ខេត្តបន្ទាយមានជ័យ ៖ ក្មេងប្រុសចំនួន៣នាក់ ត្រូវបានឪពុកម្តាយដឹកទៅសង្គ្រោះជាបន្ទាន់ភ្លាម ខណៈពេលដែលពួកគេបានហូបផ្លែល្ហុងខ្វង បណ្តាលឲ្យពុល។
ហេតុការណ៍ខាងលើនេះបានបង្កការភ្ញាក់ផ្អើលកើតឡើងកាលពីថ្ងៃទី៣ ខែធ្នូ ឆ្នាំ២០២០ នៅភូមិចក់ពួក ឃុំស្លក្រាម ស្រុកស្វាយចេក ខេត្តបន្ទាយមានជ័យ ។
លោកវរសេនីយ៍ឯកជា ស្លូញ អធិការនគរបាលស្រុកស្វាយចេក បានឲ្យដឹងថា៖ ក្មេងប្រុសរងគ្រោះទាំង៣នាក់ខាងលើរួមមាន ១-ឈ្មោះទី ភត្រា អាយុ៥ឆ្នាំ ២-ឈ្មោះ សំអាង រ៉ាយុន អាយុ៥ឆ្នាំ និង៣-ឈ្មោះ សំអាង រ៉ាយុគ អាយុ៣ឆ្នាំ ។ ក្មេងប្រុសរងគ្រោះទាំង៣នាក់រស់នៅភូមិឃុំកើតហេតុខាងលើ ។
លោកអធិការបានបញ្ជាក់ថា នៅមុនពេលកើតហេតុ ឪពុកម្តាយក្មេងប្រុសទាំង៣នាក់ មិនបាននៅផ្ទះទេ ដោយរវល់ទៅធ្វើកម្មករស៊ីឈ្នួលដកដំឡូងមីឲ្យគេ និងទុកក្មេងៗទាំង៣នាក់នេះឱ្យនៅផ្ទះ ។
លោកអធិការបានបញ្ជាក់បន្តថា ពេលនោះក្មេងប្រុសទាំង៣នាក់ បាននាំគ្នាបេះផ្លែល្ហុងខ្វងដែលដុះតាមរបងយកមកដុតហូប បណ្តាលឱ្យពុលក្អួតចង្អោរតែម្តង ទើបបង្កឱ្យមានការភ្ញាក់ផ្អើល ហើយត្រូវបានឪពុកម្តាយនិងអ្នជិតខាងដឹកបញ្ជូនមកកាន់មន្ទីរពេទ្យបង្អែកស្រុកស្វាយចេក ប៉ុន្តែដោយសារមានអាការៈធ្ងន់ធ្ងរពេក ទើបនៅនៅវេលាម៉ោង១ថ្ងៃទី៣ខែវិច្ឆិកា ក្មេងប្រុសរងគ្រោះទាំង៣នាក់ខសាងលើ ត្រូវបានគ្រូពេទ្យបង្អែកស្រុកស្វាយចេក ដាក់ស៊ីរូម រួចបញ្ជូនបន្តទៅសង្គ្រោះនៅមន្ទីរពេទ្យបង្អែកមិត្តភាពកម្ពុជា-ជប៉ុននៅស្រុកមង្គលបូរី ៕ (កែសម្រួលដោយ ៖ ធីតា)
ចែករំលែកព័តមាននេះ