រាជធានីភ្នំពេញ ៖ពិតជាគួរឱ្យសោកស្ដាយមែនទែនដោយសារតែជំងឺកូវីដ-១៩ សហព័ន្ធកីឡាប្រដាល់គុនខ្មែរ បានប្រកាសផ្អាកការប្រកួតប្រដាល់នៅតាមសង្វៀនទូរទស្សន៍នានារយៈពេល២សប្ដាហ៍គឺចំពេលដែលអ្នកប្រដាល់ជើងខ្លាំងពីររូបគឺកីឡាករ ម៉ឺន មេឃា មកពីសមាគមកីឡាប្រដាល់កងយោធពលខេមរភូមិន្ទ ត្រូវប៉ះជាមួយកីឡាករ អេលីត ចំរើន…
រាជធានីភ្នំពេញ ៖ពិតជាគួរឱ្យសោកស្ដាយមែនទែនដោយសារតែជំងឺកូវីដ-១៩ សហព័ន្ធកីឡាប្រដាល់គុនខ្មែរ បានប្រកាសផ្អាកការប្រកួតប្រដាល់នៅតាមសង្វៀនទូរទស្សន៍នានារយៈពេល២សប្ដាហ៍គឺចំពេលដែលអ្នកប្រដាល់ជើងខ្លាំងពីររូបគឺកីឡាករ ម៉ឺន មេឃា មកពីសមាគមកីឡាប្រដាល់កងយោធពលខេមរភូមិន្ទ ត្រូវប៉ះជាមួយកីឡាករ អេលីត ចំរើន មកពីក្លិបប៉ែនកាក់គុនខ្មែរ នៅវគ្គផ្ដាច់ព្រ័ត្រនៃកម្មវិធីChampion Of Champion នៅលើសង្វៀនទូរទស្សន៍ស៊ីអិនស៊ី នាថ្ងៃទី៥ ធ្នូ កុំអីមិនដឹងជាល្អមើលយ៉ាងណានោះទេ។
លោក ម៉ា ស៊ីថេត អ្នកគ្រប់គ្រងកម្មវិធីប្រដាល់ប្រចាំសង្វៀនទូរទស្សន៍ស៊ីអិនស៊ីបានឱ្យដឹងថា ការប៉ះគ្នារវាងកីឡាករអេលីត ចំរើន និងកីឡាករ ម៉ឺន មេឃា លើកនេះគឺជាការប្រកួតវគ្គផ្ដាច់ព្រ័ត្រក្រុមទី២ដើម្បីស្វែងរកអ្នកឈ្នះឡើងទៅប្រកួតយករង្វាន់ធំជាមួយកីឡាករឃីម បូរ៉ា មកពីក្លិបរស្មីភូមិគាបខេត្តបន្ទាយមានជ័យដែលជាអ្នកឈ្នះលេខ១ក្រុមទី១កំពុងតែឈររង់ចាំ ។
លោកថា សង្វៀនរបស់លោកបានត្រៀមរួចជាស្រេចថា នឹងធ្វើឱ្យការប្រកួតថ្ងៃនោះល្អមើលដើម្បីឱ្យអ្នកទស្សនាតាមផ្ទះចាប់អារម្មណ៍ ។ ប៉ុន្តែគួរឱ្យសោកស្ដាយបំផុតដោយសារតែមានការរាតត្បាតពីជំងឺកូវីដ-១៩ សហព័ន្ធកីឡាប្រដាល់គុនខ្មែរបានសម្រេចឱ្យផ្អាកការប្រកួតសិន ដោយត្រូវលើកពេលទៅប្រកួតនៅថ្ងៃក្រោយវិញ ។ តាមដឹង ទាំងម៉ឺន មេឃា និងអេលីត ចំរើនប៉ុន្មានថ្ងៃមុនមកនេះកំពុងតែសម្រុកហ្វឹត់ខ្លាំងសម្បើមណាស់ ព្រោះអីពួកគេម្នាក់ៗសុទ្ធតែចង់ឈ្នះរៀងខ្លួនដើម្បីទទួលបានឱកាសឡើងទៅប៉ះជាមួយឃីម បូរ៉ា ដណ្ដើមយករង្វាន់ធំដែលមានទឹកប្រាក់រហូតដល់ទៅ៦ពាន់ដុល្លារឯណោះ ។
ចំណែកអ្នកនិយមតាមដានការប្រកួតកីឡាប្រដាល់គុនខ្មែរមួយចំនួនធំគ្រាន់តែឮថា អ្នកទាំងពីរជួបគ្នាសុទ្ធតែទន្ទឹងរង់ចាំមើលយ៉ាងអន្ទះសាគ្រប់គ្នា រហូតដល់អ្នកដែលចូលចិត្តលេងភ្នាល់ដាក់លុយ មានការរារែកក្នុងចិត្តដូចគ្នា ថាមិនដឹងចាប់យកខាងណានោះទេ ព្រោះគេដឹងថា គូនេះមានថ្វីដៃនិងល្បិចប្រយុទ្ធលើសង្វៀនល្អដូចគ្នា ។ ទោះជាយ៉ាងណា មានការអះអាងថា គូនេះមុននឹងឈានទៅដល់ការចាញ់ឈ្នះគ្នាប្រាកដជាស្វិតស្វាញធ្វើឱ្យសង្វៀនទាំងមូលកក្រើកខ្លាំងមិនខាន ៕
ចែករំលែកព័តមាននេះ