រាជធានីភ្នំពេញ ៖ និស្សិតម្នាក់បានបើករថយន្តមួយគ្រឿងទៅអង្គុយលេងតាមចិញ្ចើមផ្លូវរួមជាមួយមិត្តភក្តិ៥ទៅ៧នាក់ទៀត ដោយជិះម៉ូតូ៣គ្រឿងក៏ត្រូវក្មេងទំនើងយកដាវកាប់ច្រើនកាំបិត បណ្តាលឱ្យរងរបួសធ្ងន់ធ្ងរតែម្តង បង្កឱ្យមានការភ្ញាក់ផ្អើលកាលពីម៉ោង៦និង៣០នាទីយប់ ថ្ងៃទី០៥ ខែធ្នូ ឆ្នាំ២០២០ នៅចំណុចមុខផ្ទះលេខ៣៥អាផ្លូវ ៤៦៤ ស្ថិតក្នុងភូមិ២ សង្កាត់ទួលទំពូងទី១ ខណ្ឌចំការមន ។
សមត្ថកិច្ចបានឱ្យដឹងថា មុនកើតហេតុ ជនរងគ្រោះបើករថយន្តម៉ាកតូយ៉ូតាព្រូស ពណ៌ ទឹកមាស ទៅអង្គុយនៅតាមចិញ្ចើមផ្លូវជាមួយមិត្តភក្តិ៥ទៅ៧នាក់ ស្រាប់តែមានជនដៃដល់មានគ្នាជិត២០នាក់ជិះម៉ូតូ១០គ្រឿងប្រដាប់ដោយកាំបិតបានកាប់ទៅលើជនរងគ្រោះដែលកំពុងតែអង្គុយលើម៉ូតូរបស់មិត្តភក្តិធ្វើឱ្យរងរបួសធ្ងន់ ដោយសារតែជនរងគ្រោះរត់គេចមិនទាន់ ចំណែកមិត្តភក្តិផ្សេងទៀតបាននាំគ្នារត់ចែកជើងគ្នា ក៏ត្រូវជនដៃដល់កាប់មួកសុវត្ថិភាព និងម៉ូតូ៣គ្រឿងខូចខាត ទើបជនដៃដល់នាំគ្នារត់គេចខ្លួនបាត់ស្រមោល ។
ជនរងគ្រោះខាងលើឈ្មោះ ហ៊ុល សុវណ្ណារិទ្ធ ភេទប្រុស អាយុ២០ឆ្នាំ មុខរបរនិស្សិត ស្នាក់នៅផ្ទះលេខ២៨សេ តាមផ្លូវ៤៣២ ក្រុម៣៥ ភូមិ៥ សង្កាត់ទួលទំពូងទី១ ខណ្ឌចំការមន រងរបួសក្រោមដោះខាងស្ដាំ ដៃខាងស្ដាំ និងក្បាលយ៉ាងដំណំ ត្រូវបានមិត្តភក្តិដាក់តាមរថយន្តព្រូស ដើម្បីដឹកយកទៅសង្គ្រោះបន្ទាន់នៅមន្ទីរពេទ្យរុស្ស៊ី ។
នគរបាលបញ្ជាក់ថា ក្រោយពីទទួលបានព័ត៌មានភ្លាម នគរបាលបានសហការជាមួយកម្លាំងព្រហ្មទណ្ឌខណ្ឌចុះអន្តរាគមន៍ តែចៃដន្យពេលដែលនគរបាលមកដល់កន្លែងកើតហេតុ ជនបង្កបានរត់បាត់អស់ បន្សល់ទុកតែអ្នករងគ្រោះបញ្ជូនទៅព្យាបាលរួចហើយ សមត្ថកិច្ចនឹងធ្វើការស្រាវជ្រាវតាមចាប់ជនសង្ស័យដាក់ទោសតាមក្រមព្រហ្មទណ្ឌហិង្សាមានស្ថានទម្ងន់ទោស ៕
ចែករំលែកព័តមាននេះ