ខឹងពេកវាយ​ប្រពន្ធ​បីដៃ លុះមកពីធ្វើការវិញបាត់ប្រពន្ធ និង​កូន​ម្នាក់​អស់ជាង១ខែ​ – Koh Santepheap Daily

ADផ្ទាំងផ្សព្វផ្សាយពាណិជ្ជកម្ម

ខឹងពេកវាយ​ប្រពន្ធ​បីដៃ លុះមកពីធ្វើការវិញបាត់ប្រពន្ធ និង​កូន​ម្នាក់​អស់ជាង១ខែ​

1 ខែ មុន
  • Phnom Penh

​រាជធានីភ្នំពេញ ៖ បុរស​ជា​កម្មករ​សំណង់​ម្នាក់​​​ឃើញ​ប្រពន្ធ​ផឹកស៊ីជាមួយមិត្តភក្តិប្រុសស្រី ​ក៏ណែនាំ​​កុំឱ្យផឹកស៊ីទៀត​ តែនាងមិនស្តាប់ និង​តមាត់ ក៏​ឈ្លោះប្រកែក​គ្នាជាមួយប្រពន្ធហើយ​វាយ​នាង​​បី​ដៃ ធ្វើ​ឱ្យ​ប្រពន្ធ​ខឹង​បីកូន​ប្រុសម្នាក់​​ទៅ​​ចោល​ប្តី​និ​ង​កូនស្រី​តូចៗ២​នាក់​ អស់រយៈ​ពេល​ជាង​១​ខែ​ មិន​ទាន់​ឃើញ​វិល​ត្រឡប់​មក​វិញ…

​រាជធានីភ្នំពេញ ៖ បុរស​ជា​កម្មករ​សំណង់​ម្នាក់​​​ឃើញ​ប្រពន្ធ​ផឹកស៊ីជាមួយមិត្តភក្តិប្រុសស្រី ​ក៏ណែនាំ​​កុំឱ្យផឹកស៊ីទៀត​ តែនាងមិនស្តាប់ និង​តមាត់ ក៏​ឈ្លោះប្រកែក​គ្នាជាមួយប្រពន្ធហើយ​វាយ​នាង​​បី​ដៃ ធ្វើ​ឱ្យ​ប្រពន្ធ​ខឹង​បីកូន​ប្រុសម្នាក់​​ទៅ​​ចោល​ប្តី​និ​ង​កូនស្រី​តូចៗ២​នាក់​ អស់រយៈ​ពេល​ជាង​១​ខែ​ មិន​ទាន់​ឃើញ​វិល​ត្រឡប់​មក​វិញ ទើប​បុរស​ជា​ប្តី​មក​ប្តឹង​សមត្ថកិច្ច​និង​អ្នក​សារព័ត៌មាន​ឲ្យ​ជួយ​រកប្រពន្ធ​ កាលពី​យប់​ថ្ងៃ​ទី​២ ​ខែធ្នូ​ ឆ្នាំ​២០២០ នៅ​ប៉ុស្តិ៍​នគរបាល​ចោម​ចៅ​ទី​៣ ខណ្ឌ​ពោធិ៍​សែន​ជ័យ ​រាជធានីភ្នំពេញ ។

បុរស​ជា​ប្តី​​ខាងលើ​ឈ្មោះ ចាប សុ​ជាតិ អាយុ​៣៨​ឆ្នាំ មុខរបរ​កម្មករ​សំណង់ ស្នាក់​នៅ​មិន​ពិតប្រាកដ មានស្រុក​កំណើត​នៅ​ភូមិ​ក្រ​ញូ​ង​ ឃុំ​មុខ​ដា ស្រុក​រមាស​ហែក ខេត្តស្វាយរៀង​។​ចំណែក​​ប្រពន្ធ​ឈ្មោះ តាំង ម៉ី​ម៉ី ហៅ​អា​ហុង អាយុ​២៩​ឆ្នាំ មុខរបរ​នៅផ្ទះ មានស្រុក​កំណើត​នៅ​ភ្នំពេញ ជា​កូនកំព្រា ។

តាម​ការ​រៀបរាប់​បុរស​ជា​ប្តី​បានអោយ​ដឹង​ថា រូប​គាត់​និ​ង​ប្រពន្ធ​បាន​​រួម​រស់ជាមួយ​គ្នា​អស់​រយៈពេល​១១​ឆ្នាំ​មក​ហើយ មានកូន​​​ចំនួន​៣​នាក់ ​ក្នុងនោះ​កូនស្រី​តូច​២​នាក់​ និ​ង​កូនប្រុស​ម្នាក់​ទើបតែ​អាយុ​៦​ខែ ។

បុរស​ជា​ប្តី​បាន​បញ្ជាក់​ថា តាំងពី​ដើម​មក ​ប្រពន្ធ​របស់​គាត់​នៅ​តែ​ផ្ទះ​មើលថែ​កូន ។ មុន​ថ្ងៃ​ប្រពន្ធ​រត់​ចេញពីផ្ទះ​ គាត់​​បាន​ឃើញ​ប្រពន្ធ​ចេះ​ផឹកស៊ី​ជាមួយ​មិត្ត​ភក្ដិ​ស្រី​ប្រុស​ជា​ច្រើន​ថ្ងៃ ​បន្ទាប់មក​គាត់​ក៏​បាន​ណែនាំ​ជា​ច្រើន​ដង​មក​ហើយ​កុំ​ឲ្យ​ផឹកស៊ី តែ​ប្រពន្ធ​មិន​ស្តាប់​ និង.​តមាត់​គាត់​ដោយ​ប្រើ​ពាក្យ​សម្ដី​មិន​សមរម្យ ធ្វើ​ឲ្យ​គាត់​ទ្រាំ​មិន​បាន​​ក៏​វាយ​ពីរ​បី​ដៃ ស្រាប់តែ​ប្រពន្ធ​ខឹង​ចាក់សោ​បន្ទប់​មិន​អោយ​គាត់​ចូល​ផ្ទះ​អស់​មួយ​យប់ ​លុះ​ព្រឹក​ឡើង​គាត់​បាន​ចេញ​ទៅ​ធ្វើការ​សំណង់​បាត់ ដោយ​មិន​បាន​ចាប់អារម្មណ៍​ថា​ ប្រពន្ធខឹង​​គាត់​ដល់​ថ្នាក់​រត់​ចោល​គាត់​ ដោយ​យក​កូនប្រុស​ម្នាក់​ទៅ​ជាមួយ និង​ទុក​កូនស្រី​២​នាក់​នៅផ្ទះ​ឡើយ​។ លុះពេល​​គាត់​ត្រឡប់​មក​ពី​ធ្វើការ​វិញ​ក៏​ស្រាប់តែ​បាត់​ប្រពន្ធ​ ឃើញ​តែ​កូនស្រី​២​នាក់​នៅផ្ទះ​យ៉ាង​កណ្តោចកណ្តែង ។

បុរស​ជា​ប្តី​បាន​បន្ត​ទៀត​ថា បន្ទាប់​ពី​ប្រពន្ធ​រត់​ចោល​គាត់​ រហូត​មក​ដល់​ពេល​នេះ​​អស់​​រយៈពេល​ជាង​មួយ​ខែ​មក​ហើយ គាត់​បាន​ទៅ​ដាក់​ពាក្យបណ្តឹង​ឲ្យ​សមត្ថកិច្ច​ជួយ​ស្រាវ​ជ្រាវ​រកប្រពន្ធ​គាត់ តែ​រក​មិនឃើញ​ទៀត រាល់ថ្ងៃ​គាត់​មិន​បាន​ទៅ​ធ្វើការ​នោះ​ទេ គឺ​នៅ​មើល​កូនស្រី​តូច​២​នាក់ ដែល​អត់​មាន​អ្នក​មើល ធ្វើ​ឲ្យ​ជីវភាព​របស់​គាត់​ទីទ័ល​ក្រ​តែ​ម្តង ។

ជា​ចុង​ក្រោយ ​បុរស​ជា​ប្តី​បាន​សំណូមពរ​​ដល់​​ប្រពន្ធ​​ឱ្យ​វិល​ត្រឡប់​មក​ផ្ទះ​វិញ​ផង ព្រោះ​កូនស្រី​ទាំង​២​នឹក​ម្តាយ​គេ​ខ្លាំង​ណាស់ ។ ចំពោះ​កំហុសឆ្គង​ដែល​គាត់​បាន​ធ្វើ​ទៅ​លើ​ប្រពន្ធ គាត់​នឹង​កែខ្លួន​ ហើយ​មិន​ប្រកាន់​ខឹង​នឹង​ប្រពន្ធ​ទៀត​ទេ សូម​ឲ្យ​តែ​ប្រពន្ធ​ត្រឡប់​មក​ផ្ទះ​វិញ ជួយ​មើល​កូន​ ទើប​គាត់​អាច​ទៅ​ធ្វើការ​រក​ប្រាក់​ផ្គត់ផ្គង់​គ្រួសារ ៕ (កែសម្រួលដោយ ៖ ធីតា​)