ខេត្តបន្ទាយមានជ័យ ៖ នារដូវធ្លាក់ខ្យល់ ខណៈស្រូវផ្ការំដួលចាប់ផ្តើមទុំ គឺប្រជាពលរដ្ឋបាននាំគ្នាសម្រុកដាល់អំបុក ឬបុកអំបុកហូបដែលជាប្រពៃណី ស្ថិតនៅក្នុងភូមិខ្ជាយ ឃុំភ្នំដី ស្រុកភ្នំស្រុក។ជាក់ស្តែងនៅថ្ងៃទី០២ ខែធ្នូ…
ខេត្តបន្ទាយមានជ័យ ៖ នារដូវធ្លាក់ខ្យល់ ខណៈស្រូវផ្ការំដួលចាប់ផ្តើមទុំ គឺប្រជាពលរដ្ឋបាននាំគ្នាសម្រុកដាល់អំបុក ឬបុកអំបុកហូបដែលជាប្រពៃណី ស្ថិតនៅក្នុងភូមិខ្ជាយ ឃុំភ្នំដី ស្រុកភ្នំស្រុក។
ជាក់ស្តែងនៅថ្ងៃទី០២ ខែធ្នូ ឆ្នាំ២០២០នេះ លោក យឹម សំណាង អភិបាលស្រុកភ្នំស្រុក និងមន្ត្រីរាជការ បានចូលរួមដាល់អំបុក ឬបុកអំបុកជាមួយបងប្អូនប្រជាពលរដ្ឋហូបដែលជាប្រពៃណីរបស់អ្នកស្រុកផងដែរ។
បើតាមលោក យឹម សំណាង បានប្រាប់ថា ប្រជាពលរដ្ឋនៅស្រុកភ្នំស្រុកនេះ ភាគច្រើនគឺជាប្រជាកសិករដែលធ្វើស្រែច្រើនជាងធ្វើចំការ ដោយវិស័យកសិកម្មមានការរីកចម្រើន ហើយភាគច្រើនប្រជាកសិករបង្កបង្កើនផលស្រូវមិនប្រកាន់រដូវដូចជា ស្រូវសែនក្រអូប និងស្រូវអ៊ីអ៊ា ដែលជាប្រភេទស្រូវស្រាល និងស្រូវកណ្តាលមានស្រូវផ្ការំដួល។
លោកបានបញ្ជាក់ថា ជាប្រពៃណីអ្នកស្រុករស់នៅទីនេះ ឱ្យតែនៅរដូវធ្លាក់ខ្យល់ ឬស្រូវផ្ការំដួលដែលចាប់ផ្តើមទុំហើយ ប្រជាកសិករបាននាំគ្នាច្រូវដោយដៃ៤ទៅ៥កណ្តាប់បានស្រូវប្រមាណ១កញ្ចើរ រួចយកបានត្រាំទឹករយៈពេល១ម៉ោង ទើបស្រង់យកមកទុកសម្រកទឹក ហើយយកឆ្នាំងដី ឬខ្ទះលីងស្រូវឱ្យឆ្អិន និងដាក់ត្បាល់បុកស្រូវធ្វើជាអំបុកតែម្តង ហើយភាគច្រើនការបុកស្រូវធ្វើជាអំបុកនេះ គឺមានមនុស្ស២នាក់ ក្នុងនោះមានប្រុសនិងស្រី ដែលបុរសជាអ្នកកាន់អង្រែបុក ចំណែកខាងស្រីវិញដៃស្តាំកាន់អង្រែបុក និងដៃឆ្វេងកាន់ឈើឆ្គៀល ឬឈើឆ្កឹះ។
លោក យឹម សំណាង បានបញ្ជាក់ថា ក្រោយពេលបុកស្រូវរហូតក្លាយជាអំបុកហើយ ភាគច្រើនជាស្ត្រីបានយកចង្អេរអុំអំបុកដើម្បីយកក្បាលអង្កាមចេញ ហើយយកអំបុក និងពុះដូងខ្ចីយកទឹក និងសាច់ដូង រួចលាយស្ករ និងអំបុកហូប ឬឯចាស់ៗវិញយកអំបុកនោះទៅលីង ហើយយកមកហូបជាមួយត្រីឆ្លូញអាំងលាយនឹងអំបិល មើលទៅទំនងគួរឱ្យឆ្ងាញ់នេះ ជាប្រពៃណីពីជីដូនតារបស់អ្នកស្រុកភ្នំស្រុក៕
ចែករំលែកព័តមាននេះ