម្បីជួយបង្ហាត់បង្រៀន ខណៈដែលនាងក៏មានភាពមមាញឹកទៅលើការងារសិល្បៈ ដើម្បីស្វះស្វែងរកចំណូលមកទ្រទ្រង់សាលា និងខ្លួនឯងផ្ទាល់ផងដែរ ។ ក្នុងនោះនាងក៏ប្រកាសថា មិនមានអ្វីប៉ះពាល់ដល់ការងារបង្ហាត់សិស្សនៅកងទ័ពជើងគោក កងពលតូចលេខ៧០នោះទេ ដោយសារតែមានកាលវិភាគទៅបង្វឹក និងម្យ៉ាងមកពីនៅកងពលតូចលេខ៧០ គឺនាងបង្ហាត់តែព្រឹក និងរសៀល ហើយបើការបង្ហាត់នៅក្លិបរបស់ខ្លួន គឺពេលល្ងាច។
គួរបញ្ជាក់ផងដែរថា ពេជ្រ ចរណៃ គឺជាតារាសម្ដែង និងជាមន្ត្រីក្នុងជួរទាហានមួយរូបនៅកងពលតូចលេខ៧០ ។ យ៉ាងណាក៏ដោយនាងគ្រាន់តែជាគ្រូបង្វឹកនៅក្នុងស្ថាប័នទាហាននេះ
ប៉ុណ្ណោះ គឺមិនទាន់មានតួនាទី ឬស័ក្តិពាក់លើស្មានៅឡើយទេ ៕
ចែករំលែកព័តមាននេះ