ខេត្តបាត់ដំបង ៖ តម្លៃស្វាយកែវរមៀតនាបច្ចុប្បន្នបានធ្លាក់ចុះពាក់កណ្ដាល បើប្រៀបធៀប ក្នុងរដូវកាលដូចគ្នាកាលពីឆ្នាំទៅមិញ ហើយការប្រមូលផលរបស់កសិករក៏មានការថយចុះ ស្ទើរពាក់កណ្ដាលដែរ ដែលធ្វើឲ្យកសិករមួយចំនួនប្រឈមនឹងការខាតបង់ ។ នេះបើតាមការ…
ខេត្តបាត់ដំបង ៖ តម្លៃស្វាយកែវរមៀតនាបច្ចុប្បន្នបានធ្លាក់ចុះពាក់កណ្ដាល បើប្រៀបធៀប ក្នុងរដូវកាលដូចគ្នាកាលពីឆ្នាំទៅមិញ ហើយការប្រមូលផលរបស់កសិករក៏មានការថយចុះ ស្ទើរពាក់កណ្ដាលដែរ ដែលធ្វើឲ្យកសិករមួយចំនួនប្រឈមនឹងការខាតបង់ ។ នេះបើតាមការ អះអាងរបស់ឈ្មួញកណ្ដាល និងកសិករមួយចំនួន ។
ប្រាប់ «កោះសន្តិភាព» លោក ពុច វាច្ចា ជាឈ្មួញកណ្ដាលម្នាក់នៅភូមិបាយដំរាំ ឃុំ ឈើទាល ស្រុកបាណន់ បាននិយាយថា ឆ្នាំនេះស្វាយកែវរមៀតប្រភេទលេខ ២ ឬ ហៅថា «ស្វាយឡាយ» ដែលសម្រាប់នាំចូលរោងចក្រ គឺមានតម្លៃទាបជាងឆ្នាំមុនស្ទើរពាក់កណ្ដាល បើប្រៀបធៀបក្នុងរដូវកាលនៃការប្រមូលផលដូចគ្នា ។ ឈ្មួញស្វាយរមៀតរូបនេះបានប្រាប់ ទៀតថា «នេះជារដូវប្រមូលផ្លែស្វាយដែលកសិករប្រើថ្នាំបញ្ជា» តែឆ្នាំនេះស្វាយមានតម្លៃទាប ហើយកសិករក៏មិនសូវទទូលបានផលទៀត ព្រោះបញ្ជាមិនផ្លែ ដោយសារខ្វះទឹកភ្លៀងពីដើម ដៃ ។
ឈ្មួញកណ្ដាលរូបនេះបានប្រាប់ទៀតថា កាលពីឆ្នាំមុន ក្នុងខែនេះតម្លៃស្វាយកែវរមៀតប្រភេទ «លេខ ២ ឬ ឡាយ» នេះទិញចូលក្នុងតម្លៃចន្លោះពី ៨០០រៀលទៅ ១,២០០រៀល ក្នុង ១គីឡូក្រាម ខណៈឆ្នាំនេះគាត់ទិញចូលតម្លៃត្រឹមតែ ៤៥០រៀលប៉ុណ្ណោះក្នុង ១គីឡូក្រាម ។ ដោយឡែកការប្រមូលទិញចូលវិញ កាលពីឆ្នាំមុនក្នុងមួយថ្ងៃលោកទិញចូលយ៉ាងតិច ចន្លោះពី ២០ ទៅ ៣០តោន តែឆ្នាំនេះលោកទិញបានតែចន្លោះពី ១៥ ទៅ ២០តោនប៉ុណ្ណោះ ក្នុង ១ថ្ងៃ ។ ដូច្នេះទាំងតម្លៃ ទាំងការប្រមូលទិញ គឺខុសគ្នាស្ទើរពាក់កណ្ដាលឯណោះ ។
លោក ពុច វាច្ចា បានបញ្ជាក់ពីមូលហេតុដែលឆ្នាំនេះស្វាយគ្មានតម្លៃយ៉ាងដូច្នេះថា «ជា
រៀងរាល់ឆ្នាំ ខ្ញុំតែងប្រមូលទិញស្វាយកែវរមៀតនេះដឹកចេញយកទៅប្រទេសថៃ ហើយបើទី ផ្សារនៅថៃធ្លាក់ហើយ ខ្ញុំក៏ទិញទម្លាក់តាមហ្នឹងដែរ ព្រោះខ្ញុំចំណេញក្បាលកាត់តិចទូចទេ» ។ ប៉ុន្តែអ្វីដែលជាបញ្ហានោះ គឺឆ្នាំនេះកសិករមួយចំនួនដែលមានដំណាំស្វាយនេះ កំពុងប្រឈម នឹងការខាតបង់ដែរ ព្រោះឆ្នាំនេះការបញ្ជាផ្លែមិនបានផល គឺខូចស្ទើរពាក់កណ្ដាល ។
ដោយឡែកសិករដែលនិយមដាំស្វាយកែវរមៀតភាគច្រើនសុទ្ធតែបានអះអាងប្រហាក់ ប្រហែលគ្នា ដែលនិយាយពីការខាតបង់ ដោយសារដាំមិនបានផលនៅក្នុងឆ្នាំនេះ ។ នៅតាម ចម្ការស្វាយនានា ដែលមានទំហំរាប់សិបហិចតា គេឃើញមានតែដើម តែគ្មានផ្លែ រីឯចម្ការខ្លះទៀតកំពុងផ្កា និងខ្លះទៀតកំពុងចេញក្ដិបតូចៗនៅឡើយ តែនេះមិនមែនកសិករប្រើថ្នាំបញ្ជា ទេ គឺជារដូវដំណាំស្វាយនេះត្រូវចេញផ្កា ផ្លែ តាមបែបធ្មជាតិ ។
លោក លាង ដា រស់នៅឃុំកន្ទឺ ១ ស្រុកបាណន់ បានប្រាប់ «កោះសន្តិភាព» តាមទូរ ស័ព្ទថា ដំណាំស្វាយកែវរមៀតរបស់លោកប្រមាណ ៥ហិកតា ឆ្នាំនេះប្រមូលផលស្ទើរមិនបានពាក់កណ្ដាលផង បើប្រៀបធៀបទៅនឹងឆ្នាំទៅមិញ ។ គាត់បានត្អូញត្អែរថា «ឆ្នាំនេះខ្ញុំ ខាតដើមច្រើនគួរសមដែរ ព្រោះបញ្ជាស្វាយមិនផ្លែ»។ ត្រង់បញ្ហានេះលោក លាង ដា ក៏ដូច ឈ្មួញកណ្ដាលខាងលើ ហើយក៏មិនខុសពីកសិករដាំស្វាយដទៃទៀតដែរ បានលើកឡើង ប្រហាក់ប្រហែលគ្នាថា មូលហេតុដែលបញ្ជាស្វាយមិនផ្លែ ដោយសារឆ្នាំនេះខ្វះខាតទឹកភ្លៀង ពីដើមដៃ លុះបានផលបន្តិចបន្ទួចលក់មិនបានថ្លៃទៀត ។ ដូច្នេះហើយទើបកសិករភាគច្រើន ប្រឈមនឹងការខាតបង់ ។
ប៉ុន្តែកសិករហាក់បានបង្ហាញពីក្ដីសង្ឃឹមខ្លះៗ នៅពេលពួកគេនិយាយពីការរងចាំប្រមូលផលស្វាយនាពេលប៉ុន្មានខែខាងមុននេះទៀត ដែលជារដូវកាលស្វាយត្រូវផ្លែតាមបែប ធម្មជាតិ ដោយមិនបាច់ប្រើថ្នាំបញ្ជា ។
លោក ពុច វាច្ចា ជាឈ្មួញទិញស្វាយ បាននិយាយថា ពេលនេះជិតផុតការប្រមូលផលស្វាយដែលប្រើថ្នាំបញ្ជាហើយ តែប្រហែលជាង ១ខែទៀត កសិករនឹងត្រូវប្រមូលផលស្វាយ ដែលផ្លែតាមរដូវកាលវិញម្ដង ។ លោកថា ពេលនេះដំណាំ ស្វាយស្ទើរគ្រប់ចម្ការ កំពុងផ្កា និងកំពុងចេញក្ដិបស្ទើរបាក់មេក ។ ដូច្នេះលោករំពឹងថា កសិករ នឹងទទូលបានផលច្រើនជាងពេលនេះ ហើយអាចស្រង់ដើមវិញបានខ្លះជាមិនខាន ៕
ចែករំលែកព័តមាននេះ