ខេត្តឧត្តរមានជ័យ ៖ ពលករខ្មែរប្រុសស្រី ចំនួន១៧២នាក់ នៅព្រឹកថ្ងៃទី២១ ខែធ្នូ ឆ្នាំ២០២០នេះ បានចាកចេញពីប្រទេសថៃ តាមច្រកអន្តជាតិអូរស្មាច់ ត្រូវបានអជ្ញាធរខេត្តឧត្តរមានជ័យ…
ខេត្តឧត្តរមានជ័យ ៖ ពលករខ្មែរប្រុសស្រី ចំនួន១៧២នាក់ នៅព្រឹកថ្ងៃទី២១ ខែធ្នូ ឆ្នាំ២០២០នេះ បានចាកចេញពីប្រទេសថៃ តាមច្រកអន្តជាតិអូរស្មាច់ ត្រូវបានអជ្ញាធរខេត្តឧត្តរមានជ័យ និងមន្ត្រីពាក់ព័ន្ធ ដឹកជញ្ជូនតាមរថយន្តទៅធ្វើ ចត្តាឡីស័ក រយៈពេល១៤ថ្ងៃ នៅក្រុងសំរោង នេះបើយោងតាមរដ្ឋបាលខេត្តឧត្ដរមានជ័យ ។
លោកវេជ្ជបណ្ឌិត ឃ្លោក ហួត ប្រធានមន្ទីរសុខាភិបាលខេត្តឧត្តរមានជ័យ បានថ្លែងអោយដឹងថា គិតត្រឹមម៉ោង១១ព្រឹកថ្ងៃទី២១ ធ្នូនេះ ពលករខ្មែរចំនួន ១៧២នាក់ បានចាកចេញពីប្រទេសថៃ តាមច្រកអន្តរជាតិអូរស្មាច់ ស្ថិតក្នុងសង្កាត់អូរស្មាច់ ក្រុងសំរោង ហើយពលករទាំងអស់ ត្រូវបានដឹកជញ្ជូនតាមរថយន្ត ទៅធ្វើចត្តាឡីស័ករយៈពេល១៤ថ្ងៃ នៅក្នុងក្រុងសំរោង ។
នៅព្រឹកនេះ ម៉ាស់ចំនួន ៤០ម៉ឺនម៉ាស់ (ម៉ាស់ក្រណាត់ ២០ម៉ឺនម៉ាស់ និងម៉ាស់កប្បាសចំនួន ២០ម៉ឺនម៉ាស់) ដែលជាអំណោយរបស់សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានដឹកមកដល់ច្រកទ្វារព្រំដែនអន្តរជាតិអូរស្មាច់ហើយ ដើម្បីត្រៀមចែកជូនបងប្អូនពលករ ដែលធ្វើការដំណើរចូលមកប្រទេសកម្ពុជា តាមរយៈច្រកទ្វារអន្តរជាតិអូរស្មាច់ ។
ក្រោមការណែនាំរបស់លោក ប៉ែន កុសល្យ អភិបាលខេត្តឧត្តរមានជ័យ រថយន្តដឹកជញ្ជូនពលករ គឺបានប្រើប្រាស់រថយន្តរបស់តំបន់ប្រតិបត្តិការសឹករងខេត្តចំនួន៤គ្រឿង និងរថយន្តរបស់ស្នងការដ្ឋានចំនួន១គ្រឿង ជាបណ្តោះអាសន្នសិន ។
ស្របពេលរថយន្តរបស់កងទ័ពចំនួន១៥គ្រឿងមកដល់ គឺរដ្ឋបាលខេត្តនឹងឈប់ប្រើរថយន្តសឹករង និងរថយន្តស្នងការនគរបាលខេត្ត ។ ពេលនេះរថយន្តកងទ័ពដែលមកដល់ គឺចំនួន៧គ្រឿង ត្រៀមចាំនៅមាត់ច្រកទ្វារអន្តរជាតិអូរស្មាច់ និង៨គ្រឿងទៀតត្រៀមចាំនៅខាងក្រោម ។
លោកប្រធានមន្ទីរសុខាភិបាលខេត្ត បានថ្លែងបញ្ជាក់អោយដឹងទៀតថា នៅថ្ងៃម្សិលម៉ិញ និងនៅថ្ងៃនេះ គឺក្រុមការងារកំពុងខិតខំប្រឹងប្រែង រៀបចំពង្រីកមណ្ឌលចត្តាឡីស័កបន្ថែមទៀត នៅតាមសាលារៀននានា ។ ហើយលោកក៏ថ្លែងនូវការអរគុណដល់កងកម្លាំងទាំងអស់ ដែលបានចូលរួមក្នុងសកម្មភាពនេះ ៕
ចែករំលែកព័តមាននេះ