ខេត្តពោធិ៍សាត់ ៖ ស្ថានីយផលិតថាមពលអគ្គិសនីដើរដោយពន្លឺព្រះអាទិត្យ នៅភូមិសាន្ដស ឃុំស្នារអន្សារ ស្រុកក្រគរ ដែលបានដំណើរការកាលពីឆ្នាំ២០១៩លើផ្ទៃដី១៣៥ហិកតានោះ មកដល់ពេលនេះសម្រេចបាន៩០%ហើយ ។ នៅថ្ងៃទី១…
ខេត្តពោធិ៍សាត់ ៖ ស្ថានីយផលិតថាមពលអគ្គិសនីដើរដោយពន្លឺព្រះអាទិត្យ នៅភូមិសាន្ដស ឃុំស្នារអន្សារ ស្រុកក្រគរ ដែលបានដំណើរការកាលពីឆ្នាំ២០១៩លើផ្ទៃដី១៣៥ហិកតានោះ មកដល់ពេលនេះសម្រេចបាន៩០%ហើយ ។
នៅថ្ងៃទី១ ខែធ្នូ ឆ្នាំ២០២០ ឯកឧត្តម ស៊ុយ សែម រដ្ឋមន្ត្រីក្រសួងរ៉ែនិងថាមពល អមដំណើរដោយឯកឧត្តម ម៉ៅ ធនិន អភិបាលខេត្ត និងមន្ត្រីអ្នកមុខអ្នកការជាច្រើនរូបទៀត បានអញ្ជើញទៅពិនិត្យមើលការសាងសង់ ដើម្បីក្ដាប់ព័ត៌មានជុំវិញការផលិតបណ្ដាញថាមពលអគ្គិសនីប្រើពន្លឺព្រះអាទិត្យនេះ ។
លោក ម៉ៅ សុធា អ្នកគ្រប់គ្រងការងារនៅទីនោះបានឲ្យដឹងថា គម្រោងនេះចាប់ផ្ដើមឡើងក្នុងឆ្នាំ២០១៩ ដែលរហូតមកដល់ដំណាច់ឆ្នាំ២០២០នេះ សម្រេចបាន៩០%ហើយ ។ គម្រោងចែកចេញជា២ ៖ ទី១-មានទំហំ៣០មេហ្កាវ៉ាត់បានដំណើរការ១០០%ហើយ និងទី២-មានទំហំ៦០មេហ្កាវ៉ាត់កំពុងដំណើរការបាន៥០% នាពេលបច្ចុប្បន្ននេះ ។
លោកថ្លែងទៀតថា គម្រោងទី២ដែលមានទំហំ៦០មេហ្កាវ៉ាត់ គ្រោងបញ្ចប់ការសាងសង់នៅខែមករា ឆ្នាំ២០២១ ដោយក្រុមហ៊ុនស្នាយតិចគ្រុប ។ ចំពោះវិសាលភាពនៃការប្រើប្រាស់អាស្រ័យលើបណ្ដាញអគ្គិសនីកម្ពុជា បើអគ្គិសនីកម្ពុជាដាក់បណ្ដាញប្រើប្រាស់នៅទូទាំងប្រទេស ថាមពលនឹងបញ្ជូនទៅទូទាំងប្រទេស ។
ចំពោះទំហំផ្ទាំងសូឡាដែលត្រូវប្រើប្រាស់មានចំនួនជាង២០ម៉ឺនផ្ទាំង លើផ្ទៃដី១៣៥ហិកតា ដែលបច្ចុប្បន្ននេះ បានផ្គត់ផ្គង់ចូលបណ្ដាញជាតិទំហំ៦០មេហ្កាវ៉ាត់ តភ្ជាប់បណ្ដាញចែកចាយទៅអនុស្ថានីយដែលទើបនឹងសាងសង់នៅក្នុងឃុំស្វាយស ស្រុកក្រគរ ។ ថាមពលអគ្គិសនីដើរដោយពន្លឺព្រះអាទិត្យនេះ មានទំហំសរុប៩០មេហ្កាវ៉ាត់ ។
គួររំឭកថា មកដល់ពេលនេះកម្ពុជាមានវារីអគ្គិសនីចំនួន៧កន្លែងហើយ ដោយ៦កន្លែងស្ថិតនៅភាគនិរតីនៃប្រទេសកម្ពុជា គឺវារីអគ្គិសនីស្ទឹងអាតៃ ឫស្សីជ្រំ កំចាយ គិរីរម្យ១ គិរីរម្យ៣និងវារីអគ្គិសនីតាតៃ ។ ចំណែកមួយកន្លែងទៀតគឺវារីអគ្គិសនីសេសានក្រោម២ ស្ថិតនៅខេត្តស្ទឹងត្រែង ភាគឦសាននៃប្រទេសកម្ពុជា ។
កាលពីឆ្នាំ២០១៩កន្លងទៅនេះ រាជរដ្ឋាភិបាលបានសម្រេចឲ្យសាងសង់កន្លែងផលិតថាមពលអគ្គិសនីថ្មីរួមមាន វារីអគ្គិសនីស្ទឹងពោធិ៍សាត់១ ស្ថិតនៅឃុំប្រមោយ ស្រុកវាលវែង ដែលអាចផលិតថាមពលបាន៨០មេហ្កាវ៉ាត់ និងស្ថានីយអគ្គិសនីដើរដោយពន្លឺព្រះអាទិត្យ ក្នុងភូមិសាន្ដស ឃុំស្នារអន្សារ ស្រុកក្រគរនេះ ដែលអាចផលិតថាមពលបាន៩០មេហ្កាវ៉ាត់ ។
សមិទ្ធផលទាំងអស់នេះ សបញ្ជាក់ឲ្យឃើញពីការរីកចម្រើនផ្នែកអគ្គិសនីនៅកម្ពុជា ដោយការខិតខំប្រឹងប្រែងរបស់ឯកឧត្តម ស៊ុយ សែម រដ្ឋមន្ត្រីក្រសួងរ៉ែ និងថាមពល ក្រោមការដឹកនាំរបស់រាជរដ្ឋាភិបាល ដែលមានសម្ដេចតេជោ ហ៊ុន សែន ជាប្រមុខ ៕
ចែករំលែកព័តមាននេះ