រាជធានីភ្នំពេញ ៖ រថយន្តកុងតឺន័រមួយគ្រឿង បើកលឿនជ្រុលចង្កូតបុកឡើងឃឿនសួនច្បារហោះរំលងផ្លូវធ្លាក់ប្រឡាយទឹក រងការខូចខាតយ៉ាងធ្ងន់ធ្ងរ បង្កការភ្ញាក់ផ្អើល កាលពីវេលាម៉ោង៧យប់ ថ្ងៃទី៩ ខែធ្នូ ឆ្នាំ២០២០ នៅតាមបណ្ដោយផ្លូវជាតិលេខ៣ ភូមិគោកខ្សាច់ សង្កាត់ភ្លើងឆេះរទេះ ខណ្ឌកំបូល ។
ប្រភពព័ត៌មានបានឲ្យដឹងថា រថយន្តកុងតឺន័រ ពណ៌លឿង ពាក់ស្លាកលេខភ្នំពេញ 3C-3698 បើកបរក្នុងទិសដៅពីជើងទៅត្បូងក្នុងល្បឿនយ៉ាងលឿន លុះមកដល់ចំណុចកើតហេតុ ក៏ស្រាប់តែមានរថយន្តមួយគ្រឿងទៀត ដែលមិនស្គាល់ម៉ាកបានបើកវ៉ាជែងស្ដាំទើបរថយន្តកុងតឺន័របួងចង្កូតផ្នែកខាងឆ្វេងជ្រុលទៅបុកឡើងឃឿនសួនច្បារ ពុះចែកទ្រូងផ្លូវហោះរំលងផ្លូវពីម្ខាងទៅផ្លូវម្ខាងទៀត បណ្ដាលឲ្យធ្លាក់ប្រឡាយទឹកទៅមុខលែងរួច រងការខូចខាតយ៉ាងធ្ងន់ធ្ងរ ខណៈពេលភ្លាមៗនោះដែរ ស្រាប់តែមានរថយន្តមួយគ្រឿងទៀតបានមកអូសរថយន្តចេញពីកន្លែងកើតហេតុ ជាង១០០ម៉ែត្រទៅដាក់អែបខាងដើម្បីកុំអោយស្ទះចរាចរណ៍ បន្ទាប់មកក៏មានកំលាំងសមត្ថកិច្ចនគរបាលប៉ុស្តិ៍ភ្លើងឆេះរទេះបានចុះមកដល់ទាក់ទងទៅក្រុមហ៊ុនចិនមកចរចាគ្នា ។
ក្រោយពេលកើតហេតុរថយន្តបង្កបានដោះស្រាយសងការខូតខាតដើមផ្ការបស់ក្រុមហ៊ុនចិនបញ្ចប់រឿងនៅកន្លែងកើតហេតុ ៕
ចែករំលែកព័តមាននេះ