ខេត្តពោធិ៍សាត់៖ ក្លោងទ្វារ និងរបងព្រះរាជដំណាក់ស្ដេច នៅភូមិក្រោលក្របី ឃុំត្រពាំងជង ស្រុកបាកាន ខេត្តពោធិ៍សាត់ ដែលបន្សល់ទុកកាលពីជំនាន់ស្ដេចមុនីវង្សនោះ ឥឡូវនេះបានត្រូវគាស់រំកិលចូលក្នុងវិញ ដោយសារប៉ះពាល់ការពង្រីកផ្លូវជាតិលេខ
៥ ។
ព្រះរាជដំណាក់នោះ បានបាត់រូបរាងអស់ទៅហើយ ដោយសារសង្គ្រាមនិងសម័យប៉ុលពត គឺសល់តែក្លោងទ្វាខាងមុខ០៣ របង និងស្រះទឹកធំមួយប៉ុណ្ណោះ ដែលសព្វថ្ងៃនេះជាទីតាំងរដ្ឋបាលរបស់សាលាស្រុកបាកាននិងមណ្ឌលសុខភាពត្រពាំងជង។
បច្ចុប្បន្ន រាជរដ្ឋាភិបាលបាននឹងកំពុងពង្រីកផ្លូវជាតិលេខ៥ ដែលមានទទឹង៦០មឲ្យទៅជាផ្លូវអាស៊ាន ។ ដោយសារការពង្រីកមានការប៉ះពាល់ក្លោងទ្វាព្រះរាជដំណាក់ស្ដេចជំនាន់ដើមនោះ ឯកឧត្តម ម៉ៅ ធនិន អភិបាលនៃគណៈអភិបាលខេត្តពោធិ៍សាត់ បានបង្កើតគណៈកម្មការមួយដឹកនាំដោយលោកស្រី ម៉ែន ផល្លី អភិបាលរងខេត្ត លោក ឡាច ផេងលី ប្រធានមន្ទីរវប្បធម៌និងវិចិត្រសិល្បះ និងលោក ផាយ ឡេង អភិបាលនៃគណៈអភិបាលស្រុកបាកាន ដើម្បីគាស់រំកិលក្លោងទ្វាចូលមកក្នុង ដោយមិនវាយកម្ទេចចោលនោះទេ។
លោក ឡាច ផេងលី និងលោក ផាយ ឡេង ឲ្យដឹងថា ក្លោងទ្វាព្រះរាជដំណាក់ធំជាងគេនៅកណ្ដាល ត្រូវរំកិលចូលក្នុង៣០មពីទីតាំងចាស់ ហើយត្រូវរក្សារូបរាងដើមឲ្យនៅដដែល។ ចំណែកក្លោងទ្វាខាងកើតនិងខាងលិច ត្រូវជីកគាស់ស្ទូចយកទៅរក្សាទុកនៅបរិវេណខាងក្នុង ដើម្បីទុកឲ្យកូនចៅជំនាន់ក្រោយបានឃើញនិងជាមរតកបីតិកភ័ណ្ឌជាតិផងដែរ។ បើតាមការពិនិត្យ ក្លោងទ្វាចូលព្រះរាជដំណាក់នេះធ្វើអំពីអិដ្ឋតាន់ ស៊ីម៉ង់ត៍ និងបិទក្បាច់ខ្មែរពីលើ។
លោកប្រធានមន្ទីរវប្បធម៌និងវិចិត្រសិល្បះខេត្ត ពោធិ៍សាត់ឲ្យដឹងទៀតថា តាមការស្រាវជ្រាវក្នុងឯកសារមួយចំនួនបានឲ្យដឹងថា ព្រះរាជដំណាក់របស់ព្រះករុណាព្រះបាទសម្ដេច ស៊ីសុវត្ថិ មុនីវង្ស នៅឃុំត្រពាំងជងស្រុកបាកាននេះ កសាងនៅឆ្នាំ១៩៣០ ១៩៣១ ក្នុងរជ្ជកាលដែលព្រះអង្គគ្រប់គ្រងប្រទេសជាតិ យាងមកលំហែព្រះកាយនិងបំផុសឲ្យប្រជារាស្ត្រធ្វើស្រែចំការ ដែលមកដល់ពេលនេះមានរយៈពេលប្រមាណ៩០
ឆ្នាំមកហើយ៕
ចែករំលែកព័តមាននេះ