រាជធានីភ្នំពេញ ៖ បច្ចុប្បន្នមនុស្សភាគច្រើនតែងតែគេចមិនផុតពីការជំពាក់លុយ ឬអាចហៅបានថា ជំពាក់បំណុល ។ មនុស្សខ្លះមានបំណុលដោយសារគាត់ត្រូវបើកអាជីវកម្ម ឬខ្ជីលុយ ដើម្បីដោះទាល់អ្វីមួយ ហើយក៏មានអ្នកដែលជាប់បំណុលដោយសារមិនមានវិន័យក្នុងការចាយលុយនោះដែ…
រាជធានីភ្នំពេញ ៖ បច្ចុប្បន្នមនុស្សភាគច្រើនតែងតែគេចមិនផុតពីការជំពាក់លុយ ឬអាចហៅបានថា ជំពាក់បំណុល ។ មនុស្សខ្លះមានបំណុលដោយសារគាត់ត្រូវបើកអាជីវកម្ម ឬខ្ជីលុយ ដើម្បីដោះទាល់អ្វីមួយ ហើយក៏មានអ្នកដែលជាប់បំណុលដោយសារមិនមានវិន័យក្នុងការចាយលុយនោះដែ រ។
យ៉ាងណាមិញ យោងតាមអ្នកជំនាញផ្នែកហិរញ្ញវត្ថុ និងអចលទ្រព្យ ម្នាក់បានលើកឡើងថា ប្រសិនជាយើងប្របំណុលក្នុងផ្លូវត្រូវ ឬចំគោលដៅ នោះវានឹងក្លាយជាបំណុលល្អ ហើយអាចធ្វើឱ្យអ្នកមានអនាគតល្អថែមទៀតផង។
នាពេលនេះ សារព័ត៌មាន សូមលើកយកត្រឹមតែជាគុណសម្បត្តិខ្លះៗ ប្រសិនជាអ្នកចង់ចាប់ផ្តើមជំនួញ ពីវ័យក្មេង ហើយមានបំណងចង់ខ្ជីលុយធនាគារ ដើម្បីបើករបរនោះ។ លោក ង៉ែត ជូ បានបន្តដូចនេះថា គុណសម្បត្តិ ៦ យ៉ាង ដែលអ្នកគួរតែខ្ចីប្រាក់ពីគ្រឹះស្ថានមីក្រូហិរញ្ញវត្ថុ ឬធនាគារមកធ្វើជំនួញចាប់តាំងពីវ័យក្មេង ពោលគឺចាប់ពីពេលដែលអ្នកមានប្រាក់ចំណូលដំបូងក្នុងជីវិត។
ទី១) ធ្វើឱ្យអ្នកក្លាយជាមនុស្សដែលមានវិន័យហិរញ្ញវត្ថុ ៖ ពេលមានបំណុលជាប់ខ្លួនអ្នកនឹងយល់ថាអ្នកមានកាតព្វកិច្ច និងទំនួលខុសត្រូវខ្ពស់ក្នុងការសងប្រាក់ទៅម្ចាស់បំណុលវិញ។ ដូច្នេះអ្នកនឹងមានវិន័យខ្លាំងក្នុងការចាត់ចែងលុយកាក់។
ទី២) ធ្វើឱ្យអ្នកក្លាយជាមនុស្សកាន់តែមានវិន័យ និងភាពអំណត់ក្នុងការបំពេញការងារ ៖ ពេលខ្ចីប្រាក់មកវិនិយោគអ្នកតែងខ្វល់ខ្វាយ ពីសុវត្ថិភាពការងារ (Job Security) ក៏ដូចជាសួរខ្លួនឯងថាតើធ្វើយ៉ាងណាទើបមានការងារល្អជាងនេះ? មានប្រាក់ខែច្រើនជាងនេះ ដើម្បីអាចខ្ចីប្រាក់បានច្រើនជាងសព្វថ្ងៃដើម្បីយកទៅវិនិយោគ? ធ្វើយ៉ាងណាអាចទទួលបានចំណេះដឹង-ជំនាញបន្ថែមពីការងារសព្វថ្ងៃដើម្បីយកទៅពង្រឹងសមត្ថភាពក្នុងការវិនិយោគ? សំណួរទាំងនេះជំរុញអោយអ្នកបំពេញការងារដោយមិនខ្លាចនឿយហត់ ព្រោះជាជីវិតការងារដែលមានបុព្វហេតុ។
ទី៣) ធ្វើឱ្យអ្នកក្លាយជាមនុស្សដែលចេះបង្កើតក្តីស្រមៃសំរាប់ជីវិត ៖ ជារឿយៗ ជីវិតធ្វើការងារជាបុគ្គលិកយកប្រាក់ខែមិនបានបង្ហាញផ្លូវ ថាតើអ្នកចង់ធ្វើអ្វីអោយពិតប្រាកដនោះទេ។ អ្នកពិបាកនឹងរកឃើញគោលដៅក្នុងជីវិតណាស់។ តែបើចេះវិនិយោគ អ្នកប្រហែលជាអាចដកបទពិសោធន៍ជីវិតបានច្រើន អ្នកស្គាល់ខ្លួនឯងកាន់តែច្បាស់ រហូតអាចឈានដល់ការបង្កើតក្តីស្រម៉ៃសំរាប់ជីវិតទៀតផង។ ព្រោះជីវិតអ្នកវិនិយោគត្រូវរៀនសូត្រជានិច្ច ជាពិសេសរៀនសូត្រពីបុគ្គលជោគជ័យនានា។
ទី៤) ធ្វើឱ្យអ្នកចេះវិភាគពីផលចំណេញ-ខាត ហានិភ័យ និង រិះគិតពីដំណោះស្រាយ ៖ ពេលអ្នកខ្ចីប្រាក់ពីធនាគារយកមកវិនិយោគ អ្នកអាចសួរខ្លួនឯងថា តើខ្ចីមកអាចចំណេញទេចំពោះការប្រាក់ប៉ុណ្ណឹង? ចុះបើខ្ចីប្រាក់ធនាគារមិនបាន តើត្រូវមានដំណោះស្រាយយ៉ាងណាដើម្បីបានប្រាក់មកវិនិយោគ? តើជំរើសនីមួយៗមានហានិភ័យអ្វីខ្លះប្រសិនបើការវិនិយោគមិនអាចទទួលបានផលចំណេញដូចការរំពឹងទុក? ជួនកាលអ្នកអាចសុំយោបល់ពីអ្នកដទៃ។ អ្នកនឹងទទួលបានបទពិសោធន៍ និងចំណេះដឹងជាច្រើនពីសំណួរទាំងនេះ។
ទី៥) ធ្វើអោយអ្នកចេះជ្រើសរើសការសេពគប់ប្រភេទមិត្តភក្តិ និងសង្គមល្អ ៖ អ្នកបានខ្ចីប្រាក់ពីធនាគារយកមកវិនិយោគ ដូច្នេះអ្នកនឹងមិនមានចំណាប់អារម្មណ៍សេពគប់មនុស្សដែលធ្វើការដើម្បីតែរស់ និងជីវិតហ៊ឺហានោះទេ។ គេមានបុព្វហេតុផ្សេង អ្នកមានបុព្វហេតុផ្សេង។ ពេលអ្នកនិយាយពីការវិនិយោគ គេក៏មិនចូលចិត្តស្តាប់ដែរ។ ដូចគ្នា ពេលគេនិយាយពីការទិញទូរសព្ទបង់រំលស់ អ្នកក៏មិនចូលចិត្តដែរ។ អ្នកក៏មិននិយមរាប់រកសង្គមមនុស្សដែលចូលចិត្តផឹកស៊ីអត់ប្រយោជន៏ដែរ។ អ្នកនឹងនិយមរាប់អានតែមនុស្សដែលមានកំណើតតែប៉ុណ្ណោះ។
និងទី៦) ធ្វើឱ្យអ្នកចំណេញពេលវេលា និងមានសេរីភាពហិរញ្ញវត្ថុទាំងវ័យក្មេង ៖ ខ្ចីប្រាក់មកវិនិយោគបណ្តើរ ធ្វើការបណ្តើរ ក្រៅពីផលចំណេញផ្នែកហិរញ្ញវត្ថុ អ្នកនឹងអាចសន្សំបានបទពិសោធន៏ និងចំណេះដឹងជាច្រើន។ ប្រការនេះធ្វើឱ្យសមត្ថភាពរបស់អ្នកកាន់តែខ្លាំង។ អ្នកនឹងទទួលបានសេរីភាពហិរញ្ញវត្ថុក្នុងវ័យក្មេង។ មានមនុស្សជាច្រើនចំណាយពេល ក្នុងជីវិតការងារប្រហែលចន្លោះពី៣-៥ឆ្នាំ ដំបូងសប្បាយហ៊ឺហានឹងជីវិតនៅលីវ មានប្រាក់ខែចាយ មិនជាប់កម្ចី មិនមានកាតព្វកិច្ច និងវិន័យហិរញ្ញវត្ថុ។
លោកបានបន្ថែមដូចនេះ «ខ្ញុំមានមិត្តភក្តិប្រភេទនេះច្រើន (ប្រភេទទី៦) មកដល់ថ្ងៃនេះពួកគេនៅខ្វល់ខ្វាយពីសេរីភាពហិរញ្ញវត្ថុនៅឡើយ។ ពួកគេត្រូវធ្វើការយ៉ាងតិចចន្លោះពី១០-២០ឆ្នាំទៀត។ នេះជាប្រការគួរឱ្យអាណិត ព្រោះឮតែត្អូញត្អែថាធុញថប់នឹងការងារសព្វថ្ងៃណាស់ តែបើឈប់អត់អីចិញ្ចឹមកូនប្រពន្ធ។ល»៕
ចែករំលែកព័តមាននេះ