រាជធានីភ្នំពេញ ៖ រថយន្តដឹកទំនិញមួយគ្រឿង ខណៈអ្នកបើកបររយ៉ែថយក្រោយ ខ្វះការប្រុងប្រយ័ត្នក៏ជ្រុលទៅបុកកិនម៉ូតូ ZOOMER X ដែលជិះដោយបុរសម្នាក់ក្នុងទិសដៅ បញ្ច្រាសគ្នា បណ្តាលឲ្យអូសម៉ូតូចូលក្រោមរថយន្ត តែសំណាងល្អមិនមានគ្រោះថ្នាក់ដល់មនុស្ស ។
ហេតុការណ៍នេះបានកើតឡើង នៅវេលាម៉ោង៨យប់ ថ្ងៃទី៨ ខែធ្នូ ឆ្នាំ២០២០ នៅតាមបណ្ដោយផ្លូវ៦០ម៉ែត្រ ភូមិព្រែកតាឡុង សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ។
តាមប្រភពព័ត៌មានពីកន្លែងកើតហេតុ បានអោយដឹងថា មុនពេលកើតហេតុ គេបានឃើញ បុរសម្នាក់បានជិះម៉ូតូម៉ាក ZOMER X ពណ៌ស លាយក្រហម ពាក់ស្លាកលេខស្វាយរៀង 1M 4152 បានជិះធ្វើដំណើរតាមបណ្ដោយផ្លូវ៦០ម៉ែត្រ ក្នុងទិសដៅពីជើងទៅត្បូងលុះមកដល់ចំនុចកើតហេតុ បានបន្ថយល្បឿនម៉ូតូតិចៗ ហើយគាប់ជួនពេលនោះដែរក៏ស្រាប់តែបុរសម្នាក់បានបើករថយន្តដឹកទំនិញធន់ធំមួយគ្រឿង ម៉ាកហ៊ីយុនដាយ ពណ៌ទឹកប្រាក់ ពាក់ស្លាកលេខ ភ្នំពេញ 3E 0238 បានបើករថយន្តរយ៉ែថយក្រោយ ដោយមិនបានមើលក្រោយអោយបានច្បាស់លាស់ ក៏ជ្រុលទៅបុកកិនម៉ូតូអូសចូលពីក្រោមរថយន្ត ប្រហែល១០ម៉ែត្រ បណ្ដាលឲ្យរងការខូចខាតមួយចំហៀងខាងឆ្វេងយ៉ាងដំណំ ដោយមនុស្សវិញ មិនមានរងរបួសដោយសារ លោតចេញពីលើម៉ូតូទាន់ពេលផងដែរ ។
ក្នុងហេតុការណ៍នេះ ម្ចាស់រថយន្តមិនបានពឹងសមត្ថកិច្ចនោះទេ ព្រោះអាងមានក្រុមហ៊ុនធានារ៉ាប់រងមកដោះស្រាយជាមួយខាងម៉ូតូ ។ លុះក្រុមហ៊ុនធានារ៉ាប់រងមកដោះស្រាយនិងយាយមិនត្រូវ ទើបផ្អើលដល់សមត្ថកិច្ចមូលដ្ឋានក៏ដូចជា ជំនាញចរាចរណ៍ខណ្ឌមានជ័យចុះទៅកន្លែងកើតហេតុផងដែរ ។
ក្រោយពេលកើតហេតុ បន្ទាប់ពីឃើញសមត្ថកិច្ចមូលដ្ឋានក៏ដូចជា ជំនាញចរាចរណ៍ខណ្ឌចុះទៅ ស្រាប់តែភាគីទាំងសងខាងបានសម្របសម្រួលគ្នាយ៉ាងលឿនដោយខាងក្រុមហ៊ុនធានារ៉ាប់រង សុខចិត្តជួសជុលម៉ូតូអោយស្អាតដូចដើមវិញ ដើម្បីបញ្ចប់រឿងតែម្ដង ៕
ចែករំលែកព័តមាននេះ