ខេត្តកំពង់ឆ្នាំង ៖ រថយន្តមួយគ្រឿងសង្ស័យឆ្លងចរន្តអគ្គិសនីក្លាយជាអណ្តាតភ្លើងឆាបឆេះយ៉ាងសន្ធោសន្ធៅ ខណៈម្ចាស់កំពុងបើកបរធ្វើដំណើរតាមផ្លូវ បង្កឱ្យមានការភ្ញាក់ផ្អើលដល់ប្រជាពលរដ្ឋ និងរថយន្តពន្លត់អគ្គិភ័យចុះមកជួយអន្តរាគមន៍បាញ់ទឹកពន្លត់ ប៉ុន្តែរថយន្តមួយគ្រឿងនេះបានរងការខូចខាតផ្នែកខាងមុខយ៉ាងធ្ងន់ធ្ងរ ។ ហេតុការណ៍ខាងលើនេះបានកើតឡើងកាលពីវេលាម៉ោង៩និង១៩នាទីព្រឹកថ្ងៃទី៣ ខែធ្នូ…
ខេត្តកំពង់ឆ្នាំង ៖ រថយន្តមួយគ្រឿងសង្ស័យឆ្លងចរន្តអគ្គិសនីក្លាយជាអណ្តាតភ្លើងឆាបឆេះយ៉ាងសន្ធោសន្ធៅ ខណៈម្ចាស់កំពុងបើកបរធ្វើដំណើរតាមផ្លូវ បង្កឱ្យមានការភ្ញាក់ផ្អើលដល់ប្រជាពលរដ្ឋ និងរថយន្តពន្លត់អគ្គិភ័យចុះមកជួយអន្តរាគមន៍បាញ់ទឹកពន្លត់ ប៉ុន្តែរថយន្តមួយគ្រឿងនេះបានរងការខូចខាតផ្នែកខាងមុខយ៉ាងធ្ងន់ធ្ងរ ។
ហេតុការណ៍ខាងលើនេះបានកើតឡើងកាលពីវេលាម៉ោង៩និង១៩នាទីព្រឹកថ្ងៃទី៣ ខែធ្នូ ឆ្នាំ២០២០ តាមបណ្ដោយផ្លូវជាតិលេខ៥ ត្រង់ចន្លោះគីឡូម៉ែត្រលេខ៨៧ និង៨៨ ស្ថិតនៅភូមិទួលក្រឡាញ់ សង្កាត់កំពង់ឆ្នាំង ក្រុងកំពង់ឆ្នាំង ។
តាមការបញ្ជាក់ពីសមត្ថកិច្ចនគរបាលមូលដ្ឋានមូលដ្ឋានបានឲ្យដឹងថា ម្ចាស់រថយន្តខាងលើឈ្មោះ ស៊ីន សាលីន អាយុ៣១ឆ្នាំ មានទីលំនៅភូមិទី៧ សង្កាត់ខ្សាម ក្រុងកំពង់ឆ្នាំង ។
តាមប្រភពដដែលបានឲ្យដឹងថា មុនពេលកើតហេតុ ម្ចាស់រថយន្តខាងលើបានបើករថយន្តមួយគ្រឿង ពណ៌ស ពាក់ស្លាកលេខ ភ្នំពេញ 2BJ.6849 ធ្វើដំណើរក្នុងទិសដៅពីជើងទៅត្បូង (ពីខេត្តកំពង់ឆ្នាំងទៅរាជធានីភ្នំពេញ) លុះមកដល់ចំណុចកើតហេតុខាងលើ ស្រាប់តែមានអណ្ដាតភ្លើងឆាបឆេះចេញពីក្នុងម៉ាស៊ីនផ្នែកខាងមុខយ៉ាងសន្ធោសន្ធៅ ធ្វើអោយម្ចាស់រថយន្តភ័យស្លន់ស្លោ ហើយអែបរថយន្តមកខាងស្ដាំដៃរួចបើកទ្វាររត់ចេញមកក្រៅ ។
តាមប្រភពដដែលបានឱ្យដឹងបន្តថា ភ្លាមៗនោះប្រជាពលរដ្ឋបានជួយអន្តរាគមន៍ដោយដងទឹកពន្លត់ ហើយបន្ទាប់មករថយន្តពន្លត់អគ្គីភ័យរបស់ស្នងការនគរបាលខេត្ត បានចេញជួយបាញ់ពន្លត់ដោយប្រើរយៈពេលប្រមាណជាង១០នាទី ទើបគ្រប់គ្រងសភាពការណ៍បាន ប់ុន្តែរថយន្តខាងលើនេះត្រូវភ្លើងឆាបឆេះខ្ទេចផ្នែកខាងមុខអស់យ៉ាងធ្ងន់ធ្ងរ ។
តាមប្រភពដដែលបានបញ្ជាក់ទៀតថា រថយន្តខាងលើនេះគឺឆេះបណ្ដាលមកពីឆ្លងចរន្តអគ្គិសនីក្នុងម៉ាស៊ីនផ្នែកខាងមុខ ។ ក្រោយពេលកើតហេតុ ម្ចាស់បានអូសរថយន្តទៅយានដ្ឋានជួសជុលដោយខ្លួនឯង៕ (កែសម្រួលដោយ ៖ ធីតា)
ចែករំលែកព័តមាននេះ