ខេត្តបាត់ដំបង ៖ បុរសម្នាក់ត្រូវសមត្ថកិច្ចឃាត់ខ្លួនក្នុងករណីជួញដូរគ្រឿងញៀនជាក់ស្ដែង កាលពីរសៀលថ្ងៃទី០១ ធ្នូ នៅចំណុចភូមិ១៣មករា សង្កាត់ព្រែកព្រះស្ដេច ក្រុងបាត់ដំបង តែត្រូវបានរកឃើញមានដីកាចំនួន០២របស់ចៅក្រមស៊ើបសួរ ដែលបង្គាប់ឲ្យចាប់ខ្លួនជននេះ…
ខេត្តបាត់ដំបង ៖ បុរសម្នាក់ត្រូវសមត្ថកិច្ចឃាត់ខ្លួនក្នុងករណីជួញដូរគ្រឿងញៀនជាក់ស្ដែង កាលពីរសៀលថ្ងៃទី០១ ធ្នូ នៅចំណុចភូមិ១៣មករា សង្កាត់ព្រែកព្រះស្ដេច ក្រុងបាត់ដំបង តែត្រូវបានរកឃើញមានដីកាចំនួន០២របស់ចៅក្រមស៊ើបសួរ ដែលបង្គាប់ឲ្យចាប់ខ្លួនជននេះ ពាក់ព័ន្ធនឹងបទល្មើសជូញដូរគ្រឿងញៀន ហើយពេលនេះត្រូវតុលាការបញ្ជូនចូលគុកហើយ ។
យោងតាមរបាយការណ៏របស់លោក សុខ និមល នាយការិយាល័យប្រឹងបទល្មើសគ្រឿងញៀន បានឲ្យដឹងថា ជនត្រូវចោទរូបនេះឈ្មោះ យ៉ាំង ផានី អាយុ២៤ឆ្នាំ រស់នៅភូមិវត្តតាមឹម ឃុំអូរដំបង១ ស្រុកសង្កែ តែបានស្នាក់នៅបន្ទប់ជួល នៅចំណុចកើតហេតុខាងលើ។ លោកបាននិយាយថា ជនត្រូវបានកម្លាំងការិយាល័យរបស់លោក សហការជាមួយកម្លាំងអធិការស្រុកសង្កែ ឃាត់ខ្លួនពេលកំពុងប្រព្រឹត្តបទល្មើសគ្រឿងញៀនជាក់ស្ដែង។
ប៉ុន្តែជននេះ ក៏មានដីកាបង្គាប់ឲ្យចាប់ខ្លួនចំនួន០២ដែរ របស់ចៅក្រមស៊ើបសួរសាលាដំបូងខេត្តបាត់ដំបង ដែលត្រូវចោទប្រកាន់ពីបទជួញដូរគ្រឿងញៀនដូចគ្នា។ជាមួយនឹងការឃាត់ខ្លួននេះ សមត្ថកិច្ចបានដកហូតថ្មញៀន ICE (ម៉ាទឹកកក) ពីជនត្រូវចោទឈ្មោះ យ៉ាំង ផានី នេះចំនួន១ថង់ ដែលមានទម្ងន់ជាងកន្លះខាំ (៧៤,៣៦ ក្រាម) កូនជញ្ជីងសម្រាប់ថ្លឹងថ្នាំញៀន០១ ថង់ច្រកថ្មញៀន និង សម្ភារ:ប្រើប្រាសមួយចំនួនទៀត។
ដោយឡែក ពាក់ព័ន្ធនឹងដីកាចាប់ខ្លួនវិញ បើតាមលោកសុខ និមល បានប្រាប់ថា ជនត្រូវឈ្មោះ យ៉ាំង ផានី មានដីកាបង្គាប់ឱ្យចាប់ខ្លួនចំនួន០២ ដែលដីកាទាំង០២នោះមាននៅក្នុងដៃរបស់មន្ត្រីជំនាញរួចស្រេចទៅហើយ។នៅក្នុងដីកាបង្គាប់ឲ្យចាប់ខ្លួនរបស់
ចៅក្រមស៊ើបសួរទាំង០២នោះ ជនឈ្មោះ យ៉ាំង ផានី ត្រូវបានតំណាងអយ្យការចោទប្រកាន់ពីបទ«រក្សាទុក និងជួញដូរគ្រឿងញៀន» ដូចគ្នា តែប្រព្រឹត្តនៅកន្លែងផ្សេងគ្នា កាលពីខែមេសា ឆ្នាំ២០២០ នៅក្នុងស្រុកសង្កែ។ឮ
ដូច្នេះ បើគិតលើសំណុំរឿងថ្មីដែលទើបចាប់ខ្លួនចុងក្រោយនេះ បានន័យថា ជននេះមានសំណុំរឿងចំនួន០៣ហើយ ដែលត្រូវចោទប្រកាន់ពីបទល្មើសដូចគ្នា គឺ«ជួញដូរនូវសារធាតុញៀនដោយខុសច្បាប់»។ ពេលនេះ ជនត្រូវចោទឈ្មោះ យ៉ាំង ផានី ត្រូវបានចៅក្រមស៊ើបសួរបញ្ជាឱ្យមន្ត្រីការិយាល័យជំនាញបញ្ជូនទៅឃុំខ្លួនក្នុងគុកហើយ៕
ចែករំលែកព័តមាននេះ