ខេត្តកំពង់ឆ្នាំង ៖ មានការភ្ញាក់ផ្អើលមួយបានកើតឡើងកាលពីវេលាម៉ោង៨និង៣០នាទីព្រឹកថ្ងៃទី៤ ខែធ្នូ ឆ្នាំ២០២០ បន្ទាប់ពីមានការប្រទះឃើញសពយុវតីម្នាក់អណ្តែតទឹកទន្លេ នៅចំណុចផ្លូវថ្មី ភូមិឆ្នុកទ្រូ ឃុំឆ្នុកទ្រូ ស្រុកបរិបូណ៍…
ខេត្តកំពង់ឆ្នាំង ៖ មានការភ្ញាក់ផ្អើលមួយបានកើតឡើងកាលពីវេលាម៉ោង៨និង៣០នាទីព្រឹកថ្ងៃទី៤ ខែធ្នូ ឆ្នាំ២០២០ បន្ទាប់ពីមានការប្រទះឃើញសពយុវតីម្នាក់អណ្តែតទឹកទន្លេ នៅចំណុចផ្លូវថ្មី ភូមិឆ្នុកទ្រូ ឃុំឆ្នុកទ្រូ ស្រុកបរិបូណ៍ ខណៈដែលក្រុមគ្រួសារព្យាយាមតាមរក នាងដែលបានបាត់ខ្លួនអស់១យប់ទៅហើយនោះ ។
តាមប្រភពពីក្រុមគ្រួសារបានឱ្យដឹងថា យុវតីរងគ្រោះខាងលើឈ្មោះ ឡាំ រដ្ឋា អាយុ១៩ឆ្នាំ ជាសិស្សវិទ្យាល័យហ៊ុនសែនបរិបូណ៌ មានទីលំនៅក្នុងភូមិឃុំកើតហេតុខាងលើ ។
តាមប្រភពដដែលបានបន្តថា មុនពេលកើតហេតុ កាលពីល្ងាចថ្ងៃទី៣ ខែធ្នូ ឆ្នាំ២០២០ យុវតីរងគ្រោះបានត្រឡប់មកពីរៀនវិញ ហើយក៍បានបើកកាណូតបាឡាស្មាច់ ជូនមិត្តភក្តិទៅផ្ទះដូចសព្វដង ។ លុះដល់វេលាម៉ោង៧យប់ថ្ងៃដដែល មិនឃើញនាងត្រឡប់មកផ្ទះវិញឡើយ ធ្វើឱ្យក្រុមគ្រួសារមានការព្រួយបារម្ភ ហើយក៍តាមរកគ្រប់ទីកកន្លែង នៅតែមិនឃើញ ។ ស្រាប់តែព្រឹកឡើងថ្ងៃទី៤ ខែធ្នូ ក៏បានប្រទះឃើញសពនាងអណ្តែតទឹកនៅចំណុចផ្លូវថ្មី និងបានឃើញកាណូតបាឡាស្មាច់ដែលនាងជិះនៅមិនឆ្ងាយពីសពយុវតីរងគ្រោះប៉ុន្មាន ។ ប៉ុន្តែកាណូតបាឡាស្មាច់ សល់តែសំបកកាណូតបាឡា ចំណែកម៉ាស៊ីន បានបាត់មិនដឹងទៅណា។
តាមប្រភពដដែលបានបន្តទៀតថា នៅព្រឹកថ្ងៃដដែលនោះដែរ សមត្ថកិច្ចនគរបាល ស្រុក ខេត្តបានទៅពិនិត្យធ្វើកោសល្យវិច្ច័យ ហើយបានសន្និដ្ឋានបឋមថា យុវតីរងគ្រោះអាចជួបគ្រោះថ្នាក់ចរាចរណ៍ផ្លូវទឹក ប៉ុន្តែភាគីម្ខាងទៀតបានគេចបាត់ ។ ទោះបីជាយ៉ាងនេះក្តី សមត្ថកិច្ចបានបញ្ជាក់ថា៖ នេះគ្រាន់តែការសន្និដ្ឋានបឋមតែប៉ុណ្ណោះ នឹងបន្តស្រាវជ្រាវបន្ថែមទៀតជុំវិញករណីយុវតីរងគ្រោះបាត់ខ្លួនមួយយប់ស្រាប់តែប្រទះឃើញសពអណ្តែតទឹកបែបនេះ ។
ក្រោយពីពិនិត្យ និងធ្វើកោសល្យវិច្ច័យ សមត្ថកិច្ចបានប្រគល់សពយុវតីរងគ្រោះទៅក្រុមគ្រួសាររៀបចំធ្វើបុណ្យតាមប្រពៃណី ៕ (កែសម្រួលដោយ ៖ ធីតា)
ចែករំលែកព័តមាននេះ