ខេត្តកំពង់ធំ ៖ តាមរយៈផេកហ្វេសប៊ុករបស់ឯកឧត្តម ហេង រតនា អគ្គនាយកមជ្ឈមណ្ឌលសកម្មភាពកម្ចាត់មីន(ស៊ីម៉ាក់)បានឱ្យដឹងថា កាលពីថ្ងៃទី៣០ ខែវិច្ឆិកា ឆ្នាំ២០២០ អ្នកជំនាញអង្គភាពសុីម៉ាក់បានដោះបន្សាបគ្រាប់បែកទម្លាក់ពីយន្តហោះប្រភេទMK83 ទម្ងន់ជាង៤៥០គីឡូក្រាម នៅក្នុងរណ្តៅដីមួយកន្លែងក្នុងភូមិកំពង់ក្រសាំង ឃុំតាំងក្រសាំង ស្រុកប្រាសាទសំបូរ ។
គ្រាប់បែកនេះមានការលំបាក ក្នុងការដោះបន្សាបនៅនឹងកន្លែង តែទោះបីជាយ៉ាងណា
ក៏ដោយអ្នកបច្ចេកទេសបានរកគ្រប់មធ្យោបាយដេីម្បីបោសសម្អាតគ្រាប់បែកនេះ និងធានាបានសុខសុវត្ថិភាពប្រជាពលរដ្ឋក្នុងមូលដ្ឋាន ព្រោះបើគ្រាប់នេះផ្ទុះគឺជាមហន្តរាយស្មានមិនដល់ ។
យោងតាមប្រភពពីមន្ត្រីស៊ីម៉ាក់ បានឱ្យដឹងថា គ្រាប់បែកដ៏ធំមួយនេះឈ្មោះMK83 ជាប្រភេទគ្រាប់ទម្លាក់ពីលើយន្តហោះកាលក្នុងសម័យសង្គ្រាមទសវត្សរ៍ឆ្នាំ១៩៧០ ជាគ្រាប់បែក ផលិតនៅសហរដ្ឋអាមេរិក ។ គ្រាប់នេះមានទម្ងន់១ពាន់ផោន គឺជិត៥០០គីឡូក្រាម ។មន្ត្រីដដែលបញ្ជាក់ថា គ្រាប់ប្រភេទនេះអាចនឹងផ្ទុះបានប្រសិនបើយើង
ទៅប៉ះឬវាយចំគីបរបស់វា ប៉ុន្តែមន្ត្រីអង្គភាពស៊ីម៉ាក់បានប្រើវិធីតាមជំនាញដោះបន្សាប ដោយធានាបានសុវត្ថិភាពដើម្បីយកមករក្សាទុក ។
គ្រាប់បែកទម្លាក់ពីលើយន្តហោះដែលបានបន្សាបដោយមន្ត្រីស៊ីម៉ាក់នៅខេត្តកំពង់ធំ គឺជាគ្រាប់បែកដ៏គ្រោះថ្នាក់បំផុតមួយ ។ MK83 គឺជាគ្រាប់បែកទម្លាក់ពីលើអាកាសមួយប្រភេទ ដែលត្រូវបានប្រើប្រាស់ជាបន្តបន្ទាប់នៅក្នុងសម័យសង្គ្រាមនាដើមទសវត្សរ៍ឆ្នាំ១៩៧០នៅកម្ពុជា ។ គ្រាប់បែបប្រភេទនេះ មានអង្កត់ផ្ចិត ប្រមាណជា៣៥,៥មីល្លីម៉ែត្រ និងមានចម្ងាយសុវត្ថិភាពពី១.០០០ម៉ែត្រទៅ១.៥០០ម៉ែត្រ ហើយរយៈពេលនៃការផ្ទុះបំផ្លាញគឺប្រមាណជា៨នាទីនិង៤០វិនាទី ។
តាមការកត់ត្រារបស់ស៊ីម៉ាក់ គ្រាប់ប្រភេទនេះ គឺរកឃើញនៅទីកន្លែងផ្សេងៗគ្នាដែលកន្លងមកគេរកឃើញនៅខេត្តស្វាយរៀង ព្រៃវែង មណ្ឌលគីរី រតនគិរី ក្រចេះ កំពង់ឆ្នាំងហើយថ្មីៗនេះគឺនៅខេត្តកំពង់ធំ ។ គ្រាប់បែកប្រភេទនេះត្រូវបានគេជឿថា ត្រូវគេទម្លាក់នៅទឹកដីកម្ពុជានាសម័យសង្គ្រាមវៀតណាមពីឆ្នាំ១៩៦៣ ដល់ឆ្នាំ១៩៧៥ ជាពេលដែលគេជឿថា អាមេរិកបានទម្លាក់គ្រាប់បែកប្រមាណជា២លានគ្រាប់ ឬ៨សែនតោនលើទឹកដីកម្ពុជា ដោយបានសម្លាប់ជីវិតមនុស្សសរុបប្រមាណជា៥សែននាក់ និងបំផ្លាញផ្ទះសម្បែងរាប់ពាន់ខ្នង ។
គួរបញ្ជាក់ថា កាលពីឆ្នាំ២០១៨កន្លងទៅ មជ្ឈមណ្ឌលសកម្មភាពកម្ចាត់មីនកម្ពុជា(ស៊ីម៉ាក់)បានបង្ហាញរបាយការណ៍ស្តីពីសកម្មភាពបោសសម្អាតមីន និងគ្រាប់យុទ្ធភ័ណ្ឌមិនទាន់ផ្ទុះនៅឆ្នាំ២០១៧ ដោយបានបោសសម្អាតដីមានកប់គ្រាប់មីន និងផ្ទៃដីចម្ការដែលមានគ្រាប់មីនបានចំនួន៨.៦៣៦ហិកតា ។ ជាមួយនេះ បានកម្ទេចចោលគ្រាប់មីននិងគ្រាប់យុទ្ធភ័ណ្ឌមិនទាន់ផ្ទុះគ្រប់ប្រភេទបានចំនួន៣៧.៤៤៨គ្រាប់ ។
ទន្ទឹមនឹងការបង្ហាញរបាយការណ៍ស្តីពីសកម្មភាពការងារ អគ្គនាយកស៊ីម៉ាក់ក៏បានដាក់បង្ហាញពីផែនការយុទ្ធសាស្ដ្រជាតិសកម្មភាពកម្ចាត់មីនឆ្នាំ២០១៨-២០២៥ផងដែរ ដែលមជ្ឈមណ្ឌលសកម្មភាពកម្ចាត់មីនកម្ពុជា នឹងធ្វើការបោសសម្អាតគ្រាប់មីន និងយុទ្ធភ័ណ្ឌមិនទាន់ផ្ទុះ លើផ្ទៃដីចម្ការប្រមាណ១១៦គីឡូម៉ែត្រក្រឡា ជាការឆ្លើយតបទៅតាមសំណើបន្ទាន់ៗចំនួន៩ពាន់ ហើយនឹងអាចបោសសម្អាតគ្រាប់មីន និងគ្រាប់យុទ្ធភ័ណ្ឌមិនទាន់ផ្ទុះចំនួន៥០.០០០គ្រាប់៕
ចែករំលែកព័តមាននេះ