រាជធានីភ្នំពេញ ៖ ធនាគារ អេស៊ីលីដា ភីអិលស៊ី បានប្រកាសនឹងប្តូររូបរាងថ្មីសម្រាប់ ធនាគារចល័តដោយផ្ដោតលើការប្រើប្រាស់តាមប្រព័ន្ធទូរស័ព្ទ ហើយក៏ប្រកាសថា នឹងមិនយកថ្លៃសេវាកម្មសម្រាប់ប្រើប្រាស់កម្មវិធីទូរស័ព្ទដៃរបស់ធនាគារ អេស៊ីលីដា ផងដែរ ។ ការសម្រេចនេះគឺដើម្បីជំរុញឱ្យប្រជាពលរដ្ឋងាកមកប្រើប្រាស់សេវាធនាគារចល័តកាន់តែច្រើនឱ្យសាកសមនឹងការរីកចម្រើននៃវិស័យបច្ចេកវិទ្យាធនាគារនៅកម្ពុជា ។
បើតាមលោកស្រី សុខ សោភា នាយិកាប្រតិបត្តិទីផ្សារ ធនាគារ អេស៊ីលីដា បានមានប្រសាសន៍យ៉ាថា App អេស៊ីលីដាទាន់ចិត្ត បានបង្កើតឡើង៤ឆ្នាំមកហើយ ហើយវាក៏ជា App Digital ដែលបានបង្កើតឡើងដំបូងគេបំផុតរបស់ធនាគារ អេស៊ីលីដា បម្រើជូនអតិថិជនក្នុងវិស័យហិរញ្ញវត្ថុ ។ ការអភិវឌ្ឍអេស៊ីលីដាទាន់ចិត្ត ទៅជា អេស៊ីលីដាម៉ូបាល ( Acleda Mobile ) មានរូបរាងថ្មី នៅឆ្នាំក្រោយនេះ គឺជាការឆ្លើយតបទៅនឹងភាពរីកចម្រើននៃបច្ចេកវិទ្យារបស់ពិភពលោក និងវ័យវឌ្ឍនភាពរបស់ធនាគារ ក្នុងវិស័យឌីជីថល ក៏ដូចជាតម្រូវការរបស់អ្នកប្រើប្រាស់ ។
លោកស្រីបានឲ្យដឹងទៀតថា ធនាគារ អេស៊ីលីដា បានរៀបចំហេដ្ឋារចនាសម្ព័ន្ធបច្ចេកវិទ្យា ជាមួយជម្រើសយ៉ាងសម្បូរបែបសម្រាប់បម្រើប្រតិបតិ្តការធនាគារ តាមរយៈម៉ាស៊ីនដក-ដាក់ប្រាក់ ជាង ៧០០ គ្រឿង នៅតាមបណ្តាទីតាំង ៣៤០ ដោយស្វ័យប្រតិបតិ្តការ ២៤ ម៉ោងក្នុងមួយថ្ងៃ ៧ ថ្ងៃក្នុងមួយសប្តាហ៍ ។ លោកស្រីនិយាយថា «យើងស្តាប់អតិថិជន យើងដឹងពីអ្វីដែលអតិថិជនត្រូវការ ហើយយើងបំពេញតម្រូវការពួកគាត់ ។ ដូច្នេះហើយបានជាធនាគារ អេស៊ីលីដា ខិតខំអភិវឌ្ឍន៍ផលិតផលរបស់ខ្លួនជាប្រចាំឲ្យស័ក្តិសមនឹងអតិថិជនដ៏ឆ្លាតវៃរបស់យើងដែលអាចចាត់ចែងពេលវេលាដោយខ្លួនឯងមិនចាំបាច់មកធនាគារដោយផ្ទាល់» ។
បច្ចុប្បន្ន ធនាគារ អេស៊ីលីដា កំពុងធ្វើឲ្យកាន់តែទាន់សម័យនូវមុខងារបន្ថែមទៀតដើម្បីបំពេញតម្រូវការអតិថិជនឲ្យកាន់តែសម្បូរបែបក្នុងការប្រើប្រាស់សេវាកម្មជាច្រើនដែលមាននៅក្នុងអេស៊ីលីទាន់ចិត្ត ដូចជា ស្កែនទូទាត់តាមឃ្យូអរកូដក្នុងការទូទាត់ទំនិញ ផ្ទេរប្រាក់មិនអស់កម្រៃសេវា បញ្ចូលទឹកប្រាក់ទូរស័ព្ទ បង់ថ្លៃវិក្កយបត្រអគ្គិសនី និងវិក្កយបត្រផ្សេងៗ ពិនិត្យមើលសមតុល្យគណនី និងរបាយការណ៍គណនីសង្ខេប ដាក់-ដកប្រាក់ បង់ប្រាក់ សំណើសុំឥណទាន និងការបើកគណនីមានកាលកំណត់ ជាដើម ។
សូមបញ្ជាក់ថា គិតមកទល់ថ្ងៃទី ៣០ ខែវិច្ឆិកា ឆ្នាំ ២០២០ ធនាគារ អេស៊ីលីដា ភីអិលស៊ី មានអតិថិជនប្រមាណជាង ១ លាន ៧ សែននាក់ កំពុងប្រើប្រាស់អេស៊ីលីដាទាន់ចិត្ត មានម៉ាស៊ីនអេធីអឹមសម្រាប់ដកប្រាក់-ដាក់ប្រាក់ នៅទូទាំងប្រទេសសរុប ៧២២ គ្រឿង មានម៉ាស៊ីនឆូតកាតជិត ៤៣០០ គ្រឿង និងប័ណ្ណដកប្រាក់អេស៊ីលីដាមានដល់ទៅជាង ១ លានប័ណ្ណ ៕ ដោយសហការ
ចែករំលែកព័តមាននេះ