ក្រសួងហិរញវត្ថុសហរដ្ឋអាមេរិកបានឱ្យដឹងថា រដ្ឋាភិបាលមានបំណុលសរុបជាង១៣លានលានដុល្លារជាលើកដំបូងក្នុងប្រវត្ដិសាស្ដ្រ ជាហេតុធ្វើឱ្យកើតមានការមិនពេញចិត្ដទាក់ទងនឹងការចំណាយរបស់រដ្ឋាភិបាលកាន់តែខ្លាំង ។
ក្នុងការចំណាយផ្នែករដ្ឋដ៏មហាសាល ដែលកំណត់ឡើងសំរាប់ដោះស្រាយវិបត្ដិសេដ្ឋកិច្ច បានធ្វើឱ្យសហរដ្ឋអាមេរិកមានបំណុលដល់ទៅជាង១៣លានលានដុល្លារ គឺកើនឡើងប្រហែល១,៦លានលានដុល្លារ ប្រៀបនឹងឆ្នាំមុន និងកើនឡើងជាង២ដងប្រៀបនឹងអំឡុងពេល១០ឆ្នាំមុន ឬមានប្រហែល៩០%នៃផលិតផលសរុបក្នុងស្រុក។ នេះបើតាមទិន្នន័យរបស់អាជ្ញាធរកាលពីថ្ងៃទី១ មិថុនា កន្លងមក ។
ដំណោះស្រាយបញ្ហាបន្ទុកបំណុលក្លាយ ជាចំណុចដ៏ក្ដៅគគុកផ្នែកនយោបាយក្នុងទីក្រុងវ៉ាស៊ីនតោន គឺទាំងគណបក្សប្រជាធិបតេយ្យ និងគណបក្សសាធារណរដ្ឋបានទំលាក់កំហុសឱ្យគ្នាទៅវិញទៅមក ខណៈ ពេលមុននេះលោកប្រធានាធិបតី បារ៉ាក់ អូបាម៉ា ធ្លាប់ថ្លែងករណ៍វាយប្រហារលើគណបក្សសាធារណរដ្ឋថា បានឱ្យរូបលោកដោះស្រាយបញ្ហាអសមតុល្យរយៈពេលខ្លីដែលឈានឆ្ពោះទៅរកបន្ទុកបំណុលរយៈពេលវែង ។
គួររំលឹកថា រដ្ឋាភិបាលអាមេរិក ត្រូវជួបនឹងកង្វះសមតុល្យថវិកាជាបន្ដបន្ទាប់ក្នុងរយៈ ពេលខែទី១៩ កាលពីខែមេសា កន្លងមក ។ លោកអូបាម៉ា បានឱ្យដឹងថា នៅពេលដែល លោកឡើងធ្វើប្រធានាធិបតីសហរដ្ឋអាមេរិកមានកង្វះខាតសមតុល្យថវិកាប្រហែល១ឆ្នាំ គឺមានជាង១លានលានដុល្លារ និងរំពឹងថា នឹងមានអសមតុល្យថវិកាកើនឡើង៨លានលានដុល្លារ ក្នុងរយៈពេល១០ឆ្នាំខាងមុខ ។
ចំណែកសេដ្ឋវិទូវិញមានគំនិតផ្ទុយគ្នាទាក់ទិននឹងសហរដ្ឋអាមេរិក ដោយឱ្យយោបល់ថា គួរអនុវត្ដវិធីសាស្ដ្រគ្រប់គ្រងថ្លៃចំណាយឱ្យបានឆាប់ ដោយអ្នកខ្លះជឿថា ការគ្រប់គ្រងចំណាយរបស់រដ្ឋាភិបាល ឬបង្កើនពន្ធលឿនអាចធ្វើឱ្យអាមេរិកធ្លាក់ទៅក្នុងស្ថានភាពវិបត្ដិសេដ្ឋកិច្ចបាន ៕
ចែករំលែកព័តមាននេះ