អ៊ី​តា​លី ៖ កីឡាករ Cristiano Ronaldo បាន​ស៊ុត​គ្រាប់​ទី​ ៧៥០ ក្នុង​អាជីព​របស់​ខ្លួន នៅ​ពេល​ដែល​ក្រុម Juventus បាន​យកឈ្នះ​ក្រុម​ភ្ញៀវ Dynamo Kyiv ដោយ​លទ្ធផល ៣-០ កាលពី​យប់មិញ ស្ថិត​នៅ​ក្នុង​ការ​ប្រកួត​ពិសេសមួយ ដែល​អាជ្ញាកណ្តាល Stephanie Frappart បាន​បង្កើត​ប្រវត្តិសាស្ត្រ​មិន​ធ្លាប់​មាន ​ក្នុង​ក្រប​ខណ្ឌ Champions League​។

ការ​ប្រកួត​យប់មិញ មានការ​ចាប់អារម្មណ៍​យ៉ាង​ខ្លាំង បន្ទាប់​ពី​អាជ្ញាកណ្តាល Stephanie Frappart បាន​បង្កើត​ប្រវត្តិសាស្ត្រ​ថ្មី​មួយ ដោយបាន​​ក្លាយជា​អាជ្ញាកណ្តាល​ស្ត្រី​ដំបូង​គេ​បង្អស់ ដែល​កាត់សេចក្តី​​ការ​ប្រកួត​ក្រប​ខណ្ឌ Champions League ផ្នែក​បុរស​។

ក្រឡេក​មក​កាន់ការ​ប្រកួត កីឡាករ Federico Chiesa គឺជា​អ្នករក​គ្រាប់​បើកឆាក មុន​ពេល​ដែល Cristiano Ronaldo ធ្វើ​បាន​គ្រាប់​ទី​២។ ខណៈ​ដែល​គ្រាប់​ជ័យជម្នះ​ចុង​ក្រោយ សម្រេច​បាន​ដោយកីឡាករ Álvaro Morata​។

សូម​បញ្ជាក់​ថា ក្នុង​ពូ​ល G ក្រុម Barcelona និង Juventus បាន​កក់​កៅអី​នៅ​វគ្គ​១៦​ក្រុម​រួច​ជា​ស្រេច ខណៈ​ដែល​ក្រុម Dynamo Kyiv និង Ferencváros ត្រូវ​ប្រជែង​ពិន្ទុ​គ្នា ដើម្បី​មានឱកាស​អាច​លេង​នៅ​ក្រប​ខណ្ឌ Europa League៕ (​ដកស្រង់​ចេញពី BBC)