រាជធានីភ្នំពេញ ៖ មន្ត្រីសាលាសង្កាត់និងខណ្ឌឫស្សីកែវ ប្រមាណជាង១០នាក់ត្រូវបានកម្លាំងកងរាជអាវុធហត្ថ ដែលដាក់គោលដៅ នៅក្នុងមូលដ្ឋានសង្កាត់ឫស្សីកែវ ចាក់សោឃាត់ខ្លួន ខណៈពេលដែលក្រុមមន្ត្រីទាំងនេះ ទៅឃាត់សំណង់រឹងមាំមួយដែលប៉េអឹមកំពុងសង់ឬការពារដោយចោទថា បានសាងសង់រំលោភលើដីរបស់រដ្ឋ ។
ហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោងប្រមាណ១១និង៥០នាទីព្រឹកថ្ងៃទី២ ខែធ្នូ ឆ្នាំ២០២០ នៅចំណុចអតីតក្រុមហ៊ុនម៉ាកវ៉ែលតាមផ្លូវជាតិលេខ៥ សង្កាត់ឫស្សីកែវ ខណ្ឌឫស្សីកែវ ។ ទោះបីជាយ៉ាងណា ភ្លាមៗត្រូវបានលោក ជា ពិសី អភិបាលខណ្ឌឫស្សីកែវ និងលោកវរសេនីយ៍ឯកហ៊ាង ថារ៉េត អធិការនគរបាលខណ្ ឌឫស្សីកែវ ដឹកនាំកម្លាំងទៅសម្របសម្រួល ទើបកម្លាំងអាវុធហត្ថដែលចាក់សោឃាត់មន្ត្រីទាំងនោះបើកទ្វារឱ្យចេញវិញ ។
តាមព័ត៌មានឱ្យដឹងថា នៅព្រឹកនោះគណៈបញ្ជាការឯកភាពខណ្ឌឫស្សីកែវដឹកនាំដោយលោក ប្រាជ្ញ សីហា អភិបាលរងខណ្ឌបានចុះទៅហាមឃាត់ការសាងសង់សំណង់រឹងមាំរបស់អង្គភាពកងរាជអាវុធហត្ថ ដែលបានសាងសង់រំលោកយកដីរបស់សាលារាជធានីភ្នំពេញ ។ តាមព័ត៌មានឱ្យដឹងទៀតថា នៅព្រឹកនោះ គេឃើញកម្លាំងកងរាជអាវុធហត្ថប្រមាណជាង២០នាក់ បានចេញមកព្រមទាំងចាក់សោបង្ខាំងមន្ត្រីរាជការរបស់សាលាខណ្ឌទាំងអស់ចំនួន១៣នាក់ ដែលដឹកនាំដោយលោកអភិបាលរងខណ្ឌម្នាក់ ដែលចុះអនុវត្តវិធានការរដ្ឋបាលនេះ ។
បន្ទាប់ពីមានហេតុការណ៍កើតឡើង អភិបាលរងរូបនោះក៏បានរាយការណ៍ទៅអភិបាលខណ្ឌ ហើយបានដឹកនាំកម្លាំងនគរបាលជាច្រើននាក់ទៅអន្តរាគមន៍ ដោយមានការសម្របសម្រួលពីលោកអភិបាលខណ្ឌ ទើបកម្លាំងកងរាជអាវុធហត្ថ បានបើកទ្វារឱ្យចេញវិញ ។តាមព័ត៌មានឱ្យដឹងទៀតថា នៅពេលដែលអាជ្ញាធរ និងសមត្ថកិច្ចចេញបានបន្តិច គេឃើញកម្លាំងកងរាជអាវុធហត្ថ២រថយន្ត ប្រដាប់ដោយអាវុធខ្លី វែងបានទៅកាន់សមរភូមិនោះផងដែរ ។
អាជ្ញាធរឱ្យដឹងថា ដីអតីតក្រុមហ៊ុនម៉ាក់វែលជាដីរបស់កំពង់ផែស្វយ័តភ្នំពេញ បានប្រគល់ឲ្យសាលារាជធានីភ្នំពេញ គ្រោងនឹងស្ថាបនាជាសួនច្បារ ចាប់ពីស្ពានជ្រោយចង្វាទៅដល់មុខអតីតសួនច្បារសូគីម៉ិច តែគម្រោងសួនច្បារគាំងស្ញេញមិនដំណើរការក៏ទុកចោល ។ ក្រោយមកដីនោះ ត្រូវកងរាជអាវុធហត្ថលើផ្ទៃប្រទេស សុំខ្ចីដាក់ចំណតទូក ។ នៅពេលថ្មីៗនេះតាមព័ត៌មានឱ្យដឹងថា ដីនោះបានទៅលើក្រុមហ៊ុនមួយ ទំនងក្លាយជាសាច់បីជាន់ទៅហើយក៏មិនដឹង ? លុះក្រោយមក ស្រាប់តែកងរាជ អាវុធហត្ថ ក៏បានបុកគ្រឹះ ប្រុងធ្វើសំណង់រឹងមាំ ឬក៏ឯកជនធ្វើក៏មិនច្បាស់ដែរ ទើបអាជ្ញាធរចុះទៅឃាត់ ក៏មានរឿងកើតឡើងតែម្តងដូចនិយាយគ្នាស្តាប់លែងបាន ។
ទោះជាយ៉ាងណា កោះសន្តិភាព ពុំទទួលការបំភ្លឺណាមួយពីខាងកងរាជអាវុធហត្ថនៅឡើយទេ ដែលតាមអ្នកខ្លះថា រដ្ឋដណ្តើមដីរដ្ឋទាំងកណ្តាលថ្ងៃត្រង់តែម្តង ។ ប្រសិនបញ្ចេញក្បាច់គុនដាក់គ្នាវិញ មិនដឹងល្អមើលយ៉ាងណាទៀតទេ សម័យព្រឹត្តិការណ៍សហគមន៍កូវីដ ២៨ វិច្ឆិកា ពេលនេះ…ហេ ! ហេ !
ចែករំលែកព័តមាននេះ