រាជធានីភ្នំពេញ ៖ បុរសជាអ្នករត់កង់បីឥណ្ឌាម្នាក់បានបាក់ជើងខាងឆ្វេងម្ខាងរងរបួសយ៉ាងធ្ងន់ធ្ងរ ខណៈដែលរូបគាត់កំពុងតែឈប់ភ្លើងស្តុប ខាងមុខវិទ្យាល័យបឹងត្របែក ហើយក៏ស្រាប់តែមានរថយន្តម៉ាកកាម៉ារីបាឡែនមួយគ្រឿង ដែលបើកបរដោយបុរស ជនជាតិចិនម្នាក់ បើកមកបុកពីក្រោយពេញទំហឹង ហើយកង់បីឥណ្ឌារបស់គាត់ក៏ជ្រុលទៅបុករថន្តម៉ាកព្រុសមួយគ្រឿងទៀតដែលឈប់ខាងមុខបបន្តទៀត។
ភ្លាមនោះបុរសជនជាតិចិនជាអ្នកបើកបររថយន្តបង្កបានបោះលុយចំនួន ២០០ដុល្លារ ទៅលើដី រួចហើយបើកចេញពីន្លែងកើតហេតុព្យាយាមរត់គេចខ្លួន តែត្រូវបានអ្នកនៅក្បែរខាងបានឃើញ និងនាំគ្នាជិះម៉ូតូដេញតាមរហូតទៅដល់ផ្លូវម៉ៅសេទុង ខាងកើតភ្លើងស្តុបបូគោទើបដេញតាមទាន់ ដោយទប់កំហឹងមិនបានៗ យកដុំថ្មគប់ បែកកញ្ចក់មួយផ្ទាំង ទើបបានប្រគល់ឲ្យកម្លាំងមានសមត្ថកិច្ចមកយកទៅវិញធ្វើការដោះស្រាយគ្នា។
ករណីគ្រោះថ្នាក់ ចរាចរណ៍នេះដែរបានកើតឡើងកាលពីវេលាម៉ោង០៣ និង៣០នាទីរសៀល ថ្ងៃទី០២ ខែវិច្ឆិកា ឆ្នាំ២០២០ នៅចំណុចភ្លើងស្តុបវិទ្យាល័យបឹងត្របែក ផ្លូវព្រះមុនីវង្ស ក្នុងសង្កាត់បឹងត្របែក ខណ្ឌចំការមន។ បុរសរងគ្រោះដែលបាក់ជើងម្ខាងខាងឆ្វេងម្ខាង និងរងរបួសធ្ងន់មានឈ្មោះ រស់ ពាណិជ្ជ អាយុ២៥ឆ្នាំ មុខរបររត់កង់បីឥណ្ឌា មានទីលំនៅក្នុងស្រុកល្វាឯម ខេត្តកណ្តាល ចំណែកឯបុរសជនជាតិចិន ជាអ្នកបើករថយន្តបង្កមិនត្រូវបានស្គាល់អំពីអត្តសញ្ញាណឡើយ។
មុនពេលកើតហេតុ កង់បីឥណ្ឌាពណ៌ស ពាក់ស្លាកលេខ ភ្នំពេញ ១AJ-៨៤៧៥ មួយគ្រឿង នៅឈប់ភ្លើងស្តុបខាងមុខវិទ្យាល័យបឹងត្របែកខាងលើ ក៏ស្រាប់តែមានរថយន្តកាម៉ារីបាឡែន ពណ៌ទឹកប្រាក់ ពាក់ស្លាកលេខ ភ្នំពេញ ២T-៥០៨៦ មួយគ្រឿងដែលលបើកបរដោយបុរសជនជាតិចិនម្នាក់នោះបោះពួយក្នុងល្បឿនយ៉ាងលឿន មកបុកពីក្រោយពេញទំហឹង និងបន្តទៅបុករថយន្តម៉ាកព្រុស ពណ៌ស ពាក់ស្លាកលេខ ភ្នំពេញ ២BG-០៣៣៧ ដែលកំពុងតែឈប់ភ្លើងស្តុបខាងមុខមួយគ្រឿងទៀត បណ្តាលឱ្យបុរសអ្នករត់កង់គៀបជាប់ក្នុងកង់បី ហើយត្រូវបានអ្នកនៅក្បែរក្លែងកើតហេតុនាំគ្នាគាស់យកចេញ និងបញ្ជូនតាមកង់បីយកទៅកាន់មន្ទីរពេទ្យមិត្តភាពខ្មែរ-សូវៀត ដើម្បីសង្គ្រោះភ្លាមៗតែម្តង។
តាមប្រភពដដែលបានប្រាប់បន្តទៀតថា ក្រោយពេលដែលបុរសជនជាតិចិន ម្នាក់ខាងលើបង្កគ្រោះថ្នាក់បណ្តាលឲ្យបុរសម្នាក់បាក់ជើងខាងឆ្វេងម្ខាងរងរបួសធ្ងន់ ហើយកង់បីឥណ្ឌាមួយគ្រឿងរងការខូចខាតស្ទើរតែទាំងស្រុង និងរថយន្តម៉ាកព្រុសមួយគ្រឿងក្រពឹតផ្នែកខាងក្រោយរងការខូចខាតដែរនោះ បុរសជនជាតិចិនរូបនោះ មិនបានឈប់ចុះមើល និង ធ្វើការដោះស្រាយគ្នាទេ ដោយបានបោះលុយចំនួន ២០០ដុល្លារទៅលើដី រួចហើយបើករថយន្តបន្តដំណើរចេញទៅទៀត បាត់យ៉ាងលឿនក្នុងបំណងព្យាយាមរត់គេចខ្លួនពីកន្លែងកើតហេតុ។
ដោយបានឃើញបុរសជនជាតិចិនម្នាក់ខាងលើធ្វើទង្វើរបែបនេះ អ្នកឃើញហេតុការណ៍នៅក្បែរខាងក៏បាននាំគ្នាជិះម៉ូតូដេញតាមរហូតទៅដល់ផ្លូវម៉ៅសេទុង ម្តុំខាងកើស្តុបបូគោ ទើបនាំគ្នាដេញតាមទាន់ និងឃាត់ជាប់ ដោយទំនងជាទប់កំហឹងមិនបានក៏យកដុំថ្មមួយដុំគប់បែកកញ្ចក់ចំហៀងខាងក្រោយមួយផ្ទាំង បណ្តាលឱ្យបែក និងប្រគល់ឲ្យកម្លាំងមានសមត្ថកិច្ចនគរបាលចរាចរណ៍ដែលនៅឈរជើងនៅគោលដៅក្បែរនោះតែម្តង។
ក្រោយពេលកើតហេតុកម្លាំងមានសមត្ថកិច្ចខណ្ឌចំការមនក៏បានមកនាំខ្លួនបុរសជនជាតិចិន និង រថយន្តម៉ាកកាម៉ារីបាឡែនបង្កយកទៅកាន់ចំណុចភ្លើងស្តុបខាងមុខវិទ្យាល័យបឹងត្របែកជាកន្លែងកើតហេតុ និងបាននាំទាំងកង់បីឥណ្ឌារបស់បុរសរងគ្រោះ និងរថយន្តម៉ាកព្រុសមួយគ្រឿងទៀត (រថយន្ត ២គ្រឿង និងកង់បីឥណ្ឌា ១គ្រឿង សរុប ៣គ្រឿង) យកទៅកាន់អធិការនគរបាលខណ្ឌចំការមន ដើម្បីធ្វើការដោះស្រាយគ្នាជាបន្តទៅទៀត៕ ដោយ ៖ ភី ផល
ចែករំលែកព័តមាននេះ