ភ្នំពេញ៖ ក្នុងសារពិសេសជូនជនរួមជាតិ នៅព្រលប់ថ្ងៃទី៤ ខែធ្នូនេះ សម្តេចតេជោ ហ៊ុន សែន បានប្រកាសពីការសម្រេចឲ្យក្រសួងសុខាភិបាល បង្ហាញអត្តសញ្ញាណអ្នកឆ្លងជំងឺកូវីដ១៩ ក្នុងព្រឹត្តិការណ៍សហគមន៍២៨វិច្ឆិកា។ ការធ្វើដូច្នេះ ដើម្បីឲ្យស្វែងរកអ្នកប៉ះពាល់បន្តទៀត ឲ្យបានឆាប់រហ័ស។ ការសម្រេចដូចនេះ ក៏ត្រូវបានសម្តេច បកស្រាយជូនជនរួមជាតិផងដែរ។
សម្តេចតេជោ បានលើកឡើងថា «ថ្ងៃនេះ យើងបានរកឃើញ ៦នាក់ផ្សេងទៀត ដែលសុទ្ធតែឆ្លង ក្នុងចង្កោម នៃអ្នកដែលជាប់ពាក់ព័ន្ធ នៅក្នុងក្រុមគ្រួសារ និងអ្នកដែលមានទំនាក់ទំនងជាមួយនឹងលោក ឆែម សាវុធ និងក្រុមគ្រួសារ។ ដូច្នេះហើយ ដើម្បីជៀសវាងការរីកបែងខ្នែង និងរីកសាយភាយ ជម្រើសដែលលឿនជាងគេ គឺនៅពេលណា ដែលនរណាមានកូវីដ ទាក់ទិននឹងបញ្ហានេះ គឺត្រូវផ្សព្វផ្សាយជាព័ត៌មាន ជាអត្តសញ្ញាណ ហើយអាចមានមនុស្សមួយចំនួន អាចចោទឡើងពីសិទ្ធិបុគ្គល?»
ប៉ុន្តែត្រង់ចំណុចនេះ សម្តេចតេជោ ហ៊ុន សែន បកស្រាយថា «ព្រឹត្តិការណ៍ថ្ងៃ៣វិច្ឆិកា ក៏យើងបានផ្សព្វផ្សាយអំពីអ្នក ដែលទាក់ទិននឹងមានវិជ្ជមាន ហើយអ្នកដែលត្រូវធ្វើចត្តាឡីស័ក រាប់ទាំងខ្លួនខ្ញុំ និងភរិយាផងដែរ។ ដូច្នេះពេលនេះ យើងក៏បានផ្សព្វផ្សាយរួចមកហើយ ជាមួយអ្នកដែលត្រូវធ្វើចត្តាឡីស័ក រាប់ទាំងប្រធានរដ្ឋសភា សម្តេចពញាចក្រី ហេង សំរិន ក្រុមគ្រួសាររបស់គាត់ និងសមាជិកសភាដទៃទៀត ឧបនាយករដ្ឋមន្ត្រី សម្តេចក្រឡាហោម ឯកឧត្តម អូន ព័ន្ធមុនីរ័ត្ន និងរដ្ឋមន្ត្រីមួយចំនួនផ្សេងទៀត ក៏បាន និងកំពុងធ្វើចត្តាឡីស័ក។ ឯចំពោះអ្នកមានវិជ្ជមាន បើទោះបីជាយើងមិនផ្សាយ ក៏សារព័ត៌មាននានាបានផ្សាយរួចទៅហើយ។ ដូច្នេះយល់ល្អក្រសួងសុខាភិបាល ជាអ្នកផ្សាយផ្ទាល់ ដើម្បីឲ្យសារព័ត៌មាន ដែលមានការទទួលខុសត្រូវខាងវិជ្ជាជីវៈ មានការផ្សព្វផ្សាយ ហើយងាយស្រួលទៅដល់បងប្អូនដទៃទៀត សម្រាប់ធ្វើការផ្ទៀងផ្ទាត់ ហើយក្នុងករណី ដែលមានការពាក់ព័ន្ធជាមួយនឹងអ្នកដែលបានឆ្លងជាមួយនឹងកូវីដ ទាំងចាស់ ទាំងថ្មី គឺចាំបាច់ ត្រូវមកបង្ហាញខ្លួន ដើម្បីយកសំណាក និងធ្វើចត្តាឡីស័ក ដើម្បីជៀសវាងនូវការឈឺចំពោះផ្ទាល់ខ្លួន ចំពោះក្រុមគ្រួសារ និងចម្លងទៅមិត្តភក្តិ»។
សម្តេចតេជោ ហ៊ុន សែន គូសបញ្ជាក់ថា «បញ្ហាពេលនេះ ត្រូវស្វះស្វែងរកឲ្យខានតែបាននូវសិទ្ធិរស់រានមានជីវិត មិនមែនជាសិទ្ធិ ដែលត្រូវលាក់លៀមជាមួយនឹងអ្វី ដែលទាក់ទិននឹងសុខភាពសាធារណៈរបស់សង្គមទាំងមូលនោះទេ»។
ចំនួនអ្នកឆ្លងជំងឺកូវីដ១៩ ក្នុងព្រឹត្តិការណ៍សហគមន៍២៨វិច្ឆិកា បានកើនឡើងដល់ ២៩នាក់ហើយ។ ក្នុងនោះ ៦នាក់ ជាបុគ្គលិកហាងលក់សំលៀកបំពាក់ Pedro តាមផ្លូវព្រះមុនីវង្ស ក្នុងរាជធានីភ្នំពេញ ត្រូវបានរកឃើញឆ្លងកូវីដ១៩ នៅថ្ងៃទី៤ ខែធ្នូនេះ។ សម្តេចតេជោ ហ៊ុន សែន បញ្ជាក់ថា ការឆ្លងជំងឺកូវីដ ក្នុងព្រឹត្តិការណ៍សហគមន៍២៨វិច្ឆិកា នៅមិនទាន់ដឹងប្រភពឆ្លងមកពីណាឲ្យបានច្បាស់លាស់នៅឡើយទេ៕
ចែករំលែកព័តមាននេះ