ខេត្តសៀមរាប ៖ ដង្កូវរុយទាហានខ្មៅ ត្រូវបានប្រទេសជាច្រើនលើពិភពលោក យកមកធ្វើជាចំណីធម្មជាតិរបស់សត្វ និងមានក្រុមហ៊ុនមួយចំនួនផលិតជាអាហាររបស់មនុស្សផងដែរ ។ នេះបើតាមទូរទស្សន៍ជាតិកម្ពុជាបានចុះផ្សាយនាយប់ថ្ងៃទី១៩ ខែធ្នូនេះ ។…
ខេត្តសៀមរាប ៖ ដង្កូវរុយទាហានខ្មៅ ត្រូវបានប្រទេសជាច្រើនលើពិភពលោក យកមកធ្វើជាចំណីធម្មជាតិរបស់សត្វ និងមានក្រុមហ៊ុនមួយចំនួនផលិតជាអាហាររបស់មនុស្សផងដែរ ។ នេះបើតាមទូរទស្សន៍ជាតិកម្ពុជាបានចុះផ្សាយនាយប់ថ្ងៃទី១៩ ខែធ្នូនេះ ។
សម្រាប់ខេត្តសៀមរាប ការចិញ្ចឹមរុយទាហានខ្មៅ (BLACK SOLDIER FLY) ជាបទពិសោធន៍ថ្មីមួយសម្រាប់កសិករ ដើម្បីផលិតបានដង្កូវ ធ្វើជាចំណីសត្វសម្រាប់កសិដ្ឋាន ឬលក្ខណៈគ្រួសារ ។
នៅថ្ងៃទី១៩ ខែធ្នូ ឆ្នាំ២០២០ លោក ហេង ណាគ្រី ម្ចាស់កសិដ្ឋានចិញ្ចឹមរុយមួយកន្លែង ស្ថិតនៅភូមិព្រៃធ្លក ឃុំខ្នាត ស្រុកពួក ខេត្តសៀមរាប បានលើកឡើងថា ផ្តើមចេញពីបញ្ហាជីវភាពក្នុងវិបត្តិកូវីដ-១៩ លោកបានស្រាវជ្រាវមុខរបរថ្មីណាមួយប្លែក ងាយរកទីផ្សារ ប៉ុន្តែការចិញ្ចឹមរុយនេះ មិនមែនថ្មីសម្រាប់ពិភពលោកទេ។
តាមរយ:ការចុះផ្សាយរបស់ក្រុមហ៊ុនផលិតអាហារ Crickster របស់ប្រទេស ដេនម៉ាក រុយទាហានខ្មៅ អាចពងបានប្រមាណ៥០០ ពងក្នុងមួយលើកៗ ។ កូនដង្កូវ ដែលញាស់ និងមានអាយុកាលគ្រប់គ្រាន់ទម្ងន់ ១០គីឡូក្រាម អាចធ្វើជាចំណីសត្វគោមួយក្បាល ដែលផលិតសាច់បាន ១គីឡូក្រាមត្រឡប់មកវិញ។
លោក ហេង ណាគ្រី បន្ថែមថា ការចិញ្ចឹមរុយទាហានខ្មៅ មិនលំបាកក្នុងការរកចំណីឡើយ វារស់ដោយសារតែការជញ្ជក់ទឹកសន្សើម ឬទឹកធម្មតាតែប៉ុណ្ណោះ ។ រីឯកូនដង្កូវរបស់វាស៊ីតែសំណល់បន្លែផ្លែឈើ ឬសំណល់ផ្ទះបាយជាដើម គឺមិនលំបាកស្វែងរកចំណីឡើយ ។ វដ្តជីវិតរបស់សត្វរុយទាហានខ្មៅ មានរយ:ពេល៤៥ថ្ងៃ ចាប់ផ្តើមពីពងញាស់ជាដង្កូវ ការប្តូរភេទពីដង្កូវ ក្លាយជារុយ និងទម្លាក់ពង ។ ក្នុងមួយជីវិតសត្វរុយមួយក្បាល វាអាចទម្លាក់ពងបានប្រមាណ ២០ម៉ឺនពង។ ចំពោះតម្លៃ ដង្កូវចំណីសត្វ អាចលក់បានក្នុង១គីឡូក្រាម តម្លៃ៤,០០០រៀល ឬស្មើនឹង១ដុល្លារ ។ ដោយឡែកដង្កូវសម្រាប់ធ្វើពូជមាន១គីឡូក្រាម តម្លៃ១០ដុល្លារ ចំណែកឯពងរុយសម្រាប់ធ្វើពូជវិញមានតម្លៃ ៧០០ដុល្លារ ក្នុង១គីឡូក្រាម។
សូមបញ្ជាក់ ៖ គិតត្រឹមខែវិច្ឆិកា ឆ្នាំ២០២០ លោកមានអតិថិជនមកពីបណ្តាខេត្តផ្សេងៗ ប្រមាណជា២០០នាក់ហើយ មកទទួលយកការផ្ទេរចំណេះដឹង អំពីការរៀបចំ និងដំណើរការកសិដ្ឋានចិញ្ចឹមរុយនេះផងដែរ ៕
ចែករំលែកព័តមាននេះ