ខេត្តតាកែវ ៖ សេចក្តីរាយការណ៍ពីប្រជាពលរដ្ឋបានឲ្យដឹងថា ដីរដ្ឋចំនួន១២ហិកតា ស្ថិតនៅភូមិដើមផ្ដៀក ឃុំព្រៃស្លឹក ស្រុកទ្រាំង ខេត្តតាកែវ ត្រូវគេឃុបឃិតគ្នារៀបចំ លក់ទៅឲ្យអ្នកមានលុយម្នាក់នៅផ្សារព្រៃសណ្តែកក្នុងតម្លៃជិត៤០ម៉ឺនដុល្លារ ។
ពលរដ្ឋថា ក្នុងរយៈពេលជិតមួយឆ្នាំមកហើយ ពួកគាត់ឃើញមានទាំងក្រុមអាជ្ញាធរ មានទាំងក្រុមមេព្រៃ បាននាំគ្នាចុះមកដល់ទីតាំងដី១២ហិកតានោះ ដោយសភាព ស្ងាត់ៗ និងអាថ៌កំបាំងបំផុត ក្រោយមកទើបមានការបែកធ្លាយថា គេមកនោះដើម្បីរៀបចំលក់ដីរដ្ឋ១២ហិកតាខាងលើ ។
ពាក់ពន្ធ័ករណីខាងលើនេះ លោក ព្រំ ណែត មេឃុំព្រៃស្លឹកបានថ្លែងថា លោកមិន
បានដឹងរឿងដីនេះទេ លោកថា ដីនោះគ្មានប្លង់កម្មសិទ្ធិទេ ពិតជាដីរបស់រដ្ឋមែន ដូច្នេះ លោកមិនដឹងរឿងអីទាំងអស់ ហើយក៏មិនបានចូលរួមលក់ដីរដ្ឋនឹងគេដែរ ។ សម្រាប់ លោក ញឹប ស្រ៊ន ប្រធានមន្ទីរកសិកម្មខេត្តតាកែវបានថ្លែងថា តើអ្នកណាថ្លើម ធំហ៊ាន លក់ដីរដ្ឋ ?
លោកថា ដីនៅចំណុចខាងលើ គឺស្ថិតក្រោមការគ្រប់គ្រង ដោយរដ្ឋបាលព្រៃឈើ ដូច្នេះ លោកស្នើឲ្យទៅសួរទៅលោក ស៊ឹម ឡាប៉័ង នាយខណ្ឌ័រដ្ឋព្រៃឈើវិញល្អជាង។
លោក ស៊ឹម ឡាប៉័ង នាយខណ្ឌ័រដ្ឋបាលព្រៃឈើតាកែវក្រោយដឹងថា សារព័ត៌មានសួរនាំរឿងដីរដ្ឋ១២ហិកតានោះ លោកប្រាប់ថា លោកកំពុងចូលដេកពេទ្យ។ ចំណែកលោក នួន សុធា ប្រធានមន្ទីរសុរិយោដីខេត្តតាកែវវិញបានថ្លែងថា លោកអត់ ដឹងរឿងដីនោះទេ សូមអ្នកសារព័ត៌មានសួរទៅប្រធានការិយាល័យភូមិបាលស្រុកទ្រាំងវិញទៅ។
សួរមេ…មួយឆ្លើយដាក់មួយ… សង្ស័យរួមគ្នាធ្វើឱ្យដី១២ ហិកតានេះក្លាយជាសាច់៣ជាន់ដូចអ្នកស្រុកថាមែនអត់? ទំនងអំណាចធំស្ថិតនៅលើកណ្តាប់ដៃលោកស៊ឹម ឡាប៉័ង មែនទេដឹង?
លោកស៊ឹម ឡាប៉័ង ចេញពីពេទ្យវិញហើយឬនៅ? គួរជួយបំភ្លឺមកកោះសន្តិភាពផង កុំឱ្យមហាជនសង្ស័យយូរពេក ។
ព័ត៌មានបន្ថែមមានផ្សាយជូនលើទំព័រកាសែតកោះសន្តិភាព ។
ចែករំលែកព័តមាននេះ