រាជធានីភ្នំពេញ ៖ អស់រយៈពេលប្រមាណ១ខែមកហើយ ដែលបងប្អូនអ្នកដំណើរតាមបណ្តោយផ្លូវសហព័ន្ធរុស្ស៊ីមានចម្ងល់ដោយសួរគ្នាទៅវិញទៅមក ជុំវិញការយកទូកងទៅដាក់នៅលើមេដំបូលកុដិព្រះចៅអធិការវត្តទឹកថ្លាដែលកំពុងសាងសង់ ។ តាមទិដ្ឋភាពនេះពិតជាកម្របានឃើញណាស់ ។ ដោយសារតែការព្យាយាមពីអ្នករាយការណ៍ព័ត៌មាន នៅទីបំផុតក៏បានទទួលការបកស្រាយពីបញ្ហាខាងលើ…
រាជធានីភ្នំពេញ ៖ អស់រយៈពេលប្រមាណ១ខែមកហើយ ដែលបងប្អូនអ្នកដំណើរតាមបណ្តោយផ្លូវសហព័ន្ធរុស្ស៊ីមានចម្ងល់ដោយសួរគ្នាទៅវិញទៅមក ជុំវិញការយកទូកងទៅដាក់នៅលើមេដំបូលកុដិព្រះចៅអធិការវត្តទឹកថ្លាដែលកំពុងសាងសង់ ។ តាមទិដ្ឋភាពនេះពិតជាកម្របានឃើញណាស់ ។ ដោយសារតែការព្យាយាមពីអ្នករាយការណ៍ព័ត៌មាន នៅទីបំផុតក៏បានទទួលការបកស្រាយពីបញ្ហាខាងលើ ។
សូមអស់លោកអ្នកអានតាមដានដូចខាងក្រោមនេះ ។
វត្តទឹកថ្លាជាវត្តមួយ ស្ថិតនៅក្នុងចំណោមវត្តប្រមាណ១៥០ នៅក្នុងរាជធានីភ្នំពេញទាំងវត្តមហានិកាយ និងវត្តធម្មយុត្តិកនិកាយ ហើយគ្រប់ទីអារាមកំពុងតែមានការអភិវឌ្ឍយ៉ាងខ្លាំង គួរឱ្យកត់សម្គាល់ ។ អ្វីដែលធ្វើឱ្យមហាជនមានការចាប់អារម្មណ៍បំផុតនោះគឺនៅលើដំបូលកុដិមួយដ៏ខ្ពស់ត្រដែត មានរូបទូកង ត្រូវបានដាក់បណ្តែតនៅលើមេដំបូល។
វត្តទឹកថ្លា ស្ថិតនៅក្នុងសង្កាត់ទឹកថ្លា ខណ្ឌសែនសុខ កាលណាគេធ្វើដំណើរតាមបណ្តោយ មហាវិថីសហព័ន្ធរុស្ស៊ីពីស្ពានអាកាស៧មករា ក្បែរមន្ទីរពេទ្យព្រះកុសុមៈ ទៅទិសខាងលិច ប្រមាណ១គីឡូម៉ែត្រហួសផ្សារទឹកថ្លាបន្តិចនៅខាងស្តាំដៃ គេនឹងឃើញ ខ្លោងទ្វារវត្តទឹកថ្លាយ៉ាងធំស្គឹមស្កៃឈរត្រដែត ដែលពោរពេញទៅដោយក្បាច់ក្បូររចនាតាមប្រពៃណីនិងទំនៀបទម្លាប់នៃព្រះពុទ្ធសាសនា ។
នៅពេលចូលទៅក្នុងបរិវេណវត្ត គេឃើញព្រះវិហារនៅខាងស្តាំដៃ និងនៅចំពីមុខ(ផ្នែកខាងជើង) មានសាលាឆទានធំមួយ ដែលទើបតែសាងសង់រួចរាល់ ដែលមានតម្លៃ ប្រមាណកន្លះលានដុល្លារ ។ ដោយឡែក នៅខាងឆ្វេងដៃ គេឃើញកុដិធំមួយ ដែលជាកុដិ ព្រះចៅអធិការ ទើបតែសាងសង់មិនទាន់រូចរាល់នៅឡើយនោះទេ ។ អ្វីដែលធ្វើឱ្យមានការចាប់អារម្មណ៍ពីមហាជននោះ គឺកុដិដ៍ធំនេះពោពេញ ទៅដោយក្បាច់រចនា និងមានបំពាក់នាវាត្រៃលក្ខណ៍ដែលអ្នកខ្លះយល់ច្រឡំថា «ទូកង»ដ៏ធំមួយអណ្តែតនៅពីលើមេដំបូល ។
ជុំវិញចម្ងល់និងការចាប់អារម្មណ៍ពីសាធារណជននេះ អ្នករាយការណ៍កោះសន្តិភាពក៏បានចុះទៅផ្តិតយករូបភាព និងបានជួបសាកសួរព្រះចៅអធិការវត្ត ដើម្បីចង់ដឹងរឿងយកទូកងដាក់លើដំបូល ។ ហើយមូលហេតុអ្វីបានជាព្រះចៅអធិការវត្ត បានរំលេចរូបទូកងនេះ ។ ការពិតព្រះអង្គមានសង្ឃដីកាថាមិនមែនជាទូកងទេ តែជា « នាវាត្រៃលក្ខណ៍ » ។
ព្រះញាណឧត្តម គង់ សារីរាជា គណៈថ្នាក់កិត្តិយស ព្រះវិន័យធរ អនុគណខណ្ឌសែនសុខ និងជាព្រះចៅអធិការវត្តទឹកថ្លាបានមានថេរដីកាឱ្យដឹងថា រូបដែលមានសណ្ឋានដូចទូកងនោះ គីជា«នាវាត្រៃលក្ខណ៍» មិនមែនជាទូកងទេ ញោម ។ រូបនាវានោះធ្វើពីបេតុងមានប្រវែង២៨ម៉ែត្រ និងមានទទឹង១ម៉ែត្រ ស្រួចមុខក្រោយ ដោយមានទុយោបង្ហូរទឹកកុំឱ្យដក់ ទោះភ្លៀងតូចធំយ៉ាងណាក៏អត់មានដក់ទឹកដែរ។ ព្រះអង្គមានថេរដីកាថា នាវាត្រៃលក្ខណ៍តំណាងឱ្យអនិច្ចំ ទុក្ខំ អនត្តា គឺសេចក្តីមិនទៀង វាមិនមែនជារបស់ខ្លួននោះទេ ។ នាវាត្រៃលក្ខណ៍ សម្រាប់ផ្ទុកនូវព្រះធម្មវិន័យទាំងឡាយក្នុងព្រះពុទ្ធសាសនា ។
ព្រះអង្គចៅអធិការ ក៏បានមានថេរដីកាឱ្យដឹងទៀតថា កុដិព្រះអង្គបានសាងសង់ឡើង ប្រមាណ៦ ទៅ៧ឆ្នាំមកហើយអស់ថវិកាប្រមាណ៦០ម៉ឺនដុល្លារ សាងសង់ជិតរួចរាល់ហើយបានប្រមាណ៩០ភាគរយ ។ ក្រៅពីសមិទ្ធផល កុដិសម្រាប់ព្រះសង្ឃគង់នៅ«វត្តទឹកថ្លា» មានការអភិវឌ្ឍយ៉ាងខ្លាំងគួរឱ្យគត់សម្គាល់ រួមជាមួយសមិទ្ធផលជាច្រើនទៀតដូចជា សាលាឆទានយ៉ាងធំ និងខ្លោងទ្វារវត្តសម្រាប់បម្រើក្នុងវិស័យព្រះពុទ្ធសាសនាជាដើម។ ព្រះញាណឧត្តម គង់ សារី មានសង្ឃដីកាឱ្យដឹងទៀតថា សមិទ្ធផល សាលាឆទាន បានសាងសង់រួចរាល់អស់ទឹកប្រាក់ប្រមាណ៥០ម៉ឺនដុល្លារ ដែលការសាងសង់នោះចំណាយអស់រយៈពេលប្រមាណ៨ឆ្នាំ ចាប់តាំងពីឆ្នាំ២០១០ និងរួចរាល់នៅឆ្នាំ២០១៨ ។
ក្រៅពីនោះមានសមិទ្ធផលខ្លោងទ្វារវត្តដែលបានសាងសង់រួចរាល់នៅឆ្នាំ២០១៦ ចំណាយអស់ប្រមាណ៦ម៉ឺនដុល្លារ ។ ខ្លោងទ្វារវត្តដ៏ធំស្គឹមស្កៃនេះ បានសង់ឡើង និងមានរចនាបទ ប្រាសាទបន្ទាយស្រី ។ សមិទ្ធផលទាំងនេះ បានកកើតឡើង ដោយមានការជំនឿទុកចិត្តពីពុទ្ធបរិស័ទ ទាំងក្រៅនិងក្នុងប្រទេសដែលមានទឹកចិត្តសទ្ធាជ្រះថ្លា សាងនូវបុណ្យកុសលសម្រាប់ខ្លួន និងមាតា បិតាជីដូនជីតានិងញាតិតាទាំង៧សន្តាន ដែលបានចែកឋានទៅកាន់លោកខាងមុខ ដើម្បីកប់ទុកក្នុងពុទ្ធសាសនា ដែលជាសាសនារបស់រដ្ឋ ៕
ចែករំលែកព័តមាននេះ