រាជធានីភ្នំពេញ ៖ មហាជនបានសម្តែងការភ្ញាក់ផ្អើល ក្នុងពេលដែលតារាសម្តែងចាស់វស្សាអ្នកនាង សឿ សុធារ៉ា បានទម្លាយពីចំណងអាពាហ៍ពិពាហ៍រវាងនាង និងស្វាមី គឺលោក សាពូន មីដាដា។ បើទោះបីជាមិនបានបញ្ជាក់ឱ្យបានច្បាស់លាស់ថា តើចំណងជាប្តីប្រពន្ធរបស់ពួកនាងពិតជាដល់ផ្លូវបំបែកជាការពិតឬយ៉ាងណា? ប៉ុន្តែ សឿ សុធារ៉ា បានប្រកាសពីការបរាជ័យស្នេហាជាលើកដំបូង។
អ្នកនាង សឿ សុធារ៉ា បានបង្ហោះសារតាមគណនេយ្យឈ្មោះ Sapoun darapemaen ថា «ថ្វីបើខ្ញុំបរាជ័យរឿងស្នេហាជាលើកទី1ទៅហើយ តែជេនី (តារាថៃ) គាត់បរាជ័យស្នេហាចំនួន7ដង ទើបបានជួបស្នេហ៍ស្មោះ ពិតមានន័យផ្អែមកក់ក្តៅបែបនេះ ឱ! តើខ្ញុំនៅមានសង្ឃឹមទេ?»។
ជាការកត់សម្គាល់ តាមរយៈសារដែលអ្នកនាង សឿ សុធារ៉ា បានបង្ហោះខាងលើនេះ បានធ្វើឱ្យមហាជន ជាពិសេសបណ្តាអ្នកលេងហ្វេសប៊ុកបានសម្តែងការភ្ញាក់ផ្អើលយ៉ាងខ្លាំង។ យ៉ាងណា សឿ សុធារ៉ា មិនបានឆ្លើយតបណាមួយចំពោះការសាកសួររឿងហេតុពីបណ្តាប្រិយមិត្តគាំទ្រដែលចូលទៅខំមិននោះឡើយ ប៉ុន្តែអ្វីដែលគួរឱ្យចាប់អារម្មណ៍គេសង្កេតឃើញមានអ្នកសិល្បៈមួយចំនួនបានចូលទៅខំមិនដោយបានលើកទឹកចិត្តឱ្យនាងតស៊ូ និងរឹងមាំ ត្បិតរឿងបែបនេះមិនមែនកើតឡើងតែនាងម្នាក់ឡើយ។
ពាក់ព័ន្ធនឹងបញ្ហាខាងលើ កោះសន្តិភាពមិនទាន់អាចស្វែងរកការបកស្រាយពីអ្នកនាង សឿ សុធារ៉ា បាននៅឡើយទេ គិតត្រឹមថ្ងៃទី០៤ ខែធ្នូ ឆ្នាំ២០២០នេះ ក្នុងពេលដែលការសាកសួរមិនមានការឆ្លើយតប។
ទោះជាយ៉ាងណា ការបង្ហាញសញ្ញាពីស្នេហាបែកបាក់របស់អ្នកនាង សឿ សុធារ៉ា នាពេលនេះបានធ្វើឡើងស្របពេលដែលតារារូបនេះបានប្រកាសទទួលយកការងារសម្តែងឡើងវិញ ក្រោយពីនាងសម្ងំធ្វើជាស្ត្រីមេផ្ទះបីបាច់ថែរក្សាកូន២នាក់ ក្រោយពីរៀបការ។
យ៉ាងណា ដំណឹងនៃការបែបបាក់រវាងអ្នកនាង សឿ សុធារ៉ា និងលោក សាពូន មីដាដា នាពេលនេះ មិនមែនកើតឡើងនាពេលនេះឡើយ ពោលគឺកន្លងមកដំណឹងនេះក៏ត្រូវបានគេដាក់ការសង្ស័យជាយូរមកហើយ ខណៈពេលដែលគេតែងសង្កេតឃើញថា ទាំង សឿ សុធារ៉ា និងលោក សាពូន មីដាដា ហាក់មិនបានបណ្តើរគ្នាដូចពីមុនពេលទៅចូលរួមកម្មវិធីនានាដូចមុនឡើយ។
រឿងនេះដែរ កន្លងមក សឿ សុធារ៉ា ធ្លាប់បានលើកឡើងប្រាប់បណ្តាញសារព័ត៌មាននៅក្នុងស្រុកថា នាងតែងតែបានឃើញព័ត៌មានខាងលើនេះ ចុះផ្សាយជាបន្តបន្ទាប់ តែនាងមិនបានខឹងសម្បាអ្វីឡើយ ព្រោះនាងបានប្រឡូកសិល្បៈប្រមាណជាង១០ឆ្នាំមកនេះព័ត៌មានអ្វីក៏នាងបានជួបដែរ។
យ៉ាងណា បើតាម សឿ សុធារ៉ា នៅតែមិនទទួលស្គាល់ពីព័ត៌មាននៃការបែកបាក់គ្រួសារនេះឡើយ ព្រោះសំអាងថា ប្រសិនបើនាងពិតជាមានការបែកបាក់មែននោះ ប្រាកដជាមានលិខិតស្នាមបែកធ្លាយជាមិនខានឡើយ៕
ចែករំលែកព័តមាននេះ