រាជធានីភ្នំពេញ ៖ សមត្ថកិច្ច កំពុងតាមរកចាប់ខ្លួនលោកចាងហ្វាង កាសែតរស្មីខ្មែរ ដែលក្លែងបន្លំ ប្រើប័ណ្ណព័ត៌មាន និងឈ្មោះអង្គភាពដទៃជាច្រើន ផ្ញើទៅស្ថាប័ន ក្រសួង…
រាជធានីភ្នំពេញ ៖ សមត្ថកិច្ច កំពុងតាមរកចាប់ខ្លួនលោកចាងហ្វាង កាសែតរស្មីខ្មែរ ដែលក្លែងបន្លំ ប្រើប័ណ្ណព័ត៌មាន និងឈ្មោះអង្គភាពដទៃជាច្រើន ផ្ញើទៅស្ថាប័ន ក្រសួង មន្ទីរ អង្គភាព និងអាជីវករ ជាច្រើន ដើម្បីជំរិតសុំលុយគេ តាមអំពើចិត្ត ក្រោយពីឃាត់ខ្លួនជនសង្ស័យម្នាក់ប្រើជានុយ ដើម្បីបោកប្រាស់សុំលុយចំនួន៤០ម៉ឺនរៀលពីមេបញ្ជាការកងរាជអាវុធហត្ថរាជធានីភ្នំពេញ តាមប្រព័ន្ធ WhatsApp ។
បើតាមកងរាជអាវុធហត្ថរាជធានីភ្នំពេញ បានឲ្យដឹងថា «ឮ១០០ដង មិនស្មើនឹងបានឃើញ១ដង!» គឺនៅល្ងាចថ្ងៃទី១៩ ខែធ្នូ ឆ្នាំ២០២០ មានលេខទូរស័ព្ទមួយ តាំងខ្លួនជា បុគ្គលិកទូរទស្សន៍អប្សរាប៉ុស្តិ៍លេខ១១ បានផ្ញើសារតាមប្រព័ន្ធ WhatsApp ទៅកាន់មេបញ្ជាការ កងរាជអាវុធហត្ថរាជធានីភ្នំពេញ ដែលមានខ្លឹមសារថា “ខ្ញុំបាទ ប៉ែន នួន ខ្វះខាតផ្ទាល់ខ្លួន ប្រពន្ធរបស់ខ្ញុំ (ឆ្លងទន្លេ) ខ្វះខាតសុំ ឯកឧត្តម បានចំនួន(៤០ម៉ឺនរៀល) សូមឯកឧត្តមមេត្តាជួយខ្ញុំបាទផង សូមអរគុណ” ព្រមទាំងផ្ញើភ្ជាប់ជាមួយប័ណ្ណសារព័ត៌មាន ដែលមានឈ្មោះនិងរូបថត ប៉ែន នួន ផងដែរ ។
ដោយមានការសង្ស័យ មេបញ្ជាការ អាវុធហត្ថរាជធានីភ្នំពេញ ក៏បានឆែកសួរទៅកាន់ប្រធានព័ត៌មាន ទូរទស្សន៍អប្សរាប៉ុស្ត៍លេខ១១ បញ្ជាក់ថា សាម៉ីខ្លួន ឈ្មោះ ប៉ែន នួន គឺជាអតីតសហការីឆ្លើយឆ្លងព័ត៌មាន ទូរទស្សន៍អប្សរាប៉ុស្ត៍លេខ១១ ពុំដឹងរឿងអ្វីទេ ឯអ្នកដែលយកប័ណ្ណព័ត៌មានដែលមានឈ្មោះ និងរូបថតរបស់ ប៉ែន នួន ទៅដើរសុំលុយនោះ គឺជាជនក្លែងបន្លំប៉ុណ្ណោះ ព្រោះកន្លងមកក៏ធ្លាប់មានថ្នាក់ដឹកនាំអង្គភាពមួយ ធ្លាប់បានឆែកសួរមកម្តងដែរ ដោយមានគេបន្លំយក ឈ្មោះ ប៉ែន នួន នេះ ទៅស្នើសុំលុយដូចគ្នា ។
បន្ទាប់ពីបានទទួលព័ត៌មានរួចហើយ លោកមេបញ្ជាការ អាវុធហត្ថរាជធានីភ្នំពេញ បានប្រើវិធានការជំនាញ អូសទាញជនក្លែងបន្លំរូបនោះមកជួប ហើយក៏មានបុរសម្នាក់ បានទៅដល់មែន ទើបកម្លាំងជំនាញរបស់អាវុធហត្ថរាជធានីភ្នំពេញ បានធ្វើការឃាត់ខ្លួនបុរសនោះ ដើម្បីសួរនាំ ។
បុរសនោះ ក៏បានឆ្លើបប្រាប់ថា រូបគាត់ គ្រាន់តែមកជំនួសគេប៉ុណ្ណោះ រីឯអ្នកដែលប្រើគាត់មក មានឈ្មោះថា ជុំ សុភាព ជាចាងហ្វាង កាសែតរស្មីខ្មែរ បានឲ្យខ្លួនកាន់ទូរស័ព្ទមកជំនួស ដែលទូរស័ព្ទនោះ គឺជាលេខទូរស័ព្ទ ដែលតាំងខ្លួនថាឈ្មោះ ប៉ែន នួន ពិតប្រាកដមែន ។
នៅក្នុងទូរស័ព្ទនោះ ក៏មានសារទំនាក់ទំនង ប្រើប័ណ្ណព័ត៌មានផ្សេងៗ ផ្ញើទៅ ស្ថាប័ន ក្រសួង មន្ទីរ អង្គភាព និងអាជីវករ ជាច្រើន ដើម្បីសុំប្រាក់ និងមានរូបភាព ប័ណ្ណព័ត៌មានរបស់អ្នកព័ត៌មានជាច្រើនទៀត សង្ស័យត្រូវបានឈ្មោះ ជុំ សុភាព យកទៅប្រើប្រាស់ដូចគ្នា ដូចករណីប្រើប័ណ្ណរបស់ឈ្មោះ ប៉ែន នួន ផ្ញើទៅកាន់ មេបញ្ជាការ កងរាជអាវុធហត្ថរាជធានីភ្នំពេញ ហើយត្រូវបានកម្លាំងអាវុធហត្ថរាជធានីភ្នំពេញ តាមទាន់ជាន់កែង វែកមុខដឹងថា ជាជនក្លែងបន្លំ យកឈ្មោះអ្នកដទៃ ដើរសុំលុយផ្តេសផ្តាស់ ធ្វើឲ្យប៉ះពាល់កិត្តិយសរបស់សាម៉ីខ្លួន ដែលមិនដឹងអី ក៏ដូចជាប៉ះពាល់ដល់អ្នកសារព័ត៌មាន មានវិជ្ជាជីវៈដទៃទៀតផងដែរ ។
ទោះយ៉ាងណាបច្ចុប្បន្ន ចាងហ្វាង កាសែតរស្មីខ្មែរ ឈ្មោះ ជុំ សុភាព បានគេចខ្លួនបាត់ទៅហើយ សមត្ថកិច្ចជំនាញ បាននិងកំពុងស្រាវជ្រាវស្វែងរកចាប់ខ្លួនផងដែរ ៕
ចែករំលែកព័តមាននេះ