ខេត្តសៀមរាប ៖ ជនសង្ស័យម្នាក់ដែលជាប់ពាក់ព័ន្ធបទល្មើស៣ករណី ត្រូវកម្លាំងនគរបាលខេត្តសៀមរាបសហការគ្នាតាមចាប់ខ្លួនបានហើយ ។
តាមប្រភពពីសមត្ថកិច្ចនគរបាលជំនាញបានឲ្យដឹងថា បន្ទាប់ពីទទួលបានសេចក្តីរាយការណ៍ពីស្ត្រីម្នាក់កាលពីថ្ងៃទី១ ខែធ្នូ ឆ្នាំ២០២០ កន្លងទៅ ដោយសារស្ត្រីរូបនោះ៉បានឃើញបុរសជាជនសង្ស័យម្នាក់ខាងលើជិះម៉ូតូ១គ្រឿង ធ្លាប់ចូលកន្លែងគាត់ធ្វើការ នៅចំណុច ហាងពន្លឺអង្គរ ស្ថិតនៅភូមិកក្រាញ់ សង្កាត់សៀមរាប ក្រុងសៀមរាប ខេត្តសៀមរាប កាលថ្ងៃទី២៧ ខែវិច្ឆិកា ឆ្នាំ២០២០ កន្លងទៅ ហើយបានបន្លំលួចយកទូរសព្ទ័របស់គាត់ទៅបាត់ ។
តាមប្រភពដដែលបានបន្តថា ភ្លាមៗនោះ កម្លាំងនគរបាលប៉ុស្តិ៍រដ្ឋបាលសង្កាត់សៀមរាប និងកម្លាំងត្រៀមអន្តរាគមន៍ ដឹកនាំដោយលោក វរសេនីយ៍ទោ ដា ចំរើន អធិការនៃអធិការដ្ឋាននគរបាលក្រុងសៀមរាប បានចុះមកដល់កន្លែងដែលស្ត្រីរូបនោះបានរាយ ការណ៍ និងបាននាំបុរសជាជនសង្ស័យខាងលើមកធ្វើការសាកសួរ។
តាមប្រភពដដែលបានបន្តថា នៅពេលកម្លាំងនគរបាលផ្នែកព្រហ្មទណ្ឌដឹកនាំដោយលោកវរសេនីយ៍ ទោ នួន ស័ក្តិចំរើនរិទ្ធ អធិការរងទទួលការងារព្រហ្មទណ្ឌ សហការជាមួយកម្លាំងការិយាល័យព្រហ្មទណ្ឌស្រាល ធ្វើការសាកសួរ ទើបដឹងថា ជនសង្ស័យខាងលើឈ្មោះ វ៉ាង វន់ ភេទប្រុស អាយុ៤៧ឆ្នាំ មុខរបរកម្មករសំណង់ មានស្រុកកំណើត និងទីលំនៅបច្ចុប្បន្ន ភូមិនគរភាស ឃុំនគរភាស ស្រុកអង្គរជុំ ខេត្តសៀមរាប មានជាប់ពាក់ព័ន្ធនឹងករណីអំពើលួចទូរសព្ទដៃ និងប្រាក់ និងអំពើលួចម៉ូតូ ព្រមទាំងមានដីកាបង្គាប់ឲ្យចាប់ខ្លួនលេខ១០/២០១៦ ចុះថ្ងៃទី០៥ ខែកុម្ភ: ឆ្នាំ២០១៦ ចេញដោយលោក កូយ សៅ ចៅក្រមស៉ើបសួរសាលាដំបូងខេត្តសៀមរាប ពីបទប៉ុនប៉ងចាប់បង្ខំសេពសន្ថវ: កាលពីថ្ងៃទី២៣ ខែធ្នូ ២០១៤ នៅភូមិពងទឹក ឃុំជប់តាត្រាវ ស្រុកអង្គរធំ ខេត្តសៀមរាប ផងដែរ។
សមត្ថកិច្ចបន្ថែមថា វត្ថុតាងដកហូតបានម៉ូតូ១គ្រឿង ម៉ាកហុងដាឌ្រីម ពណ៌ខ្មៅ ស៊េរីឆ្នាំ២០១៨ គ្មានស្លាកលេខ គឺមានស្នាមដាប់និងឈូសលេខតួ និងលេខម៉ាស៊ីន អស់ នៅលេខពីរខ្ទង់ខាងចុង នៅសល់ត្រឹមលេខលេខ ៥១៦៥៣។ ជាម៉ូតូដែលជនសង្ស័យ បានធ្វើសកម្មភាពលួច កាលពីអំឡុងខែឧសភា ឆ្នាំ២០២០ កន្លងទៅ នៅចំណុចខាងជើងស្ពានអង្គរ ស្ថិតនៅភូមិក្រវ៉ាន់ សង្កាត់នគរធំ ក្រុង-ខេត្តសៀមរាប ។
សមត្ថកិច្ចបានបន្តទៀតថា នៅថ្ងៃទី៣ ខែធ្នូ ឆ្នាំ២០២០ នេះកម្លាំងនគរបាលក្រុងសៀមរាប ដោយទទួលបានការឯកភាពពីលោកឧត្តមសេនីយ៍ត្រី ភឹង ចន្តារ៉េត ស្នងការរងទទួលផែនព្រហ្មទណ្ឌនៃស្នងការដ្ឋាននគរបាលខេត្តសៀមរាប ឲ្យឃាត់ខ្លួនជនសង្ស័យខាងលើ និងដកវត្ថុតាងយកមកសួរនាំ និងរៀបចំកសាងសំណុំរឿងបញ្ជូនទៅតុលាការដើម្បីផ្តន្ទាទោសតាមផ្លូវច្បាប់៕ (កែសម្រួលដោយ ៖ ធីតា)
ចែករំលែកព័តមាននេះ