រាជធានីភ្នំពេញ ៖ យ៉េន ឌីណា មកពីសមាគមកីឡាប្រដាល់ក្រសួងការពារជាតិចំណាយពេលត្រឹមតែ៣ទឹកប៉ុណ្ណោះ បានផ្ដួលឡុង បេនលឿន មកពីក្លិបសាលវ័ន្តកីឡាឱ្យសន្លប់បញ្ចប់មហិច្ឆតាដែលចង់ឈ្នះរូបគេក្នុងជំនួបមិត្តភាពនៅលើសង្វៀនស៊ីអិនស៊ីកាលពីថ្ងៃទី២៧ ធ្នូ កន្លងមកនេះ។
ការប៉ះគ្នារវាងកីឡាករយ៉េន ឌីណានិងកីឡាករ ឡុង បេនលឿន លើកនេះបានធ្វើឱ្យអ្នកទស្សនាតាមកញ្ចក់ទូរទស្សន៍មានការចាប់អារម្មណ៍ខ្លាំងមែនទែន ព្រោះអីគ្រាន់តែចាប់ផ្ដើមទឹកទី១ភ្លាមពួកគេទាំងពីរពន្លះគ្នាយ៉ាងចាស់ដៃ។
យ៉េន ឌីណា បានទាត់ទៅលើគូប្រកួតដូចរន្ទះ ធ្វើឱ្យឡុង បេនលឿន ដែលមិនទាន់មានការប្រុងប្រយ័ត្ននោះគេចស្ទើរមិនចង់ទាន់ ។ ប៉ុន្តែអ្នកប្រដាល់ចាស់វស្សាមកពីក្លិបសាលវ័ន្តកីឡារូបនេះបានសម្រុកចូលកៀកប្ដូរស្នៀតកែងសងវិញភ្លាមៗ ។ ចូលដល់ទឹកទី២កីឡាករទាំងពីរនៅតែបន្តវាយសម្រុកដាក់គ្នាដូចព្យុះដោយគេឃើញយ៉េន ឌីណា វាយកែងទៅលើ ឡុង បេនលឿន កាន់តែសាហាវខ្លាំងឡើង។
ទោះជាយ៉ាងណា សម្រាប់ការប្រកួតក្នុងទឹកទី២នេះយ៉េន ឌីណា ហាក់បីដូចជាមានប្រៀបជាងបន្តិច ក្នុងពេលកីឡាករឡុង បេនលឿនបានត្រឹមវាយបកសងបណ្ដើរដកថយបណ្ដើរមិនសូវហ៊ានសម្រុកចូលកៀកទៀតនោះទេ ។ ចូលដល់ទឹកទី៣ ឡុង បេនលឿន សម្រុកចូលកៀករួចវាយកែងទៅលើ យ៉េន ឌីណា មុន ប៉ុន្តែមិនបានចំគោលដៅល្អនោះទេ ផ្ទុយទៅវិញបែរជាត្រូវយ៉េន ឌីណា វាយកែងបកសងវិញចូលសៀតផ្កាពេញទំហឹងនិងទាត់មួយជើងស្ដាំទៅលើកញ្ចឹងកបន្ថែមទៀតបណ្ដាលឱ្យឡុង បេនលឿន ដួលសន្លប់ធំនៅពាក់កណ្ដាលទឹកទី៣តែម្ដង។
នៅលើសង្វៀនដដែល កីឡាករ គង់ សំបូរមកពីសមាគមកីឡាប្រដាល់កងយោធពលខេមរភូមិន្ទ បានធ្វើឱ្យកីឡាករ សូត្រ ខេវិន មកពីក្លិបបក្សីស្លាបដែក ចាញ់ដោយពិន្ទុយ៉ាងអស់ចិត្តបំផុត។
ការប៉ះគ្នារវាងគូនេះក៏បានធ្វើឱ្យអ្នកនិយមតាមដានការប្រកួតកីឡាប្រដាល់មានការចាប់អារម្មណ៍ខ្លាំងណាស់ដែរ ។ សូត្រ ខេវិន ដែលពូកែខាងប្រើស្នៀតកែងនិងជង្គង់នោះ ត្រូវគង់ សំបូរ ធាក់ចេញមិនឱ្យចូលកៀកបានឡើយ ចាប់តាំងពីទឹកទី១រហូតដល់ទឹកទី៣។ផ្ទុយទៅវិញត្រូវគង់ សំបូរ ម៉ាត់ចូលមុខពេញៗថែមទាំងបានទាត់ចូលកណ្ដៀតក្អមជាច្រើនជើងទៀត ។
សូត្រ ខេវិន ចាញ់ប្រៀបខាងកម្លាំងតាំងពីទឹកទី៣ម៉្លេះ ដែលជាហេតុធ្វើឱ្យការប្រកួតក្នុងទឹកទី៤គង់ សំបូរ កាន់តែមានប្រៀបខ្លាំងឡើង។ មិនតែប៉ុណ្ណោះ ក្នុងទឹកទី៤នេះ សូត្រ ខេវិន ត្រូវគង់ សំបូរ ម៉ាត់ចូលមុខជាច្រើនដៃ ធ្វើឱ្យអាជ្ញាកណ្ដាលរាប់៨ម្ដង ។ ប៉ុន្តែសូត្រ ខេវិន ចិត្តរបស់គេសឿងណាស់ បានសម្រុកចូលប្ដូរកែងនិងជង្គង់នៅចុងទឹកទី៥ ប៉ុន្តែមិនអាចទៅរួចនោះទេ ដោយសារតែគង់ សំបូរទាត់ស្កាត់មិនឱ្យចូលកៀកបានដោយងាយនោះឡើយ ។ សូត្រ ខេវិន ប៉ះគង់ សំបូរ លើកនេះគឺចាញ់យ៉ាងអស់ចិត្តបំផុត ៕
ចែករំលែកព័តមាននេះ