ខេត្តកំពង់ឆ្នាំង ៖ អនុវត្តតាមសេចក្តីជូនដំណឹងរបស់អាជ្ញាធរខេត្តជាលើកទី២ ស្ដីពីការផ្លាស់ទីផ្ទះបណ្ដែតទឹកឲ្យអស់នៅត្រឹមដំណាច់ខែវិច្ឆិកា ឆ្នាំ២០២០នេះ អាជ្ញាធរឃុំឆ្នុកទ្រូបានធ្វើការផ្លាស់ទីផ្ទះបណ្ដែតទឹករបស់ប្រជាពលរដ្ឋឡើងគោកសម្រេចបាន១០០%ហើយ ។ នេះជាការអះអាងរបស់អាជ្ញាធរឃុំឆ្នុកទ្រូ ស្រុកបរិបូណ៌ ដែលបានបញ្ជាក់ប្រាប់ភ្នាក់ងារកោះសន្តិភាព…
ខេត្តកំពង់ឆ្នាំង ៖ អនុវត្តតាមសេចក្តីជូនដំណឹងរបស់អាជ្ញាធរខេត្តជាលើកទី២ ស្ដីពីការ
ផ្លាស់ទីផ្ទះបណ្ដែតទឹកឲ្យអស់នៅត្រឹមដំណាច់ខែវិច្ឆិកា ឆ្នាំ២០២០នេះ អាជ្ញាធរឃុំឆ្នុកទ្រូបានធ្វើការផ្លាស់ទីផ្ទះបណ្ដែតទឹករបស់ប្រជាពលរដ្ឋឡើងគោកសម្រេចបាន១០០%ហើយ ។ នេះជាការអះអាងរបស់អាជ្ញាធរឃុំឆ្នុកទ្រូ ស្រុកបរិបូណ៌ ដែលបានបញ្ជាក់ប្រាប់ភ្នាក់ងារកោះសន្តិភាព កាលពីព្រឹកថ្ងៃទី២ ខែធ្នូ ឆ្នាំ២០២០ ។
លោក សាំង គឹមស៊ន មេឃុំឆ្នុកទ្រូ បានឲ្យដឹងថា ក្នុងការផ្លាស់ទីផ្ទះបណ្តែតទឹកនេះ បើគិតមកដល់បច្ចុប្បន្នមានរយៈពេល២ឆ្នាំហើយ ។ អាជ្ញាធរមូលដ្ឋានបានខិតខំណាស់ ដើម្បីសម្រេចតាមផែនការរបស់សាលាខេត្ត ។ រយៈកាលកន្លងទៅ យើងធ្វើបាន១ឆ្នាំបន្តិចៗ ហើយធ្វើបានតែខែទឹកឡើងប៉ុណ្ណោះ ម្ល៉ោះហើយនៅសេសសល់ខ្លះមិនបានល្អ១០០%ទេ ។ ប៉ុន្តែថ្មីៗនេះ តាមផែនការរបស់សាលាខេត្ត បានកំណត់ឱ្យប្រជាពលរដ្ឋត្រូវចាកចេញឱ្យអស់ ត្រឹមថ្ងៃទី៣០ ខែវិច្ឆិកា ឆ្នាំ២០២០ ។
អាជ្ញាធរភូមិ ឃុំ បានព្យាយាមសម្របសម្រួលនិងជួយរៀបចំបម្លាស់ទីផ្ទះបណ្តែទឹកក្នុងឃុំឆ្នុកទ្រូនេះ រហូតសម្រេចបាន១០០%មុនផែនការ ។ ទោះជាយ៉ាងនេះក្តី នៅសល់ផ្ទះចំនួន៧ខ្នងទៀតអូសមកមិនរួចព្រោះកឿងដោយសារទឹករាក់ គឺអូសមិនដល់គោលដៅ ដែលអាជ្ញាធរកំណត់ទីតាំងឱ្យរស់នៅ ។ ម្ល៉ោះហើយពួកគាត់ត្រូវ អូសទម្លាក់ចុះក្រោមបន្តិច តែមិនដល់ទន្លេទេ គឺនៅត្រឹមពោះប្រឡាយដែលបានជីក ហើយឆ្នាំក្រោយនឹងអូសឡើងមកតាមទឹកបន្តទៀត ។
ហេតុនេះហើយទើបមានខ្លះយល់ច្រឡំថាមានផ្ទះអូសចុះក្រោមទៅនៅក្នុងទន្លេវិញ តាមការពិតគ្រាន់តែអូសឱ្យផុតកន្លែងដែលត្រូវស្តារប្រឡាយទេ ហើយផ្ទះទាំងនោះក៏នៅក្នុងប្រឡាយដែរ មិនមែននៅក្នុងទន្លេទេ ។ មិនត្រឹមតែប៉ុណ្ណឹង ផ្ទះដែលអូសទៅវិញនោះគឺដាក់បិទច្រកផ្លូវទឹក ការពារមិនឱ្យមានជនខិលខូចលួចរំកិលផ្ទះទឹកចូលទន្លេវិញបានទៀតផង ។
តាមការបញ្ជាក់បន្ថែមរបស់អាជ្ញាធរឃុំឆ្នុកទ្រូបានឱ្យដឹងថា បច្ចុប្បន្នប្រជាពលរដ្ឋដែលមករស់នៅលើគោកមានភាពស៊ាំទៅនឹងទីកន្លែងថ្មីហើយ ដោយពួកគាត់ទទួលបានទឹកស្អាត ភ្លើងអគ្គិសនី ផ្លូវគោក ផ្លូវទឹក និងសាលារៀន សម្រាប់កូនចៅពួកគាត់ទៀតផង ។ មិនត្រឹមតែប៉ុណ្ណឹង ពួកគាត់ទទួលបានដីសម្រាប់លំនៅឋានទំហំ២០ម៉ែត្រគុណ៥០ម៉ែត្ររួចជាស្រេច ។
បន្ថែមពីលើនេះ អាជ្ញាធរឃុំកំពុងដាក់សំណើ ទៅថ្នាក់លើ ដើម្បីស្នើសុំដីជូនពួកគាត់សម្រាប់បង្កបង្កើនផលទៀតផង ៕
ចែករំលែកព័តមាននេះ