រាជធានីភ្នំពេញ ៖ បើតាមមន្ទីរសុខាភិបាលខេត្តបាត់ដំបងបានអោយដឹងថា មកទល់ម៉ោង១២ថ្ងៃត្រង់ នាថ្ងៃទី២១ ខែធ្នូ នេះ មានពលករខ្មែរដែលអាជ្ញាថៃបញ្ជូនមកមានចំនួន១៧នាក់ ក្នុងនោះមានក្មេងតូចចំនួន២នាក់ ។…
រាជធានីភ្នំពេញ ៖ បើតាមមន្ទីរសុខាភិបាលខេត្តបាត់ដំបងបានអោយដឹងថា មកទល់ម៉ោង១២ថ្ងៃត្រង់ នាថ្ងៃទី២១ ខែធ្នូ នេះ មានពលករខ្មែរដែលអាជ្ញាថៃបញ្ជូនមកមានចំនួន១៧នាក់ ក្នុងនោះមានក្មេងតូចចំនួន២នាក់ ។ នេះបើតាមទូរទស្សន៍ជាតិកម្ពុជា ។
លោក វឿង ប៊ុនរ៉េត ប្រធានមន្ទីរសុខាភិបាលខេត្តបាត់ដំបងមានប្រសាសន៍ថា ពលករដែលត្រូវបញ្ជូនមកទាំង១៧នាក់ នាថ្ងៃទី២១ ខែធ្នូនេះត្រូវបានបញ្ជូនអោយធ្វើចត្តាឡីស័កនៅមណ្ឌលសុខភាពត្រាង ស្រុកកំរៀងចំនួន១៤ថ្ងៃ ។
លោកប្រធានមន្ទីរបញ្ជាក់ថា ក្រោយពីការណែនាំរបស់ក្រសួងសុខាភិបាល និងសាររបស់សម្តេចតេជោ ហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជា ឯកឧត្តម ងួន រតនៈ អភិបាលនៃគណៈអភិបាលខេត្តបានបញ្ជូនក្រុមការងារចតា្តឡីស័ក និងមន្ត្រីពាក់ព័ន្ធរៀបចំទីតាំងទទួលពលករខ្មែរប្រចាំនៅស្រុកសំពៅលូន និងស្រុកកំរៀង ។ ទីតាំងនោះ មាននៅច្រកភ្នំដី ស្រុកសំពៅលូន រៀបចំកន្លែងធ្វើចត្តាឡីស័កកម្រិត១ នៅសាលាបឋមសិក្សាជ្រៃសីមា ដែលមាន១០បន្ទប់ ក្នុងមួយបន្ទប់អាចដាក់បាន៦ទៅ៨គ្រែ និងមន្ទីរពេទ្យបង្អែកសំពៅលូន ធ្វើជាកន្លែងចត្តាឡីស័កកម្រិត២ ដែលមាន ៤បន្ទប់ទៀត ។
ចំណែកនៅច្រកអន្តរជាតិដូង ស្រុកកំរៀង បានរៀបចំធ្វើជាទីកន្លែងចត្តាឡីស័កកម្រិត១នៅសាលាវិទ្យាល័យកំរៀង មាន៤២បន្ទប់ ក្នុងមួយបន្ទប់មាន៨ទៅ១០គ្រែ និង រៀបចំកន្លែងធ្វើចត្តាឡីស័ក ប្រភេទពីរ នៅមណ្ឌលសុខភាពត្រាង ស្រុកកំរៀងដែលអាចដាក់បានមនុស្សចំនួន ២១នាក់។
លោកបញ្ជាក់ថា មន្ត្រីជំនាញ និងអាជ្ញាធរកំពុងរៀបចំ និងសម្អាតទីតាំងខាងលើនេះ ដោយមានមន្ត្រីប្រចាំការនៅទីនោះ និងមានរថយន្តយោធាដែលប្រមុខរដ្ឋាភិបាលបញ្ជូនមកពីភ្នំពេញ ក៏បានមកដល់ទីតាំងហើយដែរ ដើម្បីត្រៀមទទួលពលករដែលថៃបញ្ជូនមក។
សូមបញ្ជាក់ថា សម្តេចតេជោ ហ៊ុនសែន បានដាក់បទបញ្ជាទៅអាជ្ញាធរខេត្តចំនួន៧ ដែលនៅជាប់ព្រំដែន កម្ពុជា-ថៃ អោយពង្រឹងការធ្វើចត្តាឡីស័កសម្រាប់ពលករខ្មែរដែលត្រឡប់មកពីប្រទេសថៃវិញចំនួនរយៈពេល១៤ថ្ងៃដើម្បីទប់ស្កាត់ការចម្លងជំងឺកូវីដ១៩ ដែលកំពុងផ្ទុះឡើងខ្លាំងដែលមានជាង៥០០ករណី ក្នុង១ថ្ងៃ នៅខេត្តសាមុតសាខន ប្រទេសថៃ ។
ខេត្តទាំង៧ដែលជាប់ព្រំដែនជាមួយថៃនោះ មានខេត្តបាត់ដំបង បន្ទាយមានជ័យ ប៉ៃលិន ព្រះវិហារ ឧត្តរមានជ័យ ពោធិសាត់ និង ខេត្តកោះកុង ៕
ចែករំលែកព័តមាននេះ