រាជធានីភ្នំពេញ ៖ មហាជនបានសម្ដែងការហួសចិត្តយ៉ាងខ្លាំងទៅនឹងអាកប្បកិរិយាច្រឡោងខាមរបស់យុវជនម្នាក់ដែលជាអ្នកបើកបររថយន្តធុនយក្សប្រភេទយីឌុបបែនដឹកថ្មមួយគ្រឿង ពណ៍ត្រេអុី ដែលបិទបាំងទៅដោយក្រណាត់វាំងនន និងស្ទីកឃ័រពេញកញ្ចក់ ហើយទំនងជាមើលមិនឃើញក៏បានបើកកៀរ និងកិនម៉ូតូ១គ្រឿងទាំងកម្រោលប៉ុន្តែជាសំណាង១ក្នុងចំណោម១ពាន់គ្រោះថ្នាក់ដែលស្ត្រីជាអ្នកបើកបរម៉ូតូលោតចេញផុតទើបគ្មានគ្រោះថ្នាក់ ស្រាប់តែអ្នកបើកររថយន្តបង្កនេះស្រែកស្ដីបន្ទោសទៅលើស្ត្រីជាអ្នកបើកបរម៉ូតូថា «ជិះម៉ូតូអត់ចេះមើលរថយន្តទៅវិញ» ចំណែកមហាជនក៏បានស្នើរសុំឲ្យសមត្ថកិច្ចនគរបាលចរាចរចាត់ការទៅលើរថយន្តដែលតុបតែងខុសទំនងនេះតាមច្បាប់ចរាចរផ្លូវគោកផងដែរ។
ហេតុការណ៍ខាងលើនេះបានកើតឡើងបង្កឲ្យមានការភ្ញាក់ផ្អើលកាលពីវេលាម៉ោង៩និង៣០នាទីព្រឹកថ្ងៃទី៤ ខែធ្នូ ឆ្នាំ២០២០ នៅលើកំណាត់ផ្លូវបេតុងអមផ្លូវរថភ្លើងកែងផ្លូវបេតុងចូលភូមិព្រៃសាលា សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ។
រថយន្តបង្កខាងលើម៉ាកហ៊ីយ៉ាន់ដាយ ពណ៍ត្រេអ៊ី ពាក់ស្លាកលេខ ភ្នំពេញ 3D-6583 ប្រភេទយីឌុបបែនដឹកថ្ម ពណ៍ត្រេអ៊ី ដែលបិទបាំងទៅដោយក្រណាត់វាំងនននិងស្ទីកឃ័រពេញកញ្ចក់តែម្ដងហាក់ដូចបន្ទប់ផ្ទះសំណាក់ដោយទុកតែ១ប្រឡោះសម្រាប់មើលផ្លូវប៉ុណ្ណោះ ។ ចំណែកអ្នកបើកបរមិនបានប្រាប់ឈ្មោះឡើយ ប៉ុន្តែនៅលើកញ្ចក់មានបិទអក្សរធំៗថា«ប៉ាសុខណា»និងមានឡូហ្គោជាអក្សរអង់គ្លេស(LS)។រថយន្តនេះបានបើកកៀរនិងកិនម៉ូតូ១គ្រឿងម៉ាកហុងដាឌ្រីម ធុនសេ១២៥ ស៊េរីឆ្នាំ២០១៨ ពណ៍ខ្មៅ ពាក់ស្លាកលេខភ្នំពេញ 1HE-1129 បើកបរដោយស្ត្រីម្នាក់ មិនស្គាល់ឈ្មោះ ។
តាមប្រភពពីអ្នកឃើញហេតុការណ៍បានឲ្យដឹងថា នៅមុនពេលកើតហេតុ ស្ត្រីរូបនោះបានជិះម៉ូតូ១គ្រឿងខាងលើធ្វើដំណើរក្នុងទិសដៅពីលិចទៅកើត ចំណែករថយន្តបង្កក៏បានបើកបរធ្វើដំណើរក្នុងទិសដៅស្របគ្នាផងដែរ លុះពេលទៅដល់ត្រង់ចំណុចកើតហេតុទំនងជាមើលម៉ូតូមិនឃើញ ដោយសារតែរថយន្តនេះបិទបាំងវាំងនននិងស្ទីកឃ័រច្រើនពេកទើបជ្រុលទៅកៀម៉ូតូទាំងកម្រោលបណ្ដាលឲ្យដួលនិងកិនខូចខាតទាំងស្រុងតែម្ដង។
តាមប្រភពដែលបានបន្តទៀតថា ខណៈនោះសំណាងណាស់ដែលស្ត្រីរងគ្រោះលោតចុះទាន់ទើបរួចផុតពីសេចក្ដីស្លា.ប់ បន្ទាប់មករថយន្តនេះបានឈប់ ហើយយុវជនម្នាក់ដែលអ្នកបើកបរបានចុះពីលើរថយន្តដោយបញ្ចេញអាកប្បកិរិយាច្រឡោងខាម ដោយស្រែកស្ដីបន្ទោសដល់ស្ត្រីរងគ្រោះថា «ជិះម៉ូតូអត់ចេះមើលរថយន្តទៅវិញ» ។ ទង្វើបែបនេះបានធ្វើឲ្យពួកគាត់ហួសចិត្តខ្លាំងណាស់ ហើយធាតុពិតគឺយុវជនដែលជាអ្នកបើកបររថយន្តនោះទៅវិញទេដែលអត់មើលអ្នកជិះម៉ូតូហើយបើកកៀរនិងកិនតែម្ដង ព្រោះរថយន្តនោះតុបតែងបិទបាំងវាំងននព្រមទាំងស្ទីកឃ័រជិតជុំខុសនិងច្បាប់ចរាចររហូតមើលមិនឃើញម៉ូតូ ហើយមិនគួរទម្លាក់កំហុសទៅលើជនរងគ្រោះបែបនេះសោះ។
ទាក់ទិននឹងករណីខាងលើនេះ ពួកគាត់ស្នើសុំឲ្យសមត្ថកិច្ចនគរបាលចរាចរចាត់ការទៅលើរថយន្តដែលតុបតែងខុសទំនងនេះតាមច្បាប់ចរាចរផ្លូវគោកផងដែរ ព្រោះកន្លងមករថយន្តធុនធំនានាដែលមានការបិទបាំងវាំងននបែបនេះតែងបង្កគ្រោះថ្នាក់ចរាចរច្រើនករណីមកហើយ៕ (កែសម្រួលដោយ ៖ ធីតា)
ចែករំលែកព័តមាននេះ