រាជធានីភ្នំពេញ ៖ ដំណើរការជួសជុលកែលម្អហេដ្ឋារចនាសម្ព័ន្ធផ្លូវថ្នល់ក្នុងរាជធានីភ្នំពេញ ក្រោយជំនន់ទឹកភ្លៀង បានដំណើរការយ៉ាងសកម្មស្របតាមអនុសាសន៍ដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជា ណាចក្រកម្ពុជា និងការដឹកនាំអនុវត្តដោយផ្ទាល់ពី…
រាជធានីភ្នំពេញ ៖ ដំណើរការជួសជុលកែលម្អហេដ្ឋារចនាសម្ព័ន្ធផ្លូវថ្នល់ក្នុងរាជធានីភ្នំពេញ ក្រោយជំនន់ទឹកភ្លៀង បានដំណើរការយ៉ាងសកម្មស្របតាមអនុសាសន៍ដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជា ណាចក្រកម្ពុជា និងការដឹកនាំអនុវត្តដោយផ្ទាល់ពី លោក ឃួង ស្រេង អភិបាលរាជធានីភ្នំពេញក្នុងន័យធ្វើឲ្យប្រសើរឡើងវិញនូវហេដ្ឋារចនាសម្ព័ន្ធផ្លូវថ្នល់ ក៏ដូចប្រពន្ធ័លូដែលខូចខាតដោយសារជំនន់ទឹកភ្លៀងនាពេលកន្លងមក។
នៅព្រឹកថ្ងៃទី១៦ ធ្នូនេះ ក្រុមការងាររដ្ឋបាលរាជធានីភ្នំពេញ និងរដ្ឋបាលខណ្ឌមានជ័យសហការជាមួយមន្ទីរសាធារណៈការ និងដឹកជញ្ជូនរាជធានីភ្នំពេញ បានដំណើរការជួសជុលផ្លូវអ្នកឧកញ៉ាព្រឹទ្ធាចារ្យហ៊ុន នាង តភ្ជាប់ពីកំណាត់ផ្លូវជាតិលេខ២ ទៅផ្លូវសម្តេចតេជោ ហ៊ុន សែន (ផ្លូវ៦០ម៉ែត្រ)ក្នុងភូមិសាស្ត្រសង្កាត់ ចាក់អង្រែលើ ខណ្ឌមានជ័យប្រវែង៤៥០ម៉ែត្រ មានទទឹងចាប់ពី៨ម៉ែត្រដល់១៩ម៉ែត្រ។ លោក ឌី រត្ន័ខេមរុណ អភិបាលរងខណ្ឌមានជ័យបានប្រាប់ឲ្យដឹងថា៖ ផ្លូវនេះជាផ្លូវអាទិភាពអាចរំដោះចរាចរបានច្រើនពីផ្លូវជាតិលេខ២ទៅផ្លូវ៦០ម៉ែត្រ ដោយមើលឃើញចំណុចនេះទើប លោក ឃួង ស្រេង បានសម្រេចឲ្យមានការជួសជុលកែលម្អ ជាចាំបាច់ និងតាមសំណូមពររបស់ប្រជាពលរដ្ឋ។
លក្ខណៈនៃការជួសជុលគឺបកកៅស៊ូចាស់ចេញរួចធ្វើគ្រឹះថ្មីចាក់បេតុង និងចាក់កៅស៊ូពីលើបេតុងមួយជាន់ទៀត។ អ្វីដែលជាការលំបាករបស់ក្រុមការងារធ្វើផ្លូវនេះគឺមានផ្ទះប្រជាពលរដ្ឋ២ខ្នងដែលមិនបានចូលរួមសហការជាមួយអាជ្ញាធរ នៅពេលផ្ទះទាំង២ខ្នងនោះ ប៉ះលើចំណីផ្លូវត្រូវពង្រីកដោយទាមទាសំណងរាប់សែនដុល្លារដែលអាជ្ញាធរមិនអាចដោះស្រាយបាន និងធ្វើឲ្យផ្លូវនេះមានលក្ខណៈកដបមិនបានពេញ១៩ម៉ែត្រ។
ដោយឡែកនៅព្រឹកថ្ងៃទី១៦ ធ្នូនេះដែរ ដំណើរការជួសជុល និងពង្រីកកំណាត់ផ្លូវជាតិលេខ៥ ក្នុងភូមិសាស្ត្រខណ្ឌឫស្សីកែវក៏បានដំណើរការដែរ។ លោក ជា ពិសី អភិបាលខណ្ឌឫស្សីកែវបានឲ្យដឹងថា៖ ទីតាំងដែលកំពុងជួសជុលនេះ តែងទទួលរងការដក់ទឹកភ្លៀងជាប្រចាំទើបកាលពីពេលថ្មីៗនេះ អាជ្ញាធរខណ្ឌ បានបើកមុខទឹកមួយកន្លែងដើម្បីនាំទឹកភ្លៀងដែលដក់លើផ្លូវនេះ ហូរទៅទន្លេតាមប្រពន្ធ័លូមុខកាត់១ម៉ែត្រកន្លះប្រវែង២៥០ម៉ែត្រ។
លោកបន្តថាការជួសជុលផ្លូវនេះធ្វើឡើងប្រវែង១១០០ម៉ែត្រ ចាប់ពីរោងចក្រSKD ដល់មុខសាលាខណ្ឌឫស្សីកែវ ដោយជួសជុលអ៊ុតកៅស៊ូ និងពង្រីកផ្លូវឲ្យបានទទឹង៥ម៉ែត្របន្ថែមដើម្បីសម្រួលចរាចរកុំឲ្យកកស្ទះ។ក្នុងនាមប្រជាពលរដ្ឋក្នុងខណ្ឌឫស្សីកែវ។ លោក ជា ពិសី បានថ្លែងអំណរគុណយ៉ាងជ្រាលជ្រៅដល់សម្តេចអគ្គមហាសេនាបតីតេជោ ហ៊ុន សែន ក៏ដូចលោក ឃួង ស្រេង ដែលបានសម្រេចឲ្យធ្វើការជួសជុលកែលម្អផ្លូវដែលខូចខាតដោយជំនន់ទឹកភ្លៀងនាពេលកន្លងមកដើម្បីឲ្យប្រជាពលរដ្ឋមានភាពងាយស្រួលក្នុងការធ្វើដំណើរ។
ហើយការងារជួសជុលកែលម្អនេះនឹងបន្តធ្វើនៅគ្រប់ទីតាំង ឬផ្លូវដែលមានការខូចខាតក្រោយជំនន់ទឹកភ្លៀង ដែលរដ្ឋបាលរាជធានីភ្នំពេញគ្រោងនឹងធ្វើការជួសជុលកែលម្អសរុប២៩ខ្សែក្នុងភូមិសាស្ត្ររាជធានីភ្នំពេញ៕ ដោយ ៖ ចន ណារិទ្ធ
ចែករំលែកព័តមាននេះ