ខេត្តព្រៃវែង ៖ ថ្លែងនៅក្នុងពិធីចែកអំណោយជូនជនក្រីក្រចំនួន៤៨០គ្រួសារ នៅស្រុកពាមជរ កាលពីព្រឹកថ្ងៃទី២៤ ខែធ្នូនេះ ឯកឧត្តម ជា សុមេធី អភិបាលខេត្តព្រៃវែង បានលើកឡើងថា ថ្មីៗនេះបណ្តាខេត្តមួយចំនួននៅឯប្រទេសថៃ ពិសេសខេត្តជាប់ព្រំដែនខ្មែរ បានផ្ទុះឆ្លងជំងឺកូវីដ-១៩ ជាង៧០០នាក់ ដែលនេះគឺជាតួលេខដ៏គួរឲ្យបារម្ភខ្លាំងណាស់។
ឯកឧត្តមបានបន្តទៀតថា នៅក្នុងខេត្តដែលផ្ទុះកើតជំងឺកូវីដនោះ គឺមានពលករខ្មែរយើងរាប់ពាន់នាក់ កំពុងតែធ្វើការនៅទីនោះ ដូច្នេះដើម្បីការពារពីការឆ្លងរាលដាលជំងឺកូវីដ-១៩នេះ ឯកឧត្តមសូមអំពាវនាវឲ្យបងប្អូនពលករទាំងអស់ ត្រូវបន្តធ្វើការ និងរស់នៅ នៅក្នុងទីកន្លែងនោះជាបន្តទៀត ដាច់ខាតកុំនាំគ្នាសម្រុកវិលត្រឡប់មកស្រុកកំណើតវិញឲ្យសោះ ព្រោះពេលដែលយើងធ្វើចរាចរណ៍ចុះឡើង វាប្រឈមនឹងការឆ្លងជំងឺកូវីដ-១៩នេះខ្លាំងណាស់។
ជាមួយគ្នានោះ ឯកឧត្តមអភិបាលខេត្ត ក៏បានសំណូមពរដល់បងប្អូនប្រជាពលរដ្ឋ នៅក្នុងខេត្តព្រៃវែងទាំងអស់ ដែលមានបំណងចង់ធ្វើចំណាកស្រុក ទៅធ្វើការនៅប្រទេសថៃនោះ សូមកុំទាន់អាលទៅអី ព្រោះវាមានហានិភ័យខ្ពស់ខ្លាំងណាស់។ ទន្ទឹមនឹងនោះ ឯកឧត្តមអភិបាលខេត្ត ក៏បានណែនាំអោយអាជ្ញាធរគ្រប់ជាន់ថ្នាក់ នៅតាមមូលដ្ឋាន ត្រូវបន្តចុះផ្សព្វផ្សាយអប់រំណែនាំដល់បងប្អូនប្រជាពលរដ្ឋ អំពីវិធានការការពារជំងឺកូវី-១៩ របស់ក្រសួងសុខាភិបាលឲ្យបានជាប់ជាប្រចាំ ដើម្បីបង្ការទប់ស្កាត់កុំឲ្យមានការឆ្លងរាលដាល នៅក្នុងសហគមន៍ ដូចនៅប្រទេសថៃ (យើងការពារ ប្រសើរជាង ព្យាបាល)។
សូមបញ្ជាក់ផងដែរថា នៅក្នុងពិធីចែកអំណោយនោះ ប្រជាពលរដ្ឋក្រីក្រទាំង៤៨០គ្រួសារ ក្នុង១គ្រួសារៗទទួលបានអង្ករ២៥គីឡូក្រាម និងថវិកា១ម៉ឺនរៀល ដែលអំណោយទាំងនោះគឺជារបស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ៕ ដោយ ៖ សុំ ពៅពិសិដ្ឋ
ចែករំលែកព័តមាននេះ