រាជធានីភ្នំពេញ ៖ យុវជន២នាក់ជិះម៉ូតូមួយគ្រឿងម៉ាកស៊ុយសុគីនិច គោលបំនងជិះទៅលេងកោះពេជ្រ ខណៈពេលដែលជិះសុខៗ ស្រាប់តែលេចមុខជនបង្កមួយក្រុមធ្វើការដេញវាយយកម៉ូតូបានសម្រេច ហើយបំរុងរត់គេចខ្លួនត្រូវបានសមត្ថកិច្ចខណ្ឌដូនពេញធ្វើការឃាត់ខ្លួនបាន៩នាក់ ដែលហេតុការណ៍នេះ បានកើតឡើង កាលពីវេលាម៉ោង៩យប់ ថ្ងៃទី៦ ខែធ្នូ ឆ្នាំ២០២០ តាមបណ្តោយផ្លូវ178 កែងផ្លូវព្រះនរោត្តមនៅចំណុចកែងវិទ្យាល័យព្រះស៊ីសុវត្ថិស្ថិតនៅក្នុងសង្កាត់ផ្សារថ្មី៣ខណ្ឌដូនពេញ ។
សាក្សីដែលឃើញហេតុការណ៍បានអោយដឹងថា មុនពេលកើតហេតុគេបានឃើញយុវជន២នាក់ ជាជនរងគ្រោះជិះម៉ូតូមួយគ្រឿងម៉ាកស៊ុយសុគីនិច ពណ៌ខៀវលាយស ពាក់ស្លាកលេខភ្នំពេញ1IM4940 បើកបរតាមបណ្តោយផ្លូវព្រះមុនីវង្សក្នុងទិសដៅពីជើងទៅត្បូងគោលបំនងជិះទៅលេងនៅក្នុងកោះពេជ្រ ខណៈពេលដែលជិះបានពាក់កណ្តាលផ្លូវក៏ស្រាប់តែលេចមុខជនបង្កមួយក្រុមមានគ្នាជាង៣០នាក់ បានធ្វើសកម្មភាពព្រួតវាយធ្វើឲ្យជនរងគ្រោះភ័យស្លន់ស្លោផ្តួលម៉ូតូ ហើយរត់គេចខ្លួនទើបជនបង្កបាននាំគ្នាលើកយកម៉ូតូរបស់ជនរងគ្រោះបំរុងគេចខ្លួនត្រូវបានសមត្ថកិច្ចខណ្ឌ៧មករា ប្រទះឃើញធ្វើការឃាត់បានម៉ូតូយកមកប៉ុស្តិ៍អូរឬស្សី៤ និងបក្សពួកជនបង្កវិញ ត្រូវបានសមត្ថកិច្ចខណ្ឌដូនពេញឃាត់បានចំនួនសរុបទាំងអស់៩នាក់ ។
ក្នុងនោះ២នាក់ មានឈ្មោះ មុត ឧត្តម អាយុ17ឆ្នាំ និងម្នាក់ទៀតមានឈ្មោះ វិបុល ខេនវិដេល ភេទប្រុស អាយុ17ឆ្នាំ ចំណែកឯ៧នាក់ទៀត មិនទាន់ស្គាល់ឈ្មោះយកទៅសួរនាំនៅអធិការដ្ឋាននគរបាលខណ្ឌដូនពេញ ដោយឡែកជនរងគ្រោះម្នាក់ត្រូវបានរងរបួសបែកក្បាល ។
ក្រោយពេលកើតហេតុជនរងគ្រោះបានទៅដាក់ពាក្យបណ្តឹងនៅអធិការដ្ឋាននគរបាល ខណ្ឌដូនពេញដើម្បីអោយសមត្ថកិច្ចធ្វើតាមច្បាប់ ៕
ចែករំលែកព័តមាននេះ