ខេត្តរតនគិរី ៖ យោងតាមអង្គការជីវិតសត្វស្លាបអន្តរជាតិ នៅថ្ងៃទី ១៤ ខែធ្នូ ឆ្នាំ២០២០នេះថា សត្វត្រដក់តូច គឺប្រភេទបក្សីកំពុងរងគ្រោះ សត្វនេះមានវត្តមាន និងពងកូនជាប្រចាំនៅដែនជម្រកសត្វព្រៃលំផាត់ ក្នុងខេត្តរតនគិរី ។ ក្នុងរដូវកាលពងកូនឆ្នាំ២០២០នេះ ក្រុមការងារយើងបានរកឃើញសំបុកសត្វត្រដក់តូចបានចំនួន៥សំបុកនាដែនជម្រកសត្វព្រៃនេះ ២ សំបុកបានបរាជ័យ ។ បើប្រៀបធៀបទៅនឹងឆ្នាំ២០១៩ សំបុកសត្វនេះមានការថយចុះគួអោយព្រួយបារម្ភ ។ ការបាត់បង់ទីជម្រក (ទីតាំងពងកូន និងរកចំណី) និងការរំខានដោយសកម្មភាពមនុស្សជាដើម។
យោងតាមការថ្លែងប្រាប់សារព័ត៌មានកោះសន្តិភាព នៅថ្ងៃនេះរបស់លោក ប៊ូ វរសក្ស នាយកកម្មវិធីនៃអង្គការជីវិតសត្វស្លាបអន្តរជាតិ (BirdLife International Cambodia Programme) បានឱ្យដឹងថា «មានកត្តាជាច្រើនដែលបានធ្វើឱ្យចំនួនសត្វបក្សីប្រភេទនេះមានការថយចុះ គឺដោយកត្តាបាត់បង់ទីជំរក យើងឃើញថា ទីតាំងដែលធ្លាប់ពពួនឥឡូវត្រូវបានធ្វើផ្លូវឆ្លងកាត់ មានមនុស្សចេញចូលច្រើន រីឯទីតាំងដែលនៅជិតវាលកំបោរនឹង ចាប់មានអាជីវកម្មរ៉ែថ្ម ដែលធ្វើឱ្យមានការរំខានអារម្មណ៍ដល់ពួកវា។ ដូចនេះយើងកំពុងធ្វើការតាមដាន ក្នុងការបំលាស់ទីរបស់ពួកវា ដោយយើងមិនទាន់ដឹងទេថា ពួកវាបានផ្លាស់ទៅទីណា ព្រោះទីតាំងនៅក្នុងលំផាត់មាន ២៥ ម៉ឺនហិកតា ដូចនេះពួកយើងកំពុងធ្វើការនឹង»។
លោកបន្តថា ចំពោះវិធានការណ៍តាមដែលយើងអាចធ្វើទៅបាន គឺទី១ ៖ យើងព្យាយាមកាត់បន្ថយពីការរំខានរបស់មនុស្សទៅសត្វទាំងនោះ ដោយផ្ទាល់ក្តីឬប្រយោលក្តី(អចេតនា)។ ដោយផ្ទាល់នោះ គឺដូចជាការកាប់ឈើ ឬក៏ការឡើងយកសំបុកកូនជាដើម។ ចំពោះដោយប្រយោលនោះ គឺអ្នកខ្លះគាត់មិនមានបំណងទេ (អចេតនា) ដោយគាត់គ្រាន់តែជាអ្នកធ្វើដំណើរក្បែរនឹង ឬក៏ដកហូតធនធានធម្មជាតិក្បែរនឹង ក៏ធ្វើឱ្យវាផ្អើលដែរ នោះគឺយើងធ្វើការអប់រំ និងការផ្សព្វផ្សាយ និងយើងការពារកុំឱ្យមនុស្សទៅក្បែរនឹង។
និងទី ២ ៖ យើងនឹងព្យាយាមស្តារ ទីជំរកវាដែលបានបាត់បង់នឹងឡើងវិញ ចំពោះការរំខានដោយអាជីវកម្មឬករណីផ្សេងៗនោះ យើងនឹងជំរាបជូនរាជរដ្ឋាភិបាលអំពីបញ្ហាផលប៉ះពាល់ទាំងនេះផងដែរ ជាពិសេសនឹងជំរាបជូនដល់ក្រសួងបរិស្ថាន និងក្រសួងពាក់ព័ន្ធមួយចំនួន ដោយសង្ឃឹមថាពួកយើងនឹងធ្វើការរួមគ្នា ដើម្បីកាត់បន្ថយផលប៉ះពាល់ទាំងអស់នឹង។
លោកបានបន្ថែមថា លំផាត់គឺជាទីតាំងដ៏ល្អ សម្រាប់ការងារអភិរក្ស និងមានវត្តមានសត្វត្រយ៉ងយក្ស ដែលជានិមិត្តសញ្ញាបក្សីជាតិ ហើយថ្មីនេះយើងបានរកឃើញផូស៊ីលដើមឈើថ្មដែលមានអាយុរាប់លានឆ្នាំ (រកឃើញក្នុងតំបន់ការពារធម្មជាតិដែនជម្រកសត្វព្រៃលំផាត់ ខេត្តរតនគិរី ដែលមានទំរង់ជាដើមឈើថ្ម មានប្រវែង១៧ម៉ែត្រ មានឫស បំណែកស្លឹក សំបក ត្រូវបានកំណាយ ដោយក្រុមអ្នកជំនាញរបស់ក្រសួងបរិស្ថាន និងស្ថិតក្រោមការការពារអភិរក្សរបស់ឆ្មាំ នៃមន្ទីរបរិស្ថានខេត្តរតនគិរី)។ យើងត្រូវការការចូលរួមទាំងអស់គ្នា ទាំងអង្គការនានា ទាំងសហគមន៍ ទាំងអាជ្ញាធរមូលដ្ឋាន រួមទាំងក្រសួងដែលពាក់ព័ន្ធទាំងអស់ ដើម្បីការពារដែនជំរកសត្វព្រៃនេះ ដែលជាមរតកមិនអាចកាត់ថ្លៃបានឱ្យបានគង់វង្ស និងសូមប្រជាជនទាំងអស់គ្នាចូលរួមផងដែរ ដើម្បីកុំឱ្យសត្វប្រភេទកម្រនេះកាន់តែថយចុះទៅៗ គ្មានការចូលរួមពីអ្នកទាំងអស់គ្នាពួកយើងនឹងមិនបានទទួលភាពជោគជ័យនោះទេ៕
ចែករំលែកព័តមាននេះ